TA PARSE ku tur dia tin notisia tokante desaster natural. Kompará ku ántes, awendia hopi mas hende ta bira víktima di un òf otro kalamidat. E Sentro di Investigashon di Desaster na Bèlgika a raportá ku na aña 2010 so tabatin 373 desaster i ku por lo ménos 296.000 hende a muri den esakinan.

Sí, e kantidat di desaster natural ku a ser raportá e último dékadanan a oumentá drástikamente. Por ehèmpel, entre 1975 i 1999, nan a raportá por lo ménos 300 desaster. Sinembargo, entre 2000 i 2010, e promedio tabata kasi 400 pa aña. Kisas bo tambe ta un di e personanan ku a yega di puntra, ‘Dikon tin asina tantu desaster awe?’

Hopi biaha hende ta kulpa Dios pa e desasternan natural ku ta asotá mundu; nan ta bisa ku esakinan ta “obra di Dios.” Pero esei no ta bèrdat. No ta Dios ta kousa e kalamidatnan ku ta afektá asina tantu hende awe. Ta sierto sí ku Beibel a profetisá ku lo tin desaster den nos tempu. Por ehèmpel, na Mateo 24:7 i 8 Hesus a bisa ku “lo tin skarsedat di kuminda i temblor den un lugá tras di otro. Tur e kosnan akí ta kuminsamentu di kalamidat, manera doló di parto.” Dikon Hesus a profetisá e susesonan akí, i kiko esaki ta nifiká pa nos?

E profesianan akí ta parti di e kontesta ku Hesus, e Yu di Dios, a duna su disipelnan riba e pregunta: “Kiko lo ta e señal di bo presensia i di konklushon di e era akí?” (Mateo 24:3) El a menshoná vários kos ku lo mester a sosodé, inkluso e kalamidatnan ku nos a papia di dje. Despues, el a ekspresá algun palabra ku tin gran nifikashon pa nos. El a bisa: “Ora boso mira e kosnan akí sosodé, boso por ta sigur ku e Reino di Dios ta serka.” (Lukas 21:31) Sí, desasternan natural ta señalá na e tempu ku kambionan históriko lo tuma lugá, i esei lo ta pronto.

No opstante, hopi hende ta keda puntra nan mes, ‘Si no ta Dios ta responsabel pa e desasternan akí, ta ken òf kiko ta kousa nan anto?’ Nos por komprondé e kontesta pa e pregunta ei solamente ora nos aseptá un bèrdat di Beibel  masha importante, esta, ku “henter mundu ta den poder di e Malbado.” (1 Huan 5:19) E palabranan ei ta laga nos komprondé ku no ta Dios ta responsabel pa e situashonnan ku ta kousa angustia den mundu; mas bien, hopi biaha esun responsabel ta su enemigu, “e Malbado,” kende Beibel ta yama tambe “Diabel.”—Revelashon 12:9, 12.

Komo ku e enemigu akí ta masha egoista, bida di hende no tin ningun balor p’e. I debí ku henter mundu ta bou di su kontrol, e ta fomentá e mesun aktitut ei den hende. Beibel a indiká ku hende lo tin e aktitut ei den “e último dianan,” bisando ku hende lo ‘stima nan mes, stima plaka, i ku nan lo ta bromadó i arogante.’ (2 Timoteo 3:1, 2) Pues no ta nada straño ku Diabel a krea un mundu ku ta dominá pa e karakterístikanan akí i otro mal kualidatnan. E ta instigá hende pa usa e rekursonan di tera na un manera egoista, i komo resultado di esaki, hopi bes hende ta haña nan obligá di biba den zona di peliger.

Awor, den ki manera e mundu golos djawe ta kontribuí na desaster? Wèl, un rapòrt di Nashonnan Uní tokante desaster mundial ta bisa: ‘Hopi hende ta bibando den zona di peliger, por ehèmpel den áreanan vulnerabel pa inundashon. Ademas, hende ta rosa mondi i destruí áreanan di moeras, loke ta hasi daño na e medio ambiente i pone ku e áreanan akí ta bira vulnerabel pa kalamidat. Laga nos no papia mes di e gasnan dañino ku hende ta kontaminá e medio ambiente kuné i ku ta kambia klima di mundu, pone nivel di laman sigui subi i atmósfera di mundu bira mas i mas kayente.’ I maske hende ta bisa ku hopi di e kosnan ku nan ta hasi ta na benefisio di ekonomia, en realidat, loke ta motivá nan ta egoismo i golosidat, karakterístikanan ku ta masha komun den mundu.

P’esei, hopi eksperto ta atmití awor ku pa motibu di e aktividatnan deskabeyá di hende, desasternan ta bira mas destruktivo. En realidat, hende ta apoyá Diabel den su intento pa oumentá e sufrimentu ku desaster ta kousa.

Ta bisto anto ku hopi desaster ta tuma lugá pa motibu di hende su echonan iresponsabel. Por ehèmpel, algun desaster lo no tabata asina destruktivo si no tabata pa e sitio kaminda nan a tuma lugá. Ademas, hopi hende ta haña nan obligá ta biba den áreanan peligroso debí na nan posishon ekonómiko i sosial. Sí, na hopi parti di mundu, ta hende sin eskrúpulo a pone ku desaster natural ta kousa mas destrukshon i sufrimentu. Mester bisa sí ku no ta tur biaha hende ta sufri den desaster debí na falta òf negligensia di un sierto persona; tin biaha hende ta sufri pa motibu ku “suseso imprevisto ta kai riba [nos] tur.”—Eklesiástes 9:11, NW.

Pero lo yega un dia ku lo no tin desaster mas? Laga nos ban wak kiko Beibel tin di bisa di e asuntu akí.