Abraham ta sintá den su tènt ku ta proteh’é kontra e higra di solo. Segun ku e ta wak na horizonte, e ta mira tres hòmber ku a bin bishitá e área. * Mesora e ta kore bai topa nan i ta roga nan pa bin sosegá un ratu i disfrutá di su hospitalidat. E ta ofresé nan “pida pan,” pero e ta laga prepará un bankete pa nan; esaki ta konsistí di karni moli di bisé, pan fresku hòrná, manteka i lechi. E bankete ku Abraham a sirbi su huéspetnan ta demostrá ku e ta un persona sumamente hospitalario i, manera nos ta bai mira, masha humilde.—Génesis 18:1-8.

KIKO TA HUMILDAT? Un persona humilde no ta orguyoso ni arogante. Un persona humilde ta rekonosé ku otro hende ta sobresalí den un òf otro manera riba dje. (Filipensenan 2:3) E ta skucha sugerensia i ta dispuesto pa hasi trabou humilde na benefisio di otro hende.

KON ABRAHAM A DEMOSTRÁ HUMILDAT? Abraham a sirbi otro hende ku plaser. Manera nos a menshoná na komienso di e artíkulo akí, asina ku Abraham a mira e tres bishitantenan, el a kore bai topa nan i a sòru pa nan haña tur loke nan tabatin mester. Mesora su kasá, Sara, a kuminsá prepará algu di kome. Pero bo a ripará ken a hasi mayoria di e trabou? Sí, Abraham! Ta é a kore bai kontra e bishitantenan i ofresé nan algu di kome. Ta é a kore bai na e tou di bestia i a skohe e bisé pa nan mata. Es mas, ta é a sirbi e bishitantenan. En bes di delegá tur trabou na su sirbidónan, e hòmber humilde akí mes a pone man na obra. Anto e no a sinti ku sirbi otro hende a rebahá su dignidat.

Abraham a skucha sugerensia di hende ku e tabatin outoridat riba dje. Tin masha poko  kòmbersashon entre Abraham ku Sara registrá den Beibel. Pero dos biaha, Beibel ta menshoná ku Abraham a skucha di Sara i a hasi loke el a sugerí. (Génesis 16:2; 21:8-14) Na promé instante, un di e sugerensianan ei “a duel Abraham mashá.” Pero ora Yehova a papia ku Abraham i a mustr’é ku Sara su idea ta bon, Abraham a sede humildemente i a hasi loke Sara a sugerí.

LÈS PA NOS: Si nos ta humilde di bèrdat, nos lo ta kontentu pa sirbi otro hende. Ku goso, nos lo hasi loke sea ta na nos alkanse pa hasi nan bida mas kómodo.

E manera ku nos ta reakshoná riba sugerensia di otro hende tambe ta demostrá si nos ta humilde òf nò. En bes di rechasá un idea djis pasobra no ta nos a bini kuné, ta mihó pa skucha opinion di otro hende. (Proverbionan 15:22) Esaki ta konta spesialmente pa hende ku tin sierto outoridat. John por ehèmpel, un superintendente eksperensiá ku ta sirbi na Bètel, a bisa: “Pa ami, un bon superintendente ta un persona ku ta krea un ambiente kaminda hende ta sinti nan liber pa ekspresá nan mes.” El a sigui bisa: “Bo mester ta humilde pa atmití ku un persona bou di bo outoridat por tin un mihó manera di hasi kos ku abo. Ningun hende—ni un superintendente—no mester pensa ku e ta e úniko ku tin bon idea.”

Si nos ta imitá Abraham, esta, ta skucha sugerensia di otro hende i hasi trabou humilde na nan fabor, nos lo tin e aprobashon di Yehova. Dikon? Pasobra ‘Dios ta oponé hende orguyoso, ma ta duna bondat inmeresí na hende humilde.’—1 Pedro 5:5.

[Nota]