Imaginá bo e siguiente esena: Durante un anochi trankil, Abraham ta pará pafó ta kontemplá e shelu yen di strea. Segun ku e ta wak esakinan, e no por keda sin pensa riba loke Dios a primintié, esta, ku su desendientenan lo bira mes numeroso ku strea. (Génesis 15:5) Sí, e streanan a sirbi komo un rekordatorio di Yehova su promesa. Ademas, nan a sirbi komo un garantia p’e. Dikon? Pasobra si Yehova tin e poder pa krea e inmenso universo i tur loke tin den dje, lo ta fásil p’e perkurá pa Abraham ku Sara haña yu. E fe ei Abraham tabatin.

KIKO TA FE? Segun Beibel, “fe” ta e konfiansa firme, basá riba evidensia sólido, ku hende tin ku loke nan ta spera riba dje lo keda realisá. Un persona ku tin fe den Dios ta enfoká riba kumplimentu di Dios su promesanan; p’e, e promesanan ei ta asina sigur ku ta komo si fuera nan a kumpli kaba.

KON ABRAHAM A DEMOSTRÁ FE? Abraham a demostrá ku e tabatin fe den e promesanan di Dios. Komo ku e tabatin un fe fuerte, el a bandoná su tera natal, ku e konfiansa ku Yehova lo a kumpli ku Su promesa i hib’é na un otro tera. Ademas, debí ku Abraham tabatin fe, el a bai di un lugá pa otro den Kanan, ku e konfiansa ku su desendientenan lo a poseé e tera ei ku tempu. Es mas, Abraham su fe a motiv’é pa obedesé Yehova i hasi un intento pa ofresé Isak komo sakrifisio. E tabata konvensí ku Yehova lo por a resusitá Isak si esei tabata nesesario.—Hebreonan 11:8, 9, 17-19.

Abraham a enfoká riba futuro i no riba pasado. Aunke Abraham i Sara kisas tabatin un bida mas kómodo na Ur ku na Kanan, ‘nan no a keda pensa riba e pais for di kual nan a sali.’ (Hebreonan 11:15, Beibel Santu) Mas bien, nan a enfoká riba e futuro bendishonnan ku Dios tabatin pa nan i nan desendientenan.—Hebreonan 11:16.

Abraham tabatin bon motibu pa konfia den Yehova? Sigur ku sí. Yehova a kumpli ku tur su promesanan. Ku tempu, Abraham su desendientenan a bira un nashon konosí komo Israel. I manera Yehova a primintí Abraham, e israelitanan a bai biba na Kanan.—Hosue 11:23.

LÈS PA NOS: Nos por tin sigur ku Yehova lo kumpli ku tur su promesanan. I aunke for di punto di bista di hende algun di nan por parse imposibel, nos ta konfia ku “pa Dios tur kos ta posibel.”—Mateo 19:26.

Ademas, e ehèmpel di Abraham ta siña nos pa enfoká riba futuro bendishonnan i no riba pasado. Esei ta presis loke un hòmber ku yama  Jason a siña hasi. Jason tin un malesa ku a paralisá henter su kurpa. El a bisa: “Mi mester atmití ku tin ora mi sa pensa riba pasado. I loke mas mi ta sinti falta di dje ta kosnan chikitu, manera por ehèmpel brasa mi kasá Amanda.”

Sinembargo, Jason tin pleno konfiansa ku Yehova lo kumpli ku su promesanan. Sí, e tin fe ku pronto nos planeta Tera lo bira un paradeis, ku hende fiel lo tin salú perfekto i ku nan lo biba pa semper. * (Salmo 37:10, 11, 29; Isaías 35:5, 6; Revelashon 21:3, 4) Jason ta bisa: “Mi ta kòrda mi mes ku e mihó tempu tin ku bini ainda.” E ta splika: “Pronto lo no tin strès, ansiedat, tristesa ni lamento mas—tur lo ta kos di pasado.” Jason ta un ekselente ehèmpel di fe, meskos ku Abraham.

[Nota]