Mantené un Spiritu Positivo den Kongregashon
“E bondat inmeresí di Señor Hesukristu sea ku e spiritu ku boso ta demostrá.” —FLP. 4:23.
1. Dikon e kongregashonnan di Filipo i Tiatira a haña elogio?
E KRISTIANNAN ku a biba na Filipo den promé siglo tabata pober. Sinembargo, nan tabata generoso i a sobresalí den e manera ku nan a mustra amor na nan rumannan den fe. (Flp. 1:3-5, 9; 4:15, 16) Ku rason Pablo a konkluí e karta ku el a skirbi nan ku e siguiente palabranan: “E bondat inmeresí di Señor Hesukristu sea ku e spiritu ku boso ta demostrá.” (Flp. 4:23) E kristiannan na Tiatira tabatin e mesun spiritu òf aktitut, i p’esei Hesukristu a bisa e kongregashon ei: “Mi konosé bo obranan, i bo amor, fe, sirbishi i perseveransia, i mi sa ku bo obranan di awor ta mas ku esnan di ántes.”—Rev. 2:19.
2. Ki efekto nos aktitut tin riba nos kongregashon?
2 Awe ta meskos: Kada kongregashon di Testigu di Yehova ta manifestá un sierto spiritu òf karakterístika ku ta sobresalí. Algun kongregashon ta spesialmente konosí pa nan amor i kariño. Otronan ta sobresalí den e manera zeloso ku nan ta apoyá e trabou di prediká i e sirbishi di tempu kompleto. Ora kada un di nos ta hasi esfuerso pa nos tin un aktitut positivo, nos ta kontribuí na e union ku tin den kongregashon i na su progreso en general. (1 Kor. 1:10) Pero di otro banda, un mal aktitut por desanimá otronan den kongregashon, pone nan pèrdè zelo, baha man den sirbishi i asta tolerá piká serio. (1 Kor. 5:1; Rev. 3:15, 16) Ki spiritu ta sobresalí den bo kongregashon? Kiko abo por hasi pa yuda mantené un spiritu positivo den bo kongregashon?
ANIMÁ OTRONAN PA NAN TA POSITIVO
3, 4. Kon nos por alabá Yehova den kongregashon?
3 E salmista David a kanta: “[Yehova,] lo mi duna bo gradisimentu den e kongregashon grandi; lo mi alabá bo meimei di un multitut enorme.” (Sal. 35:18) Sí, David no a keda sin alabá Yehova ora e tabata huntu ku otro sirbidónan di Dios. Awe, nos reunionnan semanal di kongregashon, inkluso e Estudio di Toren di Vigilansia, ta duna nos un ekselente oportunidat pa demostrá nos zelo i fe mediante nos komentarionan. P’esei, nos tur mester puntra nos mes: ‘Mi ta hasi bon uso di mi privilegio di por duna komentario na reunion? Mi ta prepará bon i ta duna komentario signifikativo? Komo kabes di famia, mi ta yuda mi yunan prepará nan komentario di antemano i ta siña nan kontestá den nan mes palabra?’
4 David a bisa: “Mi kurason ta para firme, o Dios, mi kurason ta para firme; lo mi kanta, sí, lo mi kanta alabansa.” (Sal. 57:7) Ku e palabranan akí, David a mustra ku si nos kurason ta firme, esta, determiná pa hasi loke ta korekto, nos lo demostrá esei den e manera ku nos ta kanta. E kantikanan ku nos ta usa na nos reunionnan kristian ta yuda nos “kanta alabansa” na Yehova ku un kurason firme. I si nos no sa kon pa kanta algun di e kantikanan akí, pakiko no train nan durante e anochi di Adorashon Komo Famia? Laga nos ta determiná pa ‘kanta na Yehova tanten ku nos ta na bida i kanta alabansa na dje miéntras ku nos tin bida.’—Sal. 104:33.
5, 6. Kon nos por mustra hospitalidat i generosidat, i na kiko esaki ta kontribuí?
5 Un otro manera ku nos por kontribuí na un aktitut positivo den kongregashon ta di mustra hospitalidat na nos rumannan den fe. Den e último kapítulo di Pablo su karta na e Hebreonan, el a ekshortá e rumannan: “Sigui stima otro manera ruman. No lubidá di mustra hospitalidat.” (Heb. 13:1, 2) Un manera ekselente ku nos por mustra hospitalidat ta di invitá superintendentenan biahero i nan esposa òf rumannan den tempu kompleto pa kome huntu ku nos. Ademas, ta bon pa kòrda riba esnan ku ta biuda, mayor soltero i otro personanan ku por djòin nos de bes en kuando den nos Adorashon Komo Famia òf disfrutá di un kuminda huntu ku nos.
6 Pablo a animá Timoteo pa instruí e rumannan “pa nan hasi bon, pa nan ta riku den bon obra, pa nan ta generoso, kla pa kompartí ku otro, i asina akumulá komo tesoro pa nan mes un bon fundeshi pa futuro, a fin ku nan por haña un gara firme riba loke realmente ta bida.” (1 Tim. 6:17-19) Di e manera akí, Pablo a animá su rumannan den fe pa nan tin un spiritu generoso. Anto nos por ta generoso asta si nos situashon finansiero no ta masha bon. Por ehèmpel, nos por yuda esnan ku tin mester di transporte pa bai sirbishi i reunion. I kiko di esnan ku ta benefisiá di tal aktonan di bondat amoroso? Nan, na nan turno, por duna loke nan por pa yuda kubri gastu di kombustibel, ku ta sigui oumentá. Di e manera ei, nan ta mustra apresio i ta kontribuí na e bon spiritu den kongregashon. Ademas ta bon pa nos organisá nos asuntunan pa nos por pasa mas tempu huntu ku nos rumannan, pasobra asina ei nos ta laga nan sinti ku nos ta stima nan i ku nos tin mester di nan. Ora nos ta hasi bon na “nos rumannan den fe” i ta kla pa duna di nos tempu i rekurso pa pasa un ratu ameno huntu ku nan, nos amor pa nan lo bira mas fuerte, i nos lo yuda kontribuí na un spiritu kaluroso i positivo den kongregashon.—Gal. 6:10.
7. Kon nos por yuda mantené e bon spiritu di nos kongregashon?
7 Laga nos konsiderá awor dos faktor mas ku ta fortalesé e laso di amor ku tin entre rumannan den fe: amistat i konfidensialidat. (Lesa Proverbionan 18:24.) Berdadero amigunan no ta revelá kosnan personal di nan rumannan. Ora un ruman papia su kosnan personal ku un amigu i ta konfia ku e amigu akí ta tene e kosnan akí pa su mes, e laso di amor ku kisas ta eksistí entre nan lo bira mas fuerte. P’esei, laga nos ta amigunan di konfiansa ku no ta plama asuntunan konfidensial, pasobra asina nos ta demostrá ku nos ta stima nos rumannan den fe i ta fortifiká e lasonan di amistat den kongregashon.—Pro. 20:19.
SEA ZELOSO DEN SIRBISHI
8. Kiko Hesus a bisa e laodisensenan, i dikon?
8 Hesus a bisa e kongregashon di Laodisea: “Mi konosé bo obranan, i mi sa ku bo no ta ni friu ni kayente. Mare bo tabata sea friu òf kayente. Pues, komo ku bo ta lou, i no ta ni friu ni kayente, mi ta bai skupi bo for di mi boka.” (Rev. 3:15, 16) E rumannan na Laodisea no tabata masha zeloso den sirbishi. I probablemente, e aktitut ei a daña nan relashon ku otro. P’esei, amorosamente Hesus a bisa nan: “Mi ta reprendé i disipliná tur esnan ku mi tin kariño p’e. P’esei, sea yen di zelo i arepentí.”—Rev. 3:19.
9. Ki efekto nos entusiasmo den sirbishi di vèlt tin riba e kongregashon?
9 Pa por promové un spiritu positivo den kongregashon, nos mester tin zelo pa e sirbishi di vèlt. Un meta di e kongregashon kristian ta pa buska hende semehante na karné den teritorio i siña nan e bèrdat. Pues, nos tin ku partisipá ku entusiasmo den e trabou di hasi disipel, meskos ku Hesus a hasi. (Mat. 28:19, 20; Luk. 4:43) Mas zeloso nos ta den sirbishi, mas uní nos lo ta komo “kompañero di trabou di Dios.” (1 Kor. 3:9) I ora nos ta mira kon otronan ta defendé nan fe den sirbishi i ta ekspresá nan apresio pa kosnan spiritual, esei ta motivá nos pa stima i respetá nan mas. Ademas, ora nos ta traha “lado a lado” den sirbishi, e kongregashon ta bira mas uní.—Lesa Filipensenan 1:27.
10. Ora nos ta hasi esfuerso pa mehorá nos sirbishi di vèlt, ki efekto esaki lo por tin riba otronan den kongregashon?
10 Nos esfuerso pa mehorá nos sirbishi tambe por tin un bon efekto riba otronan. Segun ku nos ta mustra mas interes den e personanan ku nos ta topa den sirbishi i ta hasi mas esfuerso pa alkansá nan kurason, nos zelo pa e sirbishi di vèlt lo oumentá. (Mat. 9:36, 37) I nos lo kontagiá nos rumannan ku nos entusiasmo. P’esei mes Hesus a manda su disipelnan pa prediká dos-dos i no nan so. (Luk. 10:1) Esaki no solamente a animá i edifiká e disipelnan pero a oumentá nan zelo tambe pa e sirbishi. Nos tur gusta traha ku publikadónan zeloso, no ta bèrdat? Nan entusiasmo ta animá nos pa sigui den e trabou di prediká.—Rom. 1:12.
TENE KUIDOU KU MURMURAMENTU I NO SKONDE PIKÁ
11. Ki aktitut algun israelita den tempu di Moises tabatin, i kiko esaki a hiba na dje?
11 Djis un par di siman despues ku Israel a bira un nashon nobo, e israelitanan a kuminsá murmurá i keha. Esei a pone ku despues nan a rebeldiá kontra Yehova i su representantenan. (Éks. 16:1, 2) P’esei, ta solamente un grupo chikitu di e israelitanan ku a bandoná Egipto a drenta e Tera Primintí. Imaginá bo, ni Moises no por a drenta, pasobra Yehova no a keda kontentu ku e manera ku el a reakshoná riba e mal aktitut di e israelitanan. (Deu. 32:48-52) Kon nos por evitá di tin un mal aktitut?
12. Kon nos por evitá di krea e kustumber di murmurá?
12 Nos mester tene kuidou pa nos no krea e kustumber di murmurá. Pa evitá esei, nos mester ta humilde i tin rèspèt pa outoridat. Ademas, nos tin ku wak bon ku ken nos ta asosiá. Dikon? Pasobra si nos rekreo no ta sano òf si nos ta pasa muchu tempu ku koleganan di trabou òf kompañeronan di skol ku no ta respetá prinsipionan di Beibel, esaki por afektá nos. Sí, ta sabí pa no asosiá muchu ku personanan negativo òf ku ta promové un spiritu independiente.—Pro. 13:20.
13. Na ki problemanan mas murmuramentu por hiba?
13 Murmuramentu por hiba na mas problema. Por ehèmpel, murmuramentu por trese desunion i perturbá e pas den kongregashon. Es mas, ora nos ta krítika nos rumannan den fe, nos por hasi nan doló, i e kehamentu akí por asta hiba na kalumnia i odio. (Lev. 19:16; 1 Kor. 5:11) Algun kristian den promé siglo tabata murmurá i ‘despresiá esnan ku tin outoridat i papia malu di esnan glorioso.’ (Hudas 8, 16) Tal murmuramentu kontra rumannan den puesto di responsabilidat sigur a desagradá Yehova.
14, 15. (a) Si no atendé piká serio, kon esaki por afektá e kongregashon? (b) Kiko nos mester hasi ora nos haña sa ku un ruman ta enbolbí den mal echo serio?
14 Awor, kiko si nos haña sa ku un ruman ta kometé piká den sekreto? Por ehèmpel, e ruman por ta bebe di mas, wak pornografia òf hiba un bida inmoral. Kiko nos lo hasi? (Efe. 5:11, 12) Wèl, si nos ta ignorá piká serio, Yehova lo por kita su spiritu santu for di e kongregashon. (Gal. 5:19-23) Meskos ku e kristiannan di Korinto den promé siglo mester a eliminá tur maldat for di e kongregashon, nos tambe mester tene nos kongregashon limpi i asina mantené e bon spiritu di e kongregashon. Kiko abo por hasi pa yuda mantené pas den kongregashon?
15 Manera nos a menshoná anteriormente, ta importante pa mantené sierto asuntunan konfidensial, spesialmente si ta trata di kosnan privá di un ruman. Ta masha malu pa plama informashon konfidensial. Pero si ta trata di piká serio, mester informá e ansianonan tokante e asuntu. Bíblikamente, ta nan tin e responsabilidat di atendé e asuntu ei. (Lesa Levítiko 5:1.) Pues, si nos sa ku un ruman a kometé un mal echo serio, nos mester anim’é pa aserká e ansianonan i buska yudansa. (Sant. 5:13-15) Anto si e no hasi esei denter di un periodo di tempu rasonabel, nos mester raportá e mal echo.
16. Den ki sentido nos ta yuda mantené e bon spiritu di nos kongregashon ora nos raportá piká serio?
16 E kongregashon kristian ta un refugio spiritual, i p’esei mes nos tin ku yuda proteh’é i raportá kualke piká serio. Anto si e pekadó rekonosé su fayo, arepentí i aseptá disiplina i yudansa di ansianonan, e kongregashon lo no kore peliger mas. Pero kiko si e ruman ku a kometé piká serio no ke arepentí i no ta aseptá konseho amoroso di e ansianonan? E ora ei mester ekspuls’é. Asina, ta ‘destruí,’ òf eliminá, e mal influensia for di e kongregashon i mantené su bon spiritu. (Lesa 1 Korintionan 5:5.) Sí, pa mantené e bon spiritu di un kongregashon, kada un di nos mester hasi loke ta korekto, kooperá ku e ansianonan i hasi lo mihó pa nos rumannan.
YUDA MANTENÉ “UNION DI SPIRITU”
17, 18. Kiko lo yuda nos “mantené e union di spiritu”?
17 E promé disipelnan di Hesus a kontribuí na e union den kongregashon pasobra nan tabata “presta atenshon na siñansa di e apòstelnan.” (Echo. 2:42) Nan a balorá konseho bíbliko i a sigui guia di e ansianonan. Awe tambe, ansianonan ta kooperá ku e esklabo fiel i prudente i ta animá i yuda nan rumannan den fe pa keda uní. (1 Kor. 1:10) Ora nos, na nos turno, ta someté nos mes na e instrukshonnan di Yehova su organisashon i ta sigui guia di e ansianonan, nos ta duna prueba ku nos ta “hasiendo esfuerso sinsero pa mantené e union di spiritu den e vínkulo di pas.”—Efe. 4:3.
18 Pues, laga nos hasi nos máksimo esfuerso pa mantené un spiritu positivo den kongregashon. Si nos hasi esei, nos por ta sigur ku ‘e bondat inmeresí di Señor Hesukristu lo ta ku e spiritu ku nos ta demostrá.’—Flp. 4:23.
[Preguntanan di Estudio]
[Plachi na página 24]
Bo ta prepará komentario signifikativo i asina yuda kontribuí na e bon spiritu den kongregashon?
[Plachi na página 25]
Pa kontribuí na un spiritu positivo den kongregashon, ta bon pa train e kantikanan di Reino
