Yuda Hende “Lanta for di Soño”
“Boso sa den ki tempu nos ta biba. Ya ta ora pa boso lanta for di soño.”—ROM. 13:11.
1, 2. Den ki sentido hopi hende tin ku lanta for di soño?
TUR aña, míles di hende ta muri den aksidente di tráfiko pasobra nan ta kabishá òf asta pega soño tras di stür. Otronan ta pèrdè nan trabou pasobra nan no ta lanta na ora pa bai traha òf ta drumi na trabou. Sinembargo, si un hende ta kabishá den sentido spiritual, esei por tin konsekuensianan muchu mas serio. P’esei mes Beibel ta bisa: “Felis ta esun ku keda lantá.”—Rev. 16:14-16.
2 No opstante, mayoria di hende ta na soño den sentido spiritual miéntras ku e gran dia di Yehova ta serka. Asta algun lider di kristiandat ta atmití ku nan tou ta na soño. Ki ora un hende ta na soño den sentido spiritual? Dikon ta importante pa kristiannan berdadero keda lantá? Kon nos por yuda otro hende lanta for di soño spiritual?
KI ORA UN HENDE TA NA SOÑO DEN SENTIDO SPIRITUAL?
3. Ki ora un hende ta na soño den sentido spiritual?
3 Generalmente, un hende na soño ta inaktivo. Ma hende ku ta na soño den sentido spiritual sí ta aktivo; kisas nan ta masha okupá—pero no ku kosnan spiritual. Podisé nan ta okupá ku nan keasernan di tur dia òf ta dediká tur nan tempu buskando plaser, prestigio òf rikesa. Tur e kosnan akí ta stroba nan di satisfasé nan nesesidat spiritual. Pero hende ku ta spiritualmente lantá sí ta konsiente ku nos ta bibando “den e último dianan” i ku nan tin ku hasi mas tantu posibel den Dios su sirbishi.—2 Ped. 3:3, 4; Luk. 21:34-36.
4. Dikon Pablo a konsehá nos pa “no sigui drumi manera otro hende”?
4 Lesa 1 Tesalonisensenan 5:4-8. Sí, apòstel Pablo a papia seriamente ku e rumannan. El a bisa nan pa “no sigui drumi manera otro hende.” Kiko e tabata ke men? Un manera ku nos por “sigui drumi” ta di ignorá e normanan moral di Yehova. Ademas, nos por “sigui drumi” den e sentido ku nos ta ignorá e echo ku Yehova su tempu pa destruí e malbadonan ta serka. Nos mester tene kuidou pa hende malbado no influensiá nos pa imitá nan kondukta i aktitut.
5. Kon hende ta demostrá ku nan ta na soño den sentido spiritual?
5 Algun hende ta kere ku Dios no ta eksistí i ku nan no tin ku duna kuenta na dje. (Sal. 53:1) Otronan ta pensa ku nan no tin nodi di mustra interes den Dios pasobra e no ta interesá den hende. I tin hende ta bisa ku kere den Dios so ta sufisiente. Tur e hendenan akí ta drumí den sentido spiritual; nan mester lanta for di soño. Pero kon nos por yuda nan?
NOS MES MESTER KEDA LANTÁ
6. Dikon un kristian mester hasi esfuerso pa keda lantá den sentido spiritual?
6 Pa nos por lanta otro hende for di soño, nos mes mester ta lantá. Kiko esei ta enserá? Nos tin ku evitá di komportá nos mes manera hende ku ta na soño spiritualmente. Segun e Palabra di Dios, e hendenan akí ta hasi “obranan ku ta pertenesé na skuridat”—ku ta entre otro, korementu di paranda, buracheria, inmoralidat seksual, kondukta sinbèrgwensa, pleitu i yalursheit. (Lesa Romanonan 13:11-14.) Pa evitá e obranan ei por ta difísil. No opstante, ta masha importante pa keda alerta. Tuma por ehèmpel un shofùr; si e no mira e importansia di keda lantá ora e ta stür, e por pone su bida na peliger. Pues, ta mas importante ainda pa un kristian realisá kon peligroso ta pa pega soño den sentido spiritual. Esei por ta fatal!
7. Kon un punto di bista robes di e hendenan den nos teritorio por afektá nos sirbishi?
7 Imaginá ku un kristian ta pensa ku tur hende den su teritorio a rechasá e bon notisia i ku nan lo no kambia nunka. (Pro. 6:10, 11) Kisas e ta rasoná, ‘Si niun hende den mi teritorio no ta aseptá e bon notisia, pakiko gasta mi energia pa purba yuda nan?’ Ta bèrdat ku aworakí hopi hende kisas ta drumí den sentido spiritual, pero nan situashon òf aktitut por kambia. I echonan ta mustra ku algun ta lanta for di soño i aseptá e mensahe di Reino. Pues, semper nos mester ta lantá, hasiendo esfuerso pa yuda hende. Por ehèmpel, nos por purba métodonan nobo pa presentá e mensahe di Reino na un manera mas atraktivo. Pa nos keda lantá, nos mester tene bon na mente tambe dikon nos sirbishi ta importante.
DIKON NOS SIRBISHI TA IMPORTANTE?
8. Dikon nos sirbishi kristian ta masha importante?
8 Kòrda, sea kual sea e manera ku hende ta reakshoná, nos predikashon ta onra Yehova i ta hunga un papel importante den kumplimentu di su propósito. Pronto, Dios lo husga hende a base di e manera ku nan ta reakshoná riba nos predikashon. Esnan ku desobedesé e bon notisia, lo e destruí pa semper. (2 Tes. 1:8, 9) Ademas, lo ta robes pa un kristian pensa ku e no tin nodi di hasi esfuerso pa prediká ku zelo ya ku “lo bai tin un resurekshon di tantu hende hustu komo inhustu.” (Echo. 24:15) Dikon e no mester pensa asina? Pasobra Beibel ta laga nos komprondé tambe ku esnan ku ta ser husgá komo “kabritu” lo “haña morto eterno.” Pues, nos trabou di prediká ta un ekspreshon di Dios su miserikòrdia; e ta habri kaminda pa hende kambia i haña “bida eterno.” (Mat. 25:32, 41, 46; Rom. 10:13-15) Si nos no prediká, kon hende por tende e mensahe ku por salba nan bida?
9. Kon predikashon di e bon notisia ta benefisiá tantu abo komo otro hende?
9 Predikashon di e bon notisia ta benefisiá nos mes tambe. (Lesa 1 Timoteo 4:16.) Bo no a ripará ku ora bo papia di Yehova i di e speransa di Reino ku esei ta fortalesé bo fe i oumentá bo amor pa Dios? Esei no a yuda bo kultivá kualidatnan kristian? E echo ku bo ta demostrá bo amor pa Dios predikando e bon notisia no a hasi bo un persona mas felis? Hopi ruman ku tabatin e privilegio di siña otro hende e bèrdat a eksperensiá e goso di mira kon Dios su spiritu a yuda e personanan ei mehorá nan bida.
SEA UN BON OPSERVADÓ
10, 11. (a) Kon Hesus i Pablo a demostrá ku nan tabata alerta i un bon opservadó? (b) Ilustrá kon nos por tin mihó resultado den sirbishi ora nos ta alerta i un bon opservadó.
10 Tin diferente manera ku nos por lanta hende su interes pa e bon notisia. P’esei, nos mester ta alerta den sirbishi i opservá bon. I Hesus a pone un ekselente ehèmpel pa nos. Debí ku e tabata un bon opservadó, e por a diserní kiko tabata molestiá un fariseo maske e fariseo mes no a bisa nada. Ademas, e por a mira e sinseridat di un muhé pekadó ku a arepentí di kurason i tambe e spiritu di sakrifisio propio ku un biuda a desplegá. (Luk. 7:37-50; 21:1-4) Hesus por a yuda hende pasobra e tabata sa kiko nan tabatin mester. Nos tambe por ta un bon opservadó aunke nos no tin e mesun kapasidat ku Hesus. Apòstel Pablo a mustra esei bon kla: El a adaptá su presentashon pa por alkansá diferente grupo di hende i tambe personanan ku diferente punto di bista.—Echo. 17:22, 23, 34; 1 Kor. 9:19-23.
11 Ora nos hasi esfuerso pa ta alerta i un bon opservadó manera Hesus i Pablo, nos por haña sa kon ta e mihó manera pa lanta interes di hende ku nos topa. Por ehèmpel, segun ku bo ta aserká un persona, buska indikashon ku por yuda bo saka afó kiko ta su kultura, interes òf situashon familiar. Kisas bo por diserní kiko e persona ta hasiendo n’e momento ei i komentá algu amabel tokante esei pa kuminsá un kòmbersashon.
12. Kiko nos mester tene kuenta kuné ora nos ta kòmbersá den sirbishi?
12 Un hende alerta ta evitá distraishon. Ora nos ta den sirbishi, por ehèmpel, kisas ta masha edifikante pa kòmbersá ku nos kompañero. No opstante, nos no mester lubidá kiko ta e propósito di nos sirbishi di vèlt: prediká na otro hende. (Ekl. 3:1, 7) Pues, ora nos ta bai di un kas pa otro, nos mester tene kuidou pa nos kòmbersashonnan no kita nos atenshon for di e propósito ei. Un bon manera pa keda enfoká riba nos trabou di prediká ta di papia tokante tópikonan ku nos ke bai trata ku personanan interesá. Un otro kos ku nos ke tene kuenta kuné ta telefòn selular. Aunke esaki por yuda nos bon den sirbishi, nos mester hasi sigur pa nos telefòn no interumpí nos kòmbersashon ku un doño di kas.
MUSTRA INTERES PERSONAL
13, 14. (a) Kon nos por saka afó kiko ta interesá un persona? (b) Kiko lo por lanta un persona su interes pa kosnan spiritual?
13 Kristiannan ku ta lantá i alerta ta skucha bon ora hende den sirbishi ta papia ku nan. Kisas bo por pensa riba preguntanan ku bo por hasi pa yuda un persona ekspresá su mes. E ta preokupá tokante e kantidat di religion ku tin, e violensia den su área òf e frakasonan di gobernashon humano? Ademas, bo por lanta un persona su interes, menshonando kon maraviosamente organismonan bibu ta kreá òf kon benefisioso ta pa sigui konseho bíbliko. Orashon tambe ta algu ku ta interesá hende di kasi tur kultura, asta algun ateista. Hopi hende ta puntra nan mes si tin un persona ku ta skucha orashon. Podisé tambe nos por lanta interes di otronan ku preguntanan manera por ehèmpel: Dios ta skucha tur orashon? Si no ta asina, kiko nos mester hasi pa Dios skucha nos?
14 Nos por siña hopi tambe ora nos ta opservá bon kon publikadónan eksperensiá ta kuminsá un kòmbersashon. Ripará kon nan ta hasi e doño di kas pregunta sin mete den su asuntunan òf lag’é sintié inkómodo. Opservá kon nan tono di bos i nan ekspreshon di kara ta laga e doño di kas komprondé ku nan ta interesá den su punto di bista.—Pro. 15:13.
SEA KARIÑOSO I USA TAKTO
15. Dikon nos mester ta kariñoso ku e hendenan den teritorio?
15 Abo gusta pa hende lanta bo for di un soño profundo? Hopi hende no gusta pa bo lanta nan diripiente for di soño. Mayoria di hende ta preferá pa bo lanta nan na un manera suave. Meskos ta konta ora di lanta hende ku ta drumí den sentido spiritual. Awor, si un hende rabia pasobra bo a yama na su kas, kon ta e mihó manera pa reakshoná? Generalmente, ta mihó pa respetá su sintimentunan i bai. (Pro. 15:1; 17:14; 2 Tim. 2:24) Nos bon manera por motivá e persona pa e ta mas reseptivo e siguiente biaha ku un Testigu yama na su porta.
16, 17. Kon nos por mustra disernimentu den sirbishi?
16 Den algun kaso, nos por logra papia ku un persona maske su promé reakshon ta negativo. Kisas e ta bisa nos, “Danki, pero mi tin mi mes religion” òf “mi no ta interesá,” djis pa terminá e kòmbersashon. Pero, kisas ku takto i bondat lo bo por logra hasi un pregunta ku ta lanta su interes.—Lesa Kolosensenan 4:6.
17 Tin biaha ta mihó pa mustra komprenshon i bai ora un persona bisa ku e ta muchu okupá pa skucha nos. Pero, tin biaha e situashon ta permití bo bisa algu breve i signifikativo. Algun ruman ta logra habri Beibel, lesa un teksto ku ta pone e doño di kas pensa i asta laga un pregunta pa e reflekshoná riba dje; tur esaki den ménos ku un minüt. Tin biaha nan presentashon breve ta logra lanta e doño di kas su interes asina tantu ku e ta sinti ku e no ta dje okupá ei pa kòmbersá un ratu. Ta bon pa ora bo haña un oportunidat asina, bo tambe purba e método ei.
18. Kiko nos por hasi pa ta mas efikas den duna testimonio informal?
18 Durante nos aktividatnan di tur dia tambe nos por lanta hende su interes pa e bon notisia si nos ta prepará pa duna testimonio informal. Hopi ruman ta sòru pa semper nan tin literatura den nan saku òf den nan tas. Podisé nan tin tambe un teksto di Beibel spesífiko na mente ku nan lo ke usa ora e oportunidat presentá. Si bo mester di yudansa pa prepará pa duna testimonio informal, ta bon pa bo papia ku e superintendente di sirbishi òf un pionero den bo kongregashon.
LANTA INTERES DI BO FAMIANAN NA UN MANERA BONDADOSO
19. Dikon nos no mester stòp di hasi esfuerso pa yuda nos famia?
19 Nos tur ke pa nos famia tambe aseptá e bèrdat. (Hos. 2:13; Echo. 10:24, 48; 16:31, 32) Anto si nan no aseptá e bon notisia mesora, esei lo por desanimá nos i pone nos pèrdè smak di prediká na nan. Podisé nos ta pensa ku nada ku nos bisa òf hasi lo no kambia nan aktitut. Pero algu por sosodé ku por pone un miembro di famia kambia su bida òf punto di bista. Òf podisé awor abo por splika e bèrdat mihó, i asina logra un mihó resultado.
20. Dikon ta importante pa usa takto ora nos ta papia ku nos famia?
20 Semper ta bon pa tene kuenta ku e sintimentunan di nos famianan. (Rom. 2:4) Meskos ku nos ta kariñoso ku hende ku nos topa den sirbishi, nos mester ta kariñoso ku nos famia tambe. Sí, nos mester papia ku suavedat i rèspèt ku nan. En bes di prediká na nan konstantemente laga nan mira ki bon efekto e bèrdat tin riba bo. (Efe. 4:23, 24) Laga nan mira bon kla tambe kon Yehova a yuda bo mehorá bo bida i ‘siña bo prosperá.’ (Isa. 48:17) Sí, laga bo famia mira kon bida di un kristian mester ta.
21, 22. Konta un eksperensia ku ta mustra ku ta importante pa sigui hasi esfuerso pa yuda nos famia spiritualmente.
21 Un ruman muhé a skirbi resientemente: “Semper mi a hasi esfuerso pa mi duna testimonio na mi 13 rumannan, ku echo i palabra. Tur aña mi ta skirbi nan. Tòg, pa 30 aña largu, mi so tabata Testigu den mi famia.”
22 E ruman muhé a sigui konta: “Un biaha mi a yama un di mi ruman muhénan ku ta biba sientos di kilometer leu for di mi. El a bisa mi ku el a pidi su pastor studia Beibel kuné, pero nunka e pastor no a hasi esei. Mi a bis’é ku mi ta kla pa yud’é. Anto el a kontestá: ‘Ta bon, pero for di aworakí mi ta bisa bo ku ami sí no ta bira Testigu di Yehova.’ Mi a pòst e buki Kiko Beibel Ta Siña Realmente? p’e, i kada pasa tantu dia, mi tabata yam’é na telefòn. Pero e no a ni habri e buki. Finalmente, mi a pidié pa e kue su buki i, via telefòn, pa un 15 minüt, nos a lesa i trata algun di e tekstonan sitá. Despues di un par di yamada, e tabata kier a studia mas ku 15 minüt. Despues e mes a kuminsá yama mi pa nos studia: Tabatin biaha ku e tabata yama dos bes pa dia, i tin biaha asta mainta trempan promé ku mi lanta for di soño. E siguiente aña, el a batisá, i un aña despues, el a kuminsá traha komo pionero.”
23. Dikon nos no mester kansa di hasi esfuerso pa lanta hende ku ta drumí den sentido spiritual?
23 Pa yuda hende lanta for di soño den sentido spiritual ta un arte, i e ta eksigí esfuerso kontinuo. I tin hende mansu ku ta reakshoná bon ora nos lanta nan for di soño. Tur luna, un promedio di mas ku 20.000 hende ta batisá i bira Testigu di Yehova. Pues, laga nos hasi kaso di e konseho ku Pablo a duna Argipo: “Keda alerta pa bo kumpli ku e sirbishi ku bo a aseptá den Señor.” (Kol. 4:17) E siguiente artíkulo ta yuda nos komprondé kiko ta enserá prediká ku un sentido di urgensia.
[Preguntanan di Estudio]
[Kuadro na página 13]
KIKO BO TIN KU HASI PA KEDA LANTÁ?
▪ Sigui hasi e boluntat di Dios
▪ Evitá obranan ku ta pertenesé na skuridat
▪ Keda alerta pasobra ta peligroso pa pega soño den sentido spiritual
▪ Mustra interes sinsero den tur hende den bo teritorio
▪ Purba métodonan nobo di prediká
▪ Kòrda ku bo sirbishi ta importante
