‘Mi yu, konosé e Dios di bo tata i sirbié ku henter bo kurason.’—1 KRÓ. 28:9.

1, 2. (a) Kua parti di e kurpa humano ta ser usá mas tantu biaha na un manera figurativo den Beibel? (b) Dikon nos mester sa kiko e kurason figurativo ta?

HOPI biaha, e Palabra di Dios ta usa partinan di e kurpa humano na un manera figurativo. Por ehèmpel, e patriarka Yòb a bisa: “No tin violensia den mi mannan.” Rei Sálomon a remarká: “Bon notisia ta hasi wesu salú.” Yehova a sigurá Ezekiel: “Mas duru ku piedra, mi a hasi bo frenta.” Disipel Santiago a bisa: “Lenga ta un kandela.”—Yòb 16:17; Pro. 15:30; Eze. 3:9; Sant. 3:6.

² Pero tin un órgano di e kurpa humano ku Beibel ta usa den sentido figurativo mas ku kualke otro parti. Ana, un fiel sirbidó di Yehova, a menshon’é den su orashon; el a bisa: “Mi kurason ta regosihá den SEÑOR.” (1 Sam. 2:1) De echo, eskritornan di Beibel a menshoná e palabra “kurason” kasi mil biaha, i mayoria di biaha den sentido figurativo. Pues, ta masha importante pa nos sa kiko e kurason figurativo ta pasobra Beibel ta bisa ku nos mester proteh’é. (Lesa Proverbionan 4:23.)

KIKO E KURASON FIGURATIVO TA?

3. Kon nos por haña sa kiko e kurason figurativo ta? Ilustrá.

³ E Palabra di Dios no ta duna un definishon di e palabra “kurason,” pero e ta yuda nos diserní sí kiko e kurason figurativo ta. Kon asina? Wèl pensa riba un pùzel ku ta konsistí di vários pida ku huntu ta forma un bunita kuadro. Ma ún pida so no ta yuda bo mira henter e kuadro. Den kaso di kurason figurativo ta meskos. Ta ora nos analisá vários teksto bíbliko ku ta papia di e kurason, nos por haña sa kiko e kurason figurativo ta.

4. (a) Kiko e kurason figurativo ta? (b) Kiko Hesus kier a bisa ku e palabranan ku el a ekspresá na Mateo 22:37?

 ⁴ Eskritornan di Beibel a usa e palabra “kurason” pa deskribí e persona ku nos ta di paden, loke ta enserá nos karakter, deseo, pensamentu, aktitut, kapasidat, motivashon i metanan. (Lesa Deuteronomio 15:7; Proverbionan 16:1; Echonan 2:26.) Pero tin biaha, e palabra “kurason” no ta referí na tur e kosnan ei. Tuma por ehèmpel ora Hesus a bisa: “Stima Yehova bo Dios ku henter bo kurason, ku henter bo alma i ku henter bo mente.” (Mat. 22:37) Akinan, e palabra “kurason” ta referí na un persona su emoshon-, deseo- i sintimentunan. Hesus a menshoná kurason, alma i mente kada un riba nan mes pa enfatisá e echo ku nos mester demostrá nos amor pa Dios den e manera ku nos ta sinti, hiba nos bida i usa nos mente. (Huan 17:3; Efe. 6:6) Pero ora Beibel ta menshoná e palabra “kurason” riba su so, e ta referí na henter e persona ku nos ta di paden.

DIKON NOS TIN KU PROTEHÁ NOS KURASON?

5. Dikon nos mester hasi nos máksimo esfuerso pa sirbi Yehova ku henter nos kurason?

⁵ Rei David a bisa Sálomon: “Mi yu Sálomon, konosé e Dios di bo tata, i sirbié ku henter bo kurason i ku un alma boluntario; pasobra SEÑOR ta skrudiñá tur kurason i ta komprondé tur intenshon di e pensamentunan.” (1 Kró. 28:9) Sí, Yehova ta Esun ku ta sondia, òf saminá, tur kurason, inkluso esun di nos. (Pro. 17:3; 21:2) I loke e ta mira den nos kurason ta determiná si nos por tin un bon relashon kuné i un futuro briante. P’esei, nos tin bon motibu pa sigui e konseho di David i sigui hasi tur loke nos por pa sirbi Yehova ku ‘henter nos kurason.’

6. Kiko nos mester ta konsiente di dje?

⁶ E manera zeloso ku nos ta kumpli ku nos aktividatnan teokrátiko ta mustra ku nos ke sirbi Yehova di henter nos kurason. Pero na mes momento, nos ta konsiente tambe ku e mundu malbado di Satanas i nos inklinashonnan pekaminoso por influensiá nos i stroba nos di sirbi Dios ku henter nos kurason. (Yer. 17:9; Efe. 2:2) Pues, pa evitá ku esaki ta sosodé, nos mester saminá nos kurason regularmente. Kon nos por hasi esei?

7. Kiko ta revelá e kondishon di nos kurason?

⁷ Ningun hende no por mira kiko tin den kurason di otro persona, meskos ku nos no por mira kurason di un palu. No opstante, den Hesus su Sermon Riba Seru, el a indiká ku meskos ku fruta ta revelá e kondishon di un palu, hende su echonan ta revelá e berdadero kondishon di nan kurason. (Mat. 7:17-20) Laga nos konsiderá ún di e echonan ei.

UN MANERA PA SAMINÁ NOS KURASON

8. Segun Hesus su palabranan na Mateo 6:33, kon nos por demostrá loke tin den nos kurason?

⁸ Den e mesun sermon ei, Hesus a bisa su oyentenan kiko nan mester a hasi pa demostrá ku nan ke sirbi Yehova di henter nan kurason. El a bisa: “Sigui buska anto promé e Reino i e hustisia di Dios, i lo e duna boso tur e kosnan akí.” (Mat. 6:33) Pues, loke nos ta pone na promé lugá den nos bida ta revelá loke tin den nos kurason, esta, nos deseo-, pensamentu- i plannan. P’esei, un bon manera pa saminá nos mes i wak si nos ta sirbiendo Yehova ku henter nos kurason ta di analisá nos prioridatnan.

9. Ki invitashon Hesus a ekstendé na algun hòmber, i kiko nan reakshon a demostrá?

 ⁹ Poko tempu despues ku Hesus a urgi su siguidónan pa “sigui buska . . . promé e Reino” a sosodé algu ku ta mustra ku loke hende ta pone na promé lugá den nan bida en bèrdat ta revelá loke tin den nan kurason. Lukas, un eskritor di Evangelio, a relatá e suseso akí. El a bisa ku Hesus tabata “determiná pa bai Herúsalèm” maske e tabata sa kiko tabata sper’é einan. Anto ora Hesus i su apòstelnan “tabata riba kaminda,” el a topa algun hòmber i a bisa nan: “Sigui mi.” E hòmbernan ei tabata dispuesto pa bira Hesus su disipel—pero bou di sierto kondishon. Ún di nan a kontestá: “Permití mi bai dera mi tata promé.” Un otro a bisa: “Mi ta sigui bo, Señor, ma permití mi yama mi hendenan di kas ayó promé.” (Luk. 9:51, 57-61) Bo a mira e diferensia? Hesus tabata determiná pa hasi e boluntat di Dios di henter su kurason, pero e hòmbernan ei a bini ku èksküs flou pa no aseptá Hesus su invitashon. Nan a pone nan interes promé ku e Reino; asina nan a demostrá ku nan no tabata dispuesto pa sirbi Dios ku henter nan kurason.

10. (a) Kon nos a reakshoná na e invitashon di Hesus pa bira su disipel? (b) Ki ilustrashon Hesus a duna?

¹⁰ Distinto for di e hòmbernan ei, nos sí a aseptá e invitashon di Hesus pa ta su siguidó i ta sirbi Yehova tur dia. Asina nos ta demostrá ku nos ta stima Yehova. No opstante, nos kurason por ta na peliger maske nos ta aktivo den kongregashon. Kon asina? Wèl, den e mesun kòmbersashon ku Hesus tabatin ku e hòmbernan ku el a invitá pa bira su disipel, el a revelá kiko lo por ta un peliger pa nos ora el a bisa: “Ningun hende ku pone su man na plug i wak patras no ta apto pa drenta e Reino di Dios.” (Luk. 9:62) Kiko nos ta siña for di e ilustrashon akí?

“PEGA NA LOKE TA BON”

11. Kiko a para di e trabou di e plugdó den e ilustrashon di Hesus, i dikon?

¹¹ Pa nos por haña un mihó komprondementu di e lès tras di e ilustrashon di Hesus, laga nos agregá algun detaye. Ban bisa ku miéntras e trahadó ta plug, e ta blo pensa riba su kas. Dikon? Pasobra na kas e tin su famia i amigunan ku e por pasa un ratu ameno kuné; e por disfrutá di músika, un plato di kuminda i asta skonde pa solo. E ta anhelá e kosnan akí. Ma e ta sigui plug i ta kubri basta un pida di e tereno. Pero debí ku su anhelo pa e kosnan plasentero di bida ta bira asina fuerte, e ta “wak patras.” E ta ser distraí i, komo ku falta hopi pa kaba di sembra e tereno, su trabou ta sufri. Ta klaru ku e doño ta keda desapuntá debí na e trahadó su falta di perseveransia.

12. Kon un kristian awe por ta den e mesun situashon ku e trahadó den e ilustrashon di Hesus?

¹² Laga nos wak awor kon esaki por sosodé den nos tempu. E trahadó por ta kualke kristian. Aparentemente kos ta bai bon ku e kristian akí den sentido spiritual, pero en realidat su relashon ku Yehova ta na peliger. Laga nos bisa ku ta trata di un ruman hòmber ku ta masha zeloso den e trabou di prediká i ku ta asistí na tur reunion kristian. Sinembargo, konstantemente e ta pensa riba sierto kosnan di e mundu akí ku ta atraé. Pues, den profundidat di su kurason, e ta anhelá e kosnan akí. Ku tempu, despues di a sirbi Yehova pa vários aña, su deseo pa algun di e kosnan akí ta bira asina fuerte ku e ta “wak patras.” I aunke tin hopi di hasi ainda  den e trabou di prediká, e no ta “tene un gara firme riba e palabra di bida” i su sirbishi ta sufri. (Flp. 2:16) Yehova, e “Doño di e kosecha,” ta bira tristu ora su trahadónan ta mustra un falta di perseveransia asina.—Luk. 10:2.

13. Kiko sirbi Yehova ku henter nos kurason ta enserá?

¹³ E lès ta kla i komprendibel. Sirbi Yehova ku henter nos kurason ta enserá muchu mas ku asistí regularmente na nos reunionnan i partisipá den sirbishi. (2 Kró. 25:1, 2, 27) Si un kristian, profundamente den su kurason, ta sigui stima sierto kosnan di mundu—ku otro palabra, ta sigui “wak patras”—e ta kore riesgo di daña su bon relashon ku Dios. (Luk. 17:32) Pues, pa nos por ta “apto pa drenta e Reino di Dios,” nos mester “odia loke ta malu” i “pega na loke ta bon.” (Luk. 9:62; Rom. 12:9) P’esei, nos tur mester ta determiná pa no laga nada den e mundu di Satanas, maske kon útil òf plasentero esaki por parse, stroba nos di sirbi Dios ku henter nos kurason.—2 Kor. 11:14; lesa Filipensenan 3:13 i 14.

KEDA ALERTA!

14, 15. (a) Kon Satanas ta purba influensiá nos kurason? (b) Ilustrá dikon e método ku Satanas ta usa ta peligroso.

¹⁴ Amor pa Yehova a motivá nos pa dediká nos bida na dje. I for di e tempu ei padilanti, hopi di nos a demostrá ku nos ta determiná pa sigui sirbi Yehova ku henter nos kurason. Sinembargo, Satanas no a entregá: Ainda e ta purba di influensiá nos kurason. (Efe. 6:12) Anto e sa ku no ta diripiente un kristian ta stòp di sirbi Yehova. P’esei mes na un manera astuto, e ta usa “e mundu akí” pa gradualmente mengua nos zelo pa sirbi Dios. (Lesa Marko 4:18 i 19; wak e nota tambe.) Dikon e método ei di Satanas ta asina efikas?

¹⁵ Un ilustrashon por yuda nos kontestá e pregunta akí. Imaginá bo ku bo ta lesando un buki den un kamber ku tin bon lus, pero diripiente e pera di lus ta kima. Komo ku bo a keda den skuridat, bo ta komprondé mesora ta kiko a pasa i bo ta kambia e pera. Bo ta haña lus atrobe. E siguiente anochi,  bo ta bolbe sinta lesa den e mesun kamber ei. Awor imaginá bo ku, sin ku bo sa, un hende a kambia e pera di 100 wòt pa un di 95 wòt. Lo bo nota e diferensia? Probablemente nò. Awor kiko si e siguiente dia nan bolbe kambia e pera di lus, pero awor pa un di 90 wòt? Probablemente, lo bo no ripará esei tampoko. Dikon nò? Pasobra ta gradualmente e lus a bira dòf, sin ku bo a ripará esei. Di mes manera, e influensia ku e mundu di Satanas ta ehersé riba nos por pone nos zelo mengua tiki tiki. Ta komo si fuera Satanas a logra baha e zelo di 100 wòt ku nos tabatin pa Yehova su sirbishi na ménos watt. I si un kristian no ta alerta, lo e no ripará e kambio gradual ei mes.—Mat. 24:42; 1 Ped. 5:8.

ORASHON TA MASHA IMPORTANTE

16. Kon nos por protehá nos mes kontra e trampanan di Satanas?

¹⁶ Awor, kon nos por protehá nos mes kontra e trampanan di Satanas i sigui sirbi Yehova di henter nos kurason? (2 Kor. 2:11) Orashon ta masha importante. Pablo a animá su kompañeronan kristian pa nan “para firme kontra e trampanan di Diabel.” Despues el a urgi nan pa ‘sigui resa tur ora bai, usando tur forma di orashon i súplika.’—Efe. 6:11, 18; 1 Ped. 4:7.

17. Kiko nos ta siña for di e orashonnan di Hesus?

¹⁷ Pa nos por para firme kontra Satanas, nos mester imitá Hesus i su deseo di sirbi Yehova di henter kurason. Wak por ehèmpel kiko Lukas a skirbi tokante e manera ku Hesus a hasi orashon riba e último anochi promé ku su morto: “Komo ku el a drenta den un ansha, el a sigui hasi orashon ku mas fervor ainda.” (Luk. 22:44) No ta promé biaha ku Hesus a hasi orashon ku fervor, pero e biaha akí, e tabata a punto di pasa den e prueba di mas difísil den su bida riba tera, p’esei, el a hasi orashon “ku mas fervor ainda.” I Dios a kontestá su orashon. E ehèmpel di Hesus ta mustra ku un orashon por ta mas intenso ku un otro. Pues, segun ku nos pruebanan ta bira mas difísil i e influensia di Satanas mas fuerte, nos tambe mester resa “ku mas fervor ainda” i pidi Yehova su protekshon.

18. (a) Kiko nos mester puntra nos mes enkuanto nos orashonnan, i dikon? (b) Menshoná algun faktor ku tin efekto riba nos kurason i den ki manera nan por hasi esaki. (Wak e  kuadro na página 22.)

¹⁸ Ki efekto orashon ku fervor por tin riba nos? Pablo a bisa: “Den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason.” (Flp. 4:6, 7) Pues, si nos ke sigui sirbi Yehova ku henter nos kurason, nos mester hasi orashon regularmente i ku fervor. (Luk. 6:12) P’esei, puntra bo mes: ‘Ku ki frekuensia mi ta hasi orashon? Kon intenso mi orashonnan ta?’ (Mat. 7:7; Rom. 12:12) Bo kontesta lo revelá kon fuerte bo deseo pa sirbi Dios ta.

19. Kiko abo lo hasi pa bo por sigui sirbi Yehova ku henter bo kurason?

¹⁹ Manera nos a mira, nos prioridatnan ta revelá loke nos tin den nos kurason. P’esei, nos no mester laga niun di e kosnan ku nos a laga atras ni e trampanan sutil di Satanas stroba nos di sirbi Yehova ku henter nos kurason. (Lesa Lukas 21:19, 34-36.) P’esei, laga nos kada un, meskos ku David, sigui supliká Yehova: “Uni mi kurason.”—Sal. 86:11.

[Preguntanan di Estudio]

[Kuadro na página 22]

Tres Faktor Importante pa Mantené Nos Kurason Salú

Meskos ku nos ta hasi esfuerso pa kuida nos kurason literal, nos mester kuida nos kurason figurativo tambe. At’akí tres faktor importante pa logra esei:

1 Nutrishon: Pa nos por mantené nos kurason literal den bon salú, nos mester alimentá nos mes ku sufisiente kuminda saludabel. Den sentido spiritual ta meskos: Nos mester alimentá nos mes bon. Kon nos por hasi esei? Nos mester studia Beibel i meditá riba loke nos ta studia regularmente i tambe asistí na tur nos reunionnan.—Sal. 1:1, 2; Pro. 15:28; Heb. 10:24, 25.

 2 Ehersisio: Pa nos kurason literal por keda salú, ratu-ratu e mester pòmp mas duru; p’esei, nos mester hasi ehersisio. Di mes manera, ora nos ta partisipá zelosomente den e trabou di prediká—kisas, hasiendo esfuerso pa oumentá nos sirbishi—nos ta mantené nos kurason figurativo den bon kondishon.—Luk. 13:24; Flp. 3:12.

3 Ambiente: E ambiente malbado den kua nos tin ku traha i biba awe por pone tantu nos kurason literal komo esun figurativo bou di hopi strès. No opstante, nos por redusí e strès ei. Kon? Nos tin ku asosiá mas tantu posibel ku nos kompañeronan kristian, kendenan sinseramente ta interesá den nos i ta sirbi Yehova di henter kurason.—Sal. 119:63; Pro. 13:20.