Yehova Ta Protehá Nos pa Salbashon
‘Dios ta protehá boso pa medio di su poder pasobra boso tin fe pa un salbashon ku ta kla pa keda revelá den tempu di fin.’—1 PED. 1:5.
1, 2. (a) Ki siguransa nos tin ku Dios lo yuda nos keda fiel te na fin? (b) Kon bon Yehova konosé kada un di nos?
“ESUN ku perseverá te na fin ta esun ku lo ser salbá.” (Mat. 24:13) Ku e palabranan akí, Hesus a mustra bon kla ku si nos ke sobrebibí e destrukshon di e mundu di Satanas, nos mester keda fiel te na fin. Pero Yehova no ta ferwagt pa nos dependé riba nos mes forsa ni nos sabiduria pa logra esaki. Kon nos por sa esei? Beibel ta bisa ku “Dios ta fiel na su palabra, i lo e no laga boso pasa den un tentashon ku boso no por soportá, ma ora e tentashon presentá, lo e perkurá tambe pa e salida, a fin ku boso por want’é.” (1 Kor. 10:13) Kiko e promesa akí ta enserá?
2 Wèl, ku Yehova lo no laga nos pasa den un tentashon ku nos no por soportá. E por evitá esei, pasobra e konosé nos bon. E sa ki problema nos tin, ki klase di persona nos ta i tambe kuantu nos por soportá. Pero di bèrdat Dios konosé nos asina bon? Sí. E Skritura ta bisa ku Yehova konosé kada un di nos profundamente. E sa ki rutina i kustumbernan nos tin. E por asta lesa nos pensamentunan i wak kiko tin den nos kurason.—Lesa Salmo 139:1-6.
3, 4. (a) Kon e eksperensia di David ta mustra ku Dios ta interesá den kada un di nos? (b) Kon Yehova ta demostrá interes den hende awe?
3 Di bèrdat e Dios Todopoderoso tin asina tantu interes den nos, siendo ku hende ta insignifikante? Salmista David a pensa profundamente riba e pregunta akí; el a puntra Yehova: “Ora mi kontemplá bo shelunan, e obra di bo dedenan, e luna i e streanan ku abo a establesé, ta kiko hende ta, ku bo ta kòrda di dje?” (Sal. 8:3, 4) Kisas, ta e echo ku Yehova a mustra interes den David a motiv’é pa hasi e pregunta ei. Pa Yehova, David tabata ‘un hòmber konforme Su kurason.’ P’esei el a skohe é, e yu hòmber di mas chikitu di Isaí, un hóben wardadó di karné, pa bira “gobernante” di Israel. (1 Sam. 13:14; 2 Sam. 7:8) Bo por imaginá bo kon David lo mester a sintié ora el a realisá ku e Kreador di universo a presta atenshon na e pensamentu- i sintimentunan di un simpel hóben wardadó di karné?
4 E interes personal ku Yehova ta mustra den nos awe tambe ta masha remarkabel. For di ‘tur nashon,’ e ta reuniendo personanan “deseabel” den su bista pa bira parti di su organisashon i ta yuda nan mantené nan integridat. (Hag. 2:7, NW) Pero kon Yehova ta yuda nos mantené nos integridat? Wèl, promé ku nos kontestá e pregunta akí, ta bon pa nos komprondé promé kon Yehova ta hala hende na su organisashon.
DIOS A HALA NOS
5. Kon Yehova ta hala hende na su Yu? Ilustrá.
5 Hesus a bisa: “Ningun hende no por bini serka mi a ménos ku e Tata, ku a manda mi, hal’é serka mi.” (Huan 6:44) Pues, pa nos por bira un disipel di Kristu, nos mester di Dios su yudansa. Awor, kon Yehova ta hala hende semehante di karné serka su Yu? Esei ta pa medio di spiritu santu i e predikashon di e bon notisia. At’akí un ehèmpel: Ora Pablo i su kompañeronan misionero tabata den Filipo, nan a topa un muhé ku yama Lidia i a kompartí e bon notisia kuné. Beibel ta bisa ku “Yehova a habri su kurason kompletamente pa e aseptá e kosnan ku Pablo tabata papia.” Sí, Dios a usa su spiritu santu pa yuda Lidia komprondé e mensahe di Reino. E resultado tabata ku Lidia i tur e hendenan di su kas a batisá.—Echo. 16:13-15.
6. Kon Dios a hala nos tur na su organisashon?
6 Ta Lidia so Yehova a hala na su organisashon? Klaru ku nò. Si bo ta un kristian batisá, Dios a hala abo tambe na su organisashon, esta na e adorashon berdadero. Meskos ku nos Tata selestial a mira algu bon den kurason di Lidia, el a mira algu bon den abo tambe. Kon nos por sa esei? Wèl, ora bo a kuminsá skucha e bon notisia, Yehova, pa medio di su spiritu santu, a yuda bo komprondé e mensahe. (1 Kor. 2:11, 12) Ora bo a kuminsá hasi esfuerso pa kumpli ku Yehova su boluntat, el a bendishoná bo. I ora bo a dediká bo bida na dje, bo a hasié kontentu. Sí, for di e dia ku bo a kuminsá kana riba e kaminda pa bida, Yehova ta ku bo.
7. Kon nos por sa ku Dios lo yuda nos keda fiel?
7 Unabes ku Yehova a yuda nos bira su Testigu, nos por tin sigur ku lo e yuda nos keda fiel. E sa ku no ta di nos mes nos a bini den e bèrdat i ku nos mester di su yudansa pa keda den e bèrdat. Den un karta ku Apòstel Pedro a skirbi e kristiannan ungí, el a bisa nan ku “Dios ta protehá [nan] pa medio di Su poder” pa nan por keda fiel. (1 Ped. 1:5) Bon mirá, loke Pedro a bisa e kristiannan ungí ta konta pa tur kristian. Pero, kon Yehova ta protehá nos awe? Nos ta interesá den e kontesta pa e pregunta ei pasobra nos tur mester di Dios su yudansa pa keda fiel na dje.
DIOS POR EVITÁ NOS DI HASI PIKÁ
8. Kiko por pone nos kometé eror?
8 Problemanan di bida ku nos ta konfrontá i nos imperfekshon por pone nos pèrdè nos enfoke spiritual i, promé ku nos realisá, kometé un eror. (Lesa Galationan 6:1.) Esei ta loke a pasa ku David.
9, 10. Kon Yehova a evitá ku David lo a kometé un eror, i kon Yehova ta yuda nos awe?
9 Tempu ku Rei Saul tabata persiguí David, David a desplegá gran dominio propio i no a tuma represaya kontra e rei yalurs akí. (1 Sam. 24:2-7) Pero djis un poko tempu despues, David no por a dominá su mes. Ta asina ku e tabatin mester di kuminda i awa pa su hòmbernan, i respetuosamente el a akudí na un otro israelita ku yama Nabal pa yudansa. Nabal a insult’é i a nenga di yud’é. Esaki a pone David rabia asina tantu ku e kier a tuma vengansa riba tur e hòmbernan di e kas di Nabal. E no a para ketu i pensa ku, den Yehova su bista, lo el a bira kulpabel di dramamentu di sanger inosente. Pero Abigail, kasá di Nabal, a intervení nèt na ora i a evitá ku David ta kometé e eror grave ei. David a realisá ku ta Yehova su man tabata den e asuntu; p’esei el a bisa Abigail: “Bendishoná sea e SEÑOR Dios di Israel, kende a manda bo e dia akí pa kontra ku mi, i bendishoná sea bo disernimentu, i bendishoná sea abo mes, kende a kita mi awe di drama sanger i di tuma vengansa pa mi mes ku mi mes man.”—1 Sam. 25:9-13, 21, 22, 32, 33.
10 Ki lès nos por siña for di e relato akí? Wèl, meskos ku Yehova a usa Abigail pa evitá David di kometé un eror, e por yuda nos tambe. Klaru ku nos no ta spera ku Yehova lo manda hende intervení kada bes ku nos ta a punto di kometé un eror. Ni nos no sa eksaktamente kon Yehova lo obra den sierto situashon òf kiko lo e permití pa su propósito kumpli. (Ekl. 11:5) No opstante, nos por tin konfiansa ku semper Yehova ta na haltura di nos situashon i ku lo e yuda nos keda fiel na dje. E ta sigurá nos: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” (Sal. 32:8) Awor, kon Yehova ta konsehá nos? Kon nos por benefisiá di su konseho? Dikon nos por tin konfiansa ku Yehova ta guia su pueblo awe? Wak kon e buki di Revelashon ta kontestá e preguntanan akí.
SU KONSEHONAN TA PROTEHÁ NOS
11. Kon bon Yehova konosé e kongregashonnan?
11 Den e vishon registrá na kapítulo 2 i 3 di e buki di Revelashon, Rei Hesukristu ta inspekshoná e shete kongregashonnan di Asia Menor. Durante e inspekshon akí, Kristu no solamente ta wak e situashon general di e kongregashonnan pero kosnan spesífiko tambe. Sí, den algun kaso e ta asta menshoná nòmber di algun persona. Ademas, e ta duna tur e kongregashonnan e elogio i konseho nesesario. Kiko e vishon akí ta nifiká pa nos? Wèl, e shete kongregashonnan ta representá e kristiannan ungí despues di 1914, i en prinsipio, e konseho ku Hesus a duna e shete kongregashonnan ta konta pa tur kongregashon na mundu awe. Pues, nos por bisa ku Yehova ta guia su pueblo awe pa medio di su Yu. Kon nos por benefisiá di e guia akí?
12. Kon nos por permití Yehova guia nos pasonan?
12 Un manera ku nos por benefisiá di Yehova su guia amoroso ta mediante estudio personal. Yehova ta proveé un abundansia di konseho bíbliko mediante e publikashonnan ku nos ta risibí di e esklabo fiel i prudente. (Mat. 24:45) Sinembargo, pa nos por benefisiá di Yehova su konsehonan, nos mester saka tempu pa studia e publikashonnan i apliká loke nos siña. Sí, estudio personal ta un di e medionan ku Yehova ta usa pa ‘protehá nos pa nos no trompeká.’ (Hudas 24) Bo no a yega di studia algu den nos literatura ku ta komo si fuera ta pa bo mes nan a skirbié? Si ta asina, asept’é komo un konseho ku ta bini di Yehova. Yehova ta manera un amigu ku ta tek bo riba bo skouder pa hala bo atenshon. E por usa su spiritu santu pa hala bo atenshon na un aspekto di bo kondukta òf personalidat ku bo mester traha riba dje. Anto ora nos ta sigui guia di Dios su spiritu santu, nos ta permití Yehova guia nos pasonan. (Lesa Salmo 139:23 i 24.) Pues, ta bon pa nos analisá e manera ku nos ta studia i wak kuantu tempu nos ta dediká na nos estudio.
13. Dikon ta sabí pa analisá nos kustumber di studia?
13 Si nos ta dediká hopi tempu na entretenimentu, nos lo no sobra tempu pa hasi estudio personal. Un ruman hòmber a bisa ku “ta masha fásil pa keda sin hasi estudio personal.” Dikon? El a splika: ‘Kompará ku ántes, awendia tin mas manera pa entretené bo mes i mas barata tambe. Bo por wak televishon, usa bo kòmpiuter òf telefòn pa entretené bo mes. Unda ku bo bira tin entretenimentu.’ P’esei, si nos no tene kuidou, mas i mas di e tempu ku nos tin ku usa pa estudio personal profundo ta bai na entretenimentu te ku nos no ta sobra tempu mas pa studia. (Efe. 5:15-17) Ta bon pa kada un di nos puntra nos mes: ‘Mi ta saka tempu regularmente pa studia e kosnan profundo di e Palabra di Dios? Òf ta ora mi tin diskurso òf un parti na reunion so mi ta hasi esei?’ Si ta asina, kisas nos tin ku hasi mihó uso di e anochi pa Adorashon Komo Famia òf pa estudio personal pa studia Beibel mas profundo. Di e manera ei, nos por atkerí sabiduria spiritual di Yehova ku por protehá nos i yuda nos keda fiel te na fin.—Pro. 2:1-5.
ANIMASHON DI OTRONAN TA YUDA NOS PERSEVERÁ
14. Kon Beibel ta mustra ku Yehova tin atenshon pa loke nos ta sinti?
14 David a enfrentá hopi situashon difísil den bida. (1 Sam. 30:3-6) No opstante, su palabranan skirbí bou di inspirashon ta revelá ku Yehova tabata sa kon e tabata sintié. (Lesa Salmo 34:18; 56:8.) Pues, Yehova sa tambe kon nos sa sinti nos mes. E solo echo ku nos sa ku Yehova ta mira i ta serka nos ora nos ta sinti nos “abatí” òf “kibrá” ta un konsuelo pa nos. Ta esei a konsolá David, kende a kanta: “Lo mi regosihá i keda kontentu den bo miserikòrdia, pasobra bo a mira mi aflikshon; bo tabata sa di e angustianan di mi alma.” (Sal. 31:7) Pero Yehova ta hasi mas ku djis tuma nota di nos angustia. E ta duna nos konsuelo i animashon pa yuda nos perseverá. Un manera ku e ta hasi esei ta mediante nos reunionnan.
15. Ki lès nos por siña for di e eksperensia di Asaf?
15 E eksperensia di e salmista Asaf ta yuda nos mira ún di e benefisionan di asistí na nos reunionnan. Asaf tabata pensa asina tantu riba e inhustisia ku tabata reina den su tempu ku el a kuminsá duda si tabata bale la pena sirbi Dios i a bira desanimá. El a bisa: “Mi kurason tabata yen di amargura, i mi tabata kunsumí te den mi higra.” Asaf su sintimentunan a pone ku kasi el a stòp di sirbi Yehova. Pero kiko a yuda Asaf bini na su sano huisio? El a bisa: “Mi a drenta den e santuario di Dios.” Ei, huntu ku otro adoradónan di Yehova, el a bin mira e asuntu for di e punto di bista korekto. El a bin komprondé ku e éksito di e malbadonan tabata temporal i ku na su debido tempu Yehova lo a rektifiká asuntunan. (Sal. 73:2, 13-22) Tin biaha, nos tambe por sinti nos manera Asaf. E inhustisia den e mundu di Satanas por desanimá nos. Pero ora nos reuní huntu ku nos rumannan den fe, nos ta haña e ánimo i e yudansa ku nos tin mester pa sigui sirbi Yehova ku goso.
16. Kon e ehèmpel di Ana por yuda nos?
16 Awor, kiko si surgi algu ku ta hasié difísil pa bo asistí na bo reunionnan di kongregashon? Kisas bo tin bèrgwensa di bai reunion pasobra bo a pèrdè un privilegio di sirbishi. Òf bo tin un problema ku un ruman. Si esei ta e kaso, kisas e eksperensia di Ana por yuda bo. (Lesa 1 Samuel 1:4-8.) Ana tabata sintié masha desanimá i afligí debí na un problema familiar ku Penina. Tur aña, ora nan tabatin ku bai Silo pa ofresé sakrifisio na Yehova komo famia, e situashon tabata bira mas difísil pa Ana. Ana tabata asina afligí ku “e tabata yora i no tabata kome.” No opstante, e no a laga e situashon akí strob’é di bai adorá Yehova. Yehova a mira su fieldat i a bendishon’é.—1 Sam. 1:11, 20.
17, 18. (a) Den ki manera nos ta risibí animashon na nos reunionnan di kongregashon? (b) Kon abo ta sinti ora bo pensa riba e manera tierno ku Yehova ta kuida nos pa nos haña salbashon?
17 Kristiannan awe tin bon motibu pa imitá e ehèmpel di Ana i sigui asistí fielmente na nan reunionnan. Manera nos tur sa, nos reunionnan ta un fuente di animashon. (Heb. 10:24, 25) Ei nos ta haña e amor di nos rumannan ku ta konsolá nos. Kisas, un kos chikitu ku nos a tende durante un diskurso òf un komentario ta konmové nos kurason. Podisé promé òf despues di reunion, nos ta kòmbersá un ratu ku un ruman ku ta skucha nos ku atenshon òf ta bisa nos algu ku ta animá nos. (Pro. 15:23; 17:17) Ademas, ora nos kanta huntu na Yehova, nos ta sinti nos animá. Nos tur—spesialmente ora nos ta kargá ku ‘preokupashon’—tin mester di e animashon ku nos ta haña na nos reunionnan kristian. Ta na e reunionnan akí, Yehova ta sòru pa nos haña e fortalesa i ‘konsuelo’ ku nos tin mester pa keda fiel na dje.—Sal. 94:18, 19.
18 Nos ta masha gradisidu ku Yehova ta protehá nos i ta yuda nos perseverá te na fin. Yehova su kuido amoroso ta duna nos e mesun konfiansa ku e salmista Asaf, kende a kanta: “Bo a kohe mi man drechi tene. Ku bo konseho lo bo guia mi.” (Sal. 73:23, 24)
[Preguntanan di Estudio]
[Plachi na página 29]
Yehova a hala abo tambe
[Plachi na página 30]
Nos ta disfrutá di Dios su protekshon ora nos ta sigui su konseho
[Plachi na página 31]
Animashon ta yuda nos perseverá
