“Nos . . . ta reflehá manera spil e gloria di Yehova.”—2 KOR. 3:18.

1, 2. Dikon ta rasonabel pa pensa ku nos por imitá e kualidatnan di Yehova?

DEN un òf otro manera, nos tur tin algu di nos mayornan. P’esei, no ta nada straño si nos tende un hende bisa un mucha hòmber: ‘Bo ta meskos ku bo tata,’ òf si nan bisa un mucha muhé: ‘Bo ta hasi mi kòrda bo mama.’ I hopi bes, muchanan ta purba di imitá nan mayornan. Awor, kiko di nos? Nos por imitá nos Tata selestial Yehova? Wèl, aunke nos nunka a yega di mira Yehova, nos por siña di su kualidatnan presioso. Kon nos por hasi esei? Nos tin ku opservá su kreashon, studia su Palabra i meditá riba loke e Skritura ta bisa—spesialmente riba e palabra- i echonan di su yu Hesukristu. (Huan 1:18; Rom. 1:20) Pues, nos por reflehá e gloria di Yehova.

² Promé ku Yehova a krea Adam ku Eva, e tabata sa ku hende por a kumpli ku su boluntat, imitá su kualidatnan i dun’é gloria, esta, onr’é ku nan kondukta. (Lesa Génesis 1:26, 27.) Komo kristian, nos tin ku imitá e kualidatnan di Esun ku a krea nos. Si nos ta hasi esei, nos tin e gran privilegio di por reflehá e gloria di Dios. Sí, sea kual sea nos kultura, edukashon òf rasa, nos tur por reflehá e gloria di Dios. Dikon? Pasobra “Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.”—Echo. 10:34, 35.

3. Ki kristiannan ta sinti ora nan ta sirbi Yehova?

³ Kristiannan ungí ta reflehá e gloria di Yehova. P’esei, apòstel Pablo, kende tambe tabata ungí ku spiritu santu, a skirbi: “Nos tur—miéntras ku nos kara sin velo ta reflehá manera spil e gloria di Yehova—ta keda transformá den su imágen for di un sierto grado di gloria pa un otro grado di gloria.” (2 Kor. 3:18) E konteksto ta mustra ku Pablo tabata papia di e tempu  ku Moises a baha for di Seru Sion ku e tablanan ku tabatin e Dies Mandamentunan riba dje; Moises su kara tabata bria pasobra Yehova a papia kuné. (Éks. 34:29, 30) Aunke kristiannan nunka tabatin un eksperensia asina ni nan kara no ta bria literalmente manera esun di Moises, nan kara ta bria di goso ora nan ta papia tokante Yehova, tokante su kualidatnan i di su propósito maravioso pa humanidat. Pues, sea ku nos ta kristian ungí òf miembro di e otro karnénan, nos por reflehá e gloria di Yehova den nos bida i den nos sirbishi meskos ku spil di metal ku hende tabata pòlish den pasado. (2 Kor. 4:1) Abo ta reflehá e gloria di Yehova mediante un kondukta deboto i mediante bo partisipashon regular den e trabou di prediká?

NOS KE REFLEHÁ E GLORIA DI YEHOVA

4, 5. (a) Ki lucha similar na esun di Pablo nos tin awe? (b) Kon piká ta afektá nos?

⁴ Komo ku nos ta sirbidó di Yehova, ta klaru ku nos ke reflehá e gloria di nos Kreador den tur loke nos ta hasi. Ma hopi bes nos ta faya. Pablo tambe tabatin e problema ei. (Lesa Romanonan 7:21-25.) P’esei, e por a splika bon kla dikon nos tin e lucha ei; el a bisa: “Pasobra tur a peka i no por reflehá e gloria di Dios.” (Rom. 3:23) Sí, debí ku hende a heredá imperfekshon for di Adam, nos tur a bira esklabo di e “rei” kruel ku ta piká.—Rom. 5:12; 6:12.

⁵ Kiko ta piká? Piká ta tur loke un persona ta hasi kontrali na Yehova su personalidat, kaminda, norma i boluntat. Piká ta daña un persona su relashon ku Dios. E ta pone nos hera e marka, meskos ku un tiradó di flecha ta keda sin alkansá su blanko. Nos por hasi piká intenshonalmente òf inkonsientemente. (Num. 15:27-31) Piká ta profundamente ankrá den hende i ta forma un barera entre nos i nos Kreador. (Sal. 51:5; Isa. 59:2; Kol. 1:21) P’esei, mayoria di hende ta biba na un manera kompletamente alehá for di Yehova i no tin e privilegio maravioso di por reflehá e gloria di Dios. No tin duda, piká ta e kos ku mas ta afektá humanidat.

6. Dikon nos por reflehá e gloria di Dios aunke nos ta imperfekto?

⁶ Aunke nos a nase ku piká, Yehova ‘ta duna nos speransa.’ (Rom. 15:13) El a perkurá e medio pa eliminá piká—e sakrifisio di reskate di Hesukristu. Pero pa nos por stòp di ta “esklabo di piká,” nos tin ku pone fe den e sakrifisio ei. E ora ei, nos ta den e posishon pa reflehá e gloria di Yehova i sera un amistat kuné. (Rom. 5:19; 6:6; Huan 3:16) Anto si nos mantené e amistat ei, nos por ta sigur ku Yehova lo bendishoná nos awor i ku den futuro nos lo ta personanan perfekto ku lo biba pa semper. Pues, komo hende imperfekto, nos tin un gran onor! Dikon? Pasobra apesar di nos kondishon, den bista di Yehova nos por reflehá su gloria!

KIKO TA YUDA NOS REFLEHÁ E GLORIA DI DIOS?

7. Kiko nos tin ku rekonosé pa nos por reflehá e gloria di Dios?

⁷ Komo hende imperfekto, nos tur tin debilidat. P’esei, pa nos por reflehá e gloria di Dios, nos kada un mester ta onesto ku nos mes i rekonosé ku nos ta pekadó. (2 Kró. 6:36) Sí, nos tin ku sa kiko ta nos debilidatnan pa nos por traha riba nan pa asina nos por duna gloria na Dios. Por ehèmpel, si nos ta wak pornografia, nos tin ku atmití ku nos tin mester di yudansa di e ansianonan—i dal paso pa haña esaki. (Sant. 5:14, 15) Esei ta e promé kos ku nos tin ku hasi si nos ke tin un bida ku ta duna onor na Yehova Dios. Ademas, komo su adoradónan, nos tin ku saminá nos mes konstantemente pa wak si nos ta kumpliendo ku su normanan  hustu. (Pro. 28:18; 1 Kor. 10:12) Sea kual sea nos debilidatnan, nos tin ku sigui lucha pa dominá nan pa nos por reflehá e gloria di Dios.

8. Kiko nos mester hasi maske nos no ta perfekto?

⁸ Hesus tabata e úniko hende ku a yega di biba i muri sin hasi piká. Semper el a agradá Dios i reflehá Su gloria. Ma Hesus tabata perfekto i nos nò. No opstante, nos por i mester sigui hasi esfuerso pa imitá su ehèmpel. (1 Ped. 2:21) No ta nos progreso so Yehova ta wak; e ta wak e esfuersonan tambe ku nos ta hasi pa reflehá su gloria i ta bendishoná esfuerso sinsero.

9. Ki ròl Beibel ta hunga den bida di kristiannan ku ke kumpli ku e rekisitonan di Dios?

⁹ Yehova su Palabra skirbí por yuda nos mira unda nos tin ku mehorá. P’esei, ta masha importante pa nos lesa i studia Beibel i meditá riba loke e ta bisa. (Sal. 1:1-3) Dikon? Pasobra ta ora nos ta lesa Beibel tur dia, nos por haña sa unda nos tin ku hasi kambio. (Lesa Santiago 1:22-25.) Ademas, konosementu di Beibel ta fortalesé nos fe i ta yuda nos evitá piká grave i keda determiná pa agradá Yehova.—Sal. 119:11, 47, 48.

10. Dikon orashon por yuda nos sirbi Yehova mas plenamente?

¹⁰ Un otro kos ku nos mester hasi pa por reflehá e gloria di Yehova ta “perseverá den orashon.” (Rom. 12:12) Nos por i mester hasi orashon na Yehova pidié yuda nos sirbié na un manera ku e ta aseptá. Ta bon pa nos pidié duna nos spiritu santu, mas fe, fortalesa pa resistí tentashon i abilidat pa “manehá e palabra di e bèrdat korektamente.” (2 Tim. 2:15; Mat. 6:13; Luk. 11:13; 17:5) Anto nos mester dependé riba Yehova, nos Tata selestial, meskos ku un yu ta dependé riba su tata. I nos por ta sigur ku si nos pidié yuda nos pa sirbié mas mihó, lo e yuda nos. Nunka nos no mester pensa ku nos ta kans’é. Mas bien, laga nos sigui hasi orashon pa alab’é, gradisié i pidié guia spesialmente ora nos haña nos ku prueba. Ademas, nos por pidi Yehova yuda nos sirbié di tal manera ku nos ta glorifiká su nòmber santu.—Sal. 86:12; Sant. 1:5-7.

11. Kon reunionnan di kongregashon ta yuda nos reflehá e gloria di Dios?

¹¹ Dios a konfia e kuido di su karnénan balioso na “e esklabo fiel i prudente.” (Mat. 24:45-47; Sal. 100:3) E esklabo ta masha interesá den e manera ku su kompañeronan den fe ta reflehá e gloria di Yehova. I un manera ku e esklabo ta yuda nos reflehá e gloria di Dios ta mediante e reunionnan. Nos reunionnan ta yuda nos drecha nos kalidat di bida i mehorá nos kualidatnan kristian, meskos ku un sneiru ta drecha nos paña i mehorá nos aparensia. (Heb. 10:24, 25) P’esei, laga nos yega nos reunionnan na tempu, pasobra si nos tin kustumber di yega lat, nos ta pèrdè parti di e informashon spiritual ku nos tin mester pa mehorá nos bida i nos kualidatnan kristian.

LAGA NOS IMITÁ DIOS

12. Kon nos por imitá Dios?

¹² Si nos ke reflehá e gloria di Yehova, nos tin ku ‘imit’é.’ (Efe. 5:1) I un manera pa imitá Yehova ta di adoptá su punto di bista di kosnan. Si nos ta purba di hasi kosnan na nos manera i no segun Yehova su manera di pensa, nos ta desonr’é i perhudiká nos mes. I komo ku e mundu rònt di nos ta bou di influensia di e malbado, Satanas e Diabel, nos tin ku traha duru pa odia loke Yehova ta odia i stima loke E ta stima. (Sal. 97:10; 1 Huan 5:19) Nos mester ta plenamente konvensí ku e úniko manera pa sirbi Dios na e manera  ku e ta aseptá ta hasiendo tur kos pa su gloria.—Lesa 1 Korintionan 10:31.

13. Dikon nos tin ku odia piká, i kiko esaki lo motivá nos pa hasi?

¹³ Yehova ta odia piká i nos mester hasi meskos. Esei ta nifiká ku nos mester keda mas leu posibel for di tur loke ta malu i no purba wak kon serka nos por yega di piká sin kometé piká. Un di e kosnan ku nos tin ku keda leu for di dje ta apostasia. Dikon? Pasobra si nos bira apóstata, nos no por reflehá e gloria di Dios. (Deu. 13:6-9) P’esei, nos mester keda leu for di hende apóstata òf kualke persona ku ta pretendé di ta nos ruman pero ku ta trese reproche riba e nòmber di Dios. Esaki ta konta asta si ta trata di un miembro di nos famia. (1 Kor. 5:11) Nos no ta gana nada si nos ta purba di refutá argumentonan di hende apóstata òf hende ku ta kritiká Yehova su organisashon. De echo, nos ta pone nos relashon ku Yehova na peliger si nos bai profundisá nos mes den loke nan ta pone riba Internet òf publiká den nan literatura.—Lesa Isaías 5:20; Mateo 7:6.

14. Kua ta un di e maneranan di mas importante pa imitá Yehova, i dikon?

¹⁴ Un di e maneranan di mas importante pa imitá nos Tata selestial ta di demostrá amor. Sí, nos mester demostrá amor meskos ku el a hasi. (1 Huan 4:16-19) De echo, e amor ku nos tin un pa otro ta identifiká nos komo disipel di Hesus i sirbidó di Yehova. (Huan 13:34, 35)  Aunke nos ta imperfekto, nos tin ku sigui hasi esfuerso pa mustra amor tur ora bai. Si nos ta kultivá amor i otro kualidatnan ku ta agradá Dios, nos lo evitá di hasi piká òf loke ta malu.—2 Ped. 1:5-7.

15. Ki efekto amor tin riba nos relashon ku otro hende?

¹⁵ Amor ta motivá nos pa hasi bon pa otro hende. (Rom. 13:8-10) Por ehèmpel, si nos ta stima nos kasá, nos ta keda fiel na dje. Amor pa ansianonan i rèspèt pa nan trabou lo yuda nos keda sumiso i sigui nan guia. Muchanan ku ta stima nan mayornan ta obedesé i onra nan i no ta papia malu di nan. Si nos ta stima nos próhimo, nos lo no konsiderá nan komo persona inferior ni falta nan rèspèt. (Sant. 3:9) I ansianonan ku ta stima e karnénan di Dios lo trata nan ku ternura.—Echo. 20:28, 29.

16. Kon amor ta yuda nos den sirbishi?

¹⁶ Amor mester ta bisto tambe den nos sirbishi. Amor pa Yehova ta pone ku nos no ta laga e indiferensia òf reakshon negativo di algun doño di kas desanimá nos. Mas bien, nos ta sigui prediká e bon notisia. Amor lo motivá nos pa prepará bon i pa sigui hasi esfuerso pa ta efikas den sirbishi. Si nos realmente ta stima Yehova i nos próhimo, nos lo no mira e trabou di prediká djis komo un obligashon. Al kontrario, nos lo mir’é komo un gran privilegio, i nos lo hasié ku goso.—Mat. 10:7.

SIGUI DUNA GLORIA NA DIOS

17. Dikon ta importante pa nos rekonosé ku piká heredá por stroba nos di reflehá e gloria di Yehova?

¹⁷ Mayoria di hende no ta realisá ku piká ta algu serio, pero nos sí sa esei. P’esei, nos ta konsiente ku nos tin ku lucha kontra e tendensia ku nos tin di hasi piká. Nos sa ku nos tin ku train nos konsenshi di tal manera ku e por motivá nos pa hasi loke ta korekto asina nos kuminsá pensa òf deseá loke ta malu. (Rom. 7:22, 23) Ta bèrdat ku hende ta débil, pero Dios por duna nos e forsa pa hasi loke ta korekto den kualke situashon.—2 Kor. 12:10.

18, 19. (a) Kiko ta yuda nos vense den nos lucha kontra spiritunan malbado? (b) Kiko nos mester ta determiná pa hasi?

¹⁸ Pa nos por duna gloria na Yehova, nos tin ku lucha kontra spiritunan malbado tambe. I nos por vense den e lucha akí ku yudansa di e armadura spiritual ku Dios ta duna. (Efe. 6:11-13) Satanas ta hasi tur loke e por pa haña e gloria ku Yehova so meresé. Ademas, Diabel ta hasi tur su esfuerso pa daña nos relashon ku Yehova. No opstante, nos i miónes di otro hende imperfekto—tantu hòmber komo muhé i mucha—ta keda fiel i ta duna gloria na Dios. Esei ta un derota pa Satanas! P’esei, laga nos sigui alabá Yehova meskos ku e kriaturanan selestial, kendenan ta sklama: “Bo ta digno, Yehova, nos Dios, di risibí alabansa pa bo gloria, onor i poder, pasobra ta abo a krea tur kos, i pa motibu di bo boluntat nan ta eksistí i a ser kreá.”—Rev. 4:11.

¹⁹ Sí, laga nos ta determiná pa semper sigui duna gloria na Yehova maske kiko ku pasa. I nos por ta sigur ku e ta masha kontentu ku asina tantu hende ta hasi nan máksimo esfuerso pa imit’é i reflehá su gloria. (Pro. 27:11) P’esei, laga nos tin e mesun sintimentunan ku David, kende a kanta: “Lo mi alabá bo, o SEÑOR mi Dios, ku henter mi kurason, i lo mi glorifiká bo nòmber pa semper.” (Sal. 86:12) Nos ta anhelá e dia ku nos por imitá Yehova su gloria perfektamente i pa semper! Esaki lo ta posibel pa tur hende obediente. Awor kiko di abo? Bo ta reflehando e gloria di Yehova for di awor, ku e speransa di sigui hasi esei pa semper?

[Preguntanan di Estudio]

[Plachi na página 31]

Abo ta reflehá e gloria di Yehova den e maneranan akí?