“Ku Yehova duna boso un regalo, i boso haña un lugá di deskanso, kada un di boso den e kas di su esposo.”—RUT 1:9, NW.

1. Kon Adam a reakshoná ora el a haña su esposa?

“ESAKI ta awor wesu di mi wesunan, i karni di mi karni; e lo wòrdu yamá Muhé, pasobra el a wòrdu tumá for di hòmber.” (Gén. 2:23) Ku e palabranan poétiko akí, Adam a ekspresá kon kontentu e tabata ora Yehova a dun’é un esposa. Yehova a laga Adam bai un soño profundo, a tuma un di su repchinan i a krea e bunita muhé akí ku despues Adam a yama Eva. Dios a uni e pareha akí den un matrimonio felis. I komo ku ta un repchi di Adam Dios a usa pa krea Eva, nan union tabata mas fuerte ku esun di kualke pareha kasá awe.

2. Dikon hende hòmber i hende muhé ta sinti nan atraí na otro?

² Yehova a krea hòmber i muhé ku e kapasidat pa sinti i ekspresá amor romántiko; ta e klase di amor akí ta atraé un hòmber i un muhé na otro. The World Book Encyclopedia ta bisa ku ora ‘un hòmber i un muhé kasa, nan ta spera di disfrutá di relashon seksual ku otro i ku nan amor ta dura pa semper.’ Esei ta e kaso tambe ku míles di Testigu di Yehova.

NAN A BALORÁ MATRIMONIO

3. Kon Isak a haña su esposa?

³ Pa Abraham, matrimonio tabata algu serio. P’esei mes el a manda su sirbidó di mas bieu Mesopotamia pa buska un esposa pa Isak. E sirbidó a pidi Yehova yudansa, i e tabatin bon resultado. Anto Rebeka, un muhé ku tabata teme Dios, a bira Isak su esposa stimá i a hunga un papel importante den Yehova su propósito pa preservá e simia di Abraham. (Gén. 22:18; 24:12-14, 67) No opstante, nos no mester konkluí for di e relato akí ku nos mester yuda otro hende buska kasá sin ku nan pidi  nos. Awendia, mayoria di hende mes ta skohe e persona ku nan ke kasa kuné. Klaru ku no ta Dios ta skohe kasá pa nos. Pero si un kristian ke kasa, Dios por yud’é den e asuntu akí i tambe den otro aspektonan di bida si e buska Dios su yudansa i laga spiritu santu gui’é.—Gal. 5:18, 25.

4, 5. Kiko ta konvensé bo ku e sulamita i e wardadó di karné tabata stima otro?

⁴ Tuma por ehèmpel e mucha muhé sulamita di Israel di antigwedat. E bunita mosa akí no a laga niun hende preshon’é pa bira un di e tantísimo esposanan di Rei Sálomon. E sulamita a bisa: “Mi kier pa boso hura, o yu muhénan di Herúsalèm, no lanta ni spièrta mi amor, te ora ku e ta deseá esaki.” (Kant. 8:4) E sulamita tabata namorá di un sierto wardadó di karné. Humildemente el a bisa su namorado: “Ami ta e rosa di Saron, e leli di e vayenan.” I e wardadó a kontest’é: “Manera un leli meimei di sumpiña, asina mi amor [mi dushi] ta meimei di e mucha muhénan”! (Kant. 2:1, 2) Nan tabata stima otro di bèrdat!

⁵ Pero nan amor pa Dios tabata mas fuerte. P’esei mes nan matrimonio lo mester tabata eksitoso. De echo, e sulamita a bisa su wardadó stimá: “Pone mi manera un seyo riba bo kurason, manera un seyo riba bo brasa. Pasobra amor ta mes fuerte ku morto, yalursheit ta mes severo ku Seol; [amor] su vlamnan ta vlamnan di kandela, e vlam di SEÑOR. Hopi awanan no por paga amor, ni riunan lo no pasa over di dje; si un hende duna tur e rikesanan di su kas pa amor, tòg esaki lo wòrdu despresiá kompletamente.” (Kant. 8:6, 7) Awor, kiko di un sirbidó di Dios djawe ku tin deseo di kasa? No ta e klase di amor akí e ke tin den su matrimonio?

NOS ESKOHO TA IMPORTANTE PA DIOS

6, 7. Kon nos por sa ku pa Yehova ta importante ken nos ta kasa kuné?

⁶ Pa Yehova, ta importante pa nos wak bon ku ken nos ta kasa. Dikon nos ta bisa esei? Wèl, el a prohibí e israelitanan di sera aliansa matrimonial ku e habitantenan di Kanan. El a bisa nan: “No duna bo yu muhé na nan yu hòmber, ni tuma nan yu muhé pa bo yu hòmber. Pasobra nan lo kita bo yu hòmber di sigui mi pa sirbi otro diosnan; e ora ei e rabia di SEÑOR lo sende kontra bo, i e lo destruí bo mesora.” (Deu. 7:3, 4) I siglonan despues, saserdote Èsdras a bisa ku e israelitanan a bira ‘infiel i a kasa ku muhénan stranhero, i asina a añadí na e kulpa di Israel.’ (Èsd. 10:10) Anto apòstel Pablo a bisa su kompañeronan kristian: “Un esposa ta mará na su esposo tanten ku su esposo ta na bida. Ma si su esposo muri, e ta liber pa kasa ku ken ku e ke, basta ta den Señor.”—1 Kor. 7:39.

⁷ Pues, e Skritura ta papia kla tokante e asuntu akí. P’esei, si un Testigu di Yehova kasa ku un persona ku no ta Testigu, e ta desobedesé Dios. Manera Èsdras a mustra, e israelitanan ku “a kasa ku muhénan stranhero” tabata infiel na Yehova. Pues, lo ta robes pa buska èksküs pa no kumpli ku Dios su rekisitonan enkuanto matrimonio. (Èsd. 10:10; 2 Kor. 6:14, 15) Un kristian ku kasa ku un persona ku no ta Testigu di Yehova no ta balorá matrimonio komo un regalo di Dios, i e no ta un bon ehèmpel pa otronan. E por asta pèrdè sierto privilegionan den kongregashon. Anto lo ta ilógiko pa e resa pidi Dios bendishoná su matrimonio, pasobra lo ta komo si fuera e ta bisa Yehova: ‘Mi a desobedesé bo sí, pero bendishoná mi tòg.’

 NOS TATA SELESTIAL SA MIHÓ

8. Dikon nos mester sigui Dios su instrukshonnan enkuanto matrimonio?

⁸ Un persona ku inventá un aparato sa presis kon esaki ta funshoná, i p’esei e por duna informashon spesífiko kon pa us’é. Si nos no hasi kaso di su instrukshonnan, e aparato por traha malu òf asta keda sin traha mes. Pa loke ta matrimonio, ta Yehova a origin’é. Pues, si nos ke tin un matrimonio felis, nos mester sigui su instrukshonnan.

9. Dikon Yehova a instituí matrimonio?

⁹ Yehova konosé hende bon, i e sa tur kos relashoná ku matrimonio. El a implantá deseo seksual den hende pa nan por ta “fruktífero i multipliká.” (Gén. 1:28) Ademas, Dios ta komprondé ku soledat por afektá un persona, pasobra promé ku el a krea Eva, el a bisa: “No ta bon pa e hòmber ta so; lo mi traha un yudadó p’e ku ta pas kuné.” (Gén. 2:18) Yehova sa tambe ku matrimonio por ta un berdadero fuente di goso.—Lesa Proverbionan 5:15-18.

10. Kon parehanan kasá por agradá Yehova asta den nan relashon íntimo?

¹⁰ Komo ku nos tur a heredá piká for di Adam, no tin niun matrimonio ku ta perfekto. Pero komo sirbidó di Yehova, nos por ta berdaderamente felis si nos sigui e guia di su Palabra den tur aspekto di nos bida. Wak, por ehèmpel, ki konseho Pablo a duna enkuanto relashon seksual den matrimonio. (Lesa 1 Korintionan 7:1-5.) For di su palabranan nos ta komprondé ku no ta ora parehanan kasá ke haña yu so nan tin mag di tene relashon seksual. Relashon seksual por satisfasé un pareha su nesesidat emoshonal i físiko tambe. Pero práktikanan pèrvèrso sí no ta agradá Yehova. P’esei, parehanan kristian ta wak bon pa nan no hasi nada ku ta desagradá Yehova. Mas bien, nan ta trata otro ku ternura, desplegando kariño i amor pa otro.

11. Kon Yehova a bendishoná Rut pa su fieldat?

¹¹ Matrimonio mester ta un fuente di goso i no un karga pisá. Un hogar kristian mester tin pas i trankilidat. Tuma por ehèmpel e kaso di Noemí, un biuda di edat, kende tabata un fiel sirbidó di e Dios berdadero. Un 3.000 aña pasá, ora e tabata riba kaminda pa Huda, huntu ku su suegranan Orfa i Rut, kendenan tambe tabata biuda, el a urgi nan pa bolbe nan pueblo Moab. Pero Rut no a bai; mas bien, el a sigui sirbi e Dios berdadero  huntu ku Noemí. Boas, un hòmber di edat kende tambe tabata un sirbidó di Yehova, a bisa Rut: ‘Ku bo pago sea kompleto for di Yehova, e Dios di Israel, bou di kende su alanan bo a bin buska refugio.’ (Rut 1:9; 2:12) Rut a balorá matrimonio komo un regalo di Dios i a kasa ku Boas. Ora Rut resusitá den Dios su mundu nobo aki riba tera, lo e keda kontentu ora e haña sa ku el a bira antepasado di Hesukristu. (Mat. 1:1, 5, 6; Luk. 3:23, 32) Sí, Rut a risibí hopi bendishon pasobra el a obedesé Yehova fielmente.

BON KONSEHO PA UN MATRIMONIO EKSITOSO

12. Unda nos por haña bon konseho enkuanto matrimonio?

¹² Yehova, Esun ku a originá matrimonio, ta siña nos tur loke nos mester sa pa nos por tin un matrimonio felis. Niun hende no ta mas sabí ku Yehova. Beibel semper ta korekto. P’esei pa un konseho por ta bon, e mester ta basá riba prinsipionan bíbliko. Apòstel Pablo, por ehèmpel, a skirbi bou di inspirashon: “Laga kada un di boso stima su esposa manera e ta stima su mes; di otro banda, e esposa mester tin rèspèt profundo pa su esposo.” (Efe. 5:33) E konseho akí no ta difísil pa un kristian maduro komprondé. Pero e punto ta: Lo e hasi kaso di Yehova su Palabra? Wèl, si e ta balorá matrimonio komo un regalo di Dios, lo e hasi esei sigur. *

13. Kiko por pasa ora un esposo no ta sigui e konseho di 1 Pedro 3:7?

¹³ Un esposo kristian mester trata su esposa ku amor. Apòstel Pedro a skirbi: “Boso, esposonan, sigui biba ku boso esposanan segun konosementu. Duna nan onor manera na un poron mas frágil, esun femenino, ya ku boso tambe ta heredero huntu ku nan di e bondat inmeresí di bida, pa boso orashonnan no ser strobá.” (1 Ped. 3:7) Pues, Yehova por keda sin skucha orashon di un esposo ku no ta apliká konseho bíbliko. Esaki por asta daña e relashon ku e esposo i e esposa tin ku Yehova, kousa hopi tenshon i pone ku nan ta kuminsá pleita i trata otro malu.

14. Ki influensia un esposa amoroso por tin riba su famia?

¹⁴ Di otro banda, esposanan tambe por kontribuí na e trankilidat i felisidat ku tin den nan famia. Kon asina? Siguiendo Yehova su konseho i guia di spiritu santu. Ta masha normal ku un esposo kristian ta stima su kasá i proteh’é tantu físikamente komo spiritualmente. Anto un esposa kristian ke pa su kasá stim’é i p’esei e ta desplegá kualidatnan ku ta pone su kasá stim’é asta mas. Proverbionan 14:1 ta bisa: “E muhé sabí ta traha su kas, ma esun bobo ta bash’é abou ku su mes man.” Sí, un esposa sabí i amoroso ta kontribuí mashá na e éksito i felisidat di su famia. Di e manera ei, e ta demostrá ku e ta balorá matrimonio komo un regalo di Dios.

15. Ki konseho nos ta haña na Efesionan 5:22-25?

 ¹⁵ Ademas, esposo- i esposanan ta demostrá ku nan ta balorá matrimonio ora nan ta imitá e manera ku Hesus a trata e kongregashon kristian. (Lesa Efesionan 5:22-25.) Parehanan kasá ku no ta orguyoso, ku no ta keda sin papia ku otro i ku no ta laga otro mal karakterístikanan perhudiká nan matrimonio ma ku ta stima otro di bèrdat ta disfrutá di Yehova su bendishon.

NO LAGA NINGUN HENDE SEPARÁ LOKE DIOS A UNI

16. Dikon algun kristian ta keda soltero?

¹⁶ Mayoria di hende ke kasa un dia. Pero algun sirbidó di Yehova ta preferá di keda soltero pasobra nan no a haña e persona adekuá ku tin Yehova su aprobashon. Algun ta keda soltero pasobra nan no ta sinti e nesesidat di kasa. Otronan ta keda sin kasa pa nan por tin mas tempu pa dediká na Yehova su sirbishi. Ta klaru anto ku un persona por keda soltero si e ke basta e tene su mes na e normanan moral di Yehova.—Mat. 19:10-12; 1 Kor. 7:1, 6, 7, 17.

17. (a) Kiko Hesus a bisa enkuanto matrimonio ku semper nos mester keda kòrda? (b) Kiko un kristian mester hasi mesora si e kuminsá deseá kasá di otro hende?

¹⁷ Sea ku nos ta soltero òf kasá, nos tur mester tene e palabranan akí di Hesus na mente: “Boso no a lesa ku esun ku a krea hende na prinsipio a traha nan hòmber i muhé i a bisa: ‘P’esei un hòmber lo bandoná su tata i su mama i lo pega na su esposa, i nan dos lo ta ún karni’? Di manera ku nan no ta dos mas, sino ún karni. Pues, no laga ningun hende separá loke Dios a uni bou di un yugo.” (Mat. 19:4-6) E punto ta bon kla: Nos no mester deseá kasá di otro hende pasobra esei ta un piká. (Deu. 5:21) Si un kristian ta deseá kasá di otro hende, e mester hasi tur loke ta posibel pa eliminá e mal deseo ei mesora for di su kurason maske esaki ta kous’é hopi doló. (Mat. 5:27-30) Sí, ta sumamente importante pa e kambia su manera di pensa i eliminá tur mal deseo for di su kurason engañoso.—Yer. 17:9.

18. Kon abo ta mira matrimonio, Dios su regalo?

¹⁸ Asta personanan ku tin djis un tiki konosementu di Yehova Dios òf ku no konos’é mes ta respetá matrimonio, ku ta un regalo di Dios. Pues, komo sirbidó di “e Dios felis,” Yehova, nos mester balorá matrimonio muchu mas. P’esei, laga nos duna prueba ku nos realmente ta balorá matrimonio.—1 Tim. 1:11.

[Nota]

[Preguntanan di Estudio]

[Komentario na página 16]

Un bon matrimonio ta duna gloria na Yehova i por hasi henter e famia felis

[Plachi na página 15]

Rut a balorá matrimonio komo un regalo di Dios

[Plachi na página 17]

Abo ta demostrá ku bo ta balorá matrimonio komo un regalo di Yehova?