“Mi ta duna boso un mandamentu nobo: stima otro; meskos ku ami a stima boso, boso tambe stima otro. Na esaki tur hende lo sa ku boso ta mi disipelnan, esta, si boso ta stima otro.” —HUAN 13:34, 35.

Kiko Hesus Tabata Ke Men? El a bisa su siguidónan pa nan stima otro meskos ku é a stima nan. Kon el a stima nan? Su amor no a ser influensiá pa e prehuisio ku tabata reina den su tempu kontra hende di otro nashon òf kontra hende muhé. (Huan 4:7-10) Amor a motivá Hesus pa sakrifiká su tempu, energia i komodidat personal pa yuda otro hende. (Marko 6:30-34) I Kristu a demostrá amor na e manera di mas sublime ora el a entregá su bida. Manera el a bisa: “Ami ta e bon wardadó; e bon wardadó ta entregá su alma pa e karnénan.”—Huan 10:11.

E Ehèmpel di e Promé Kristiannan: Den promé siglo, e kristiannan tabata yama otro “ruman.” (Filemon 1, 2) Hende di tur nashon tabata bonbiní den e kongregashon kristian, pasobra pa nan ‘no tabatin distinshon entre hudiu ni griego, ya ku ta e mesun Señor tabatin riba nan tur.’ (Romanonan 10:11, 12) Despues di e fiesta di Pentekòste di aña 33, e disipelnan na Herúsalèm a “bende nan propiedatnan i parti e plaka entre nan tur, segun e nesesidat di kada un.” Dikon nan a hasi esei? Pa e rumannan resien batisá por a keda Herúsalèm i “sigui presta atenshon na siñansa di e apòstelnan.” (Echonan 2:41-45) Kiko a motivá nan pa aktua asina? Ménos ku 200 aña despues di morto di e apòstelnan, Tertuliano a revelá esei ora el a sita loke otro hende tabata bisa di e kristiannan: “Wak kon nan ta stima otro . . . i kon nan ta kla pa asta muri pa otro.”

Ken Awe Ta Hasi Meskos? E buki Historia di e Dekadensia i Ruina di e Imperio Romano a komentá ku atraves di siglonan hende ku a bisa ku nan ta kristian “a kometé hopi mas krueldat kontra otro ku loke nan a sufri debí na e fanatismo di [hende no kreyente].” Resientemente, un estudio na Merka a saka afó ku hopi hende religioso—di kua mayoria ta bisa ku nan ta kristian—tin prehuisio kontra hende di otro rasa. Hopi biaha, baidó di misa den un pais no tin nada di haber ku esnan di e mesun grupo religioso den un otro pais. P’esei nan no por òf no ta dispuesto pa yuda nan kompañeronan di kreensia ora surgi un nesesidat.

Na aña 2004, kuater orkan a suta Flórida den dos luna di tempu. Despues, e presidente di e komité di trabounan di emergensia di e region ei a bai kontrolá si e hendenan tabata hasi bon uso di e suministronan ku nan a manda. El a ripará ku ningun otro grupo no tabata asina bon organisá manera e Testigunan di Yehova i a ofresé pa duna nan tur loke nan tabatin mester. Mas promé, na aña 1997, un grupo di Testigu di Yehova a bai Repúblika Demokrátiko di Congo pa yuda nan rumannan kristian den nesesidat. Nan a bai ku remedi, kuminda i paña ku Testigunan di Europa a kontribuí kuné, na balor di ún mion dòler merikano.