“E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.”—MATEO 24:14.

Kiko Hesus Tabata Ke Men? Segun e Evangelio di Lukas, Hesus a “biaha di stat pa stat i di pueblito pa pueblito, predikando i anunsiando e bon notisia di e Reino di Dios.” (Lukas 8:1) Hesus mes a bisa: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Lukas 4:43) Na kuminsamentu, el a manda su disipelnan bai prediká e bon notisia den e statnan i pueblitonan ku tabata keda serka, pero mas despues el a bisa nan: “Boso lo ta mi testigunan . . . te na e parti mas leu di tera.”—Echonan 1:8; Lukas 10:1.

E Ehèmpel di e Promé Kristiannan: E disipelnan di Hesus no a pèrdè pa gana i mesora a hasi loke Hesus a manda: “Tur dia, sin stòp, den tèmpel i di kas pa kas, nan a sigui siña hende i deklará e bon notisia tokante Hesus.” (Echonan 5:42) I no ta un grupo chikitu spesial so tabata prediká, sino nan tur. Historiadó Neander a bisa ku “Selso, un di e promé eskritornan ku a kritiká kristianismo, a hasi bofon di e echo ku obrero di lana, sapaté, kurtidó di kueru, sí, e hendenan mas komun i sin edukashon, tabata predikadó seloso di e evangelio.” Jean Bernardi a splika den su buki na franses, E Promé Siglonan di Iglesia, ku hende kristian mester a bai “papia na tur parti i ku tur hende. Riba kaminda i den stat, riba plasa públiko i den kas. Sea ku nan tabata bonbiní òf nò. . . . Te na punta di e tera.”

Ken Awe Ta Hasi Meskos? E pastor anglikano David Watson a skirbi: “Un di e motibunan di e malestar spiritual ku ta reina  awe ta ku Iglesia no a interesá den e trabou di prediká i di siña hende.” Den e buki na spañó Dikon Katólikonan Ta Bai?, José Luis Pérez Guadalupe a skirbi ku Testigunan di Yehova “ta bai di kas pa kas sistemátikamente.” I el a agregá ku evangélikonan, atventistanan i otro gruponan religioso “no ta bai di kas pa kas.”

Den un informe di e Instituto Cato, nos ta haña un komentario interesante i realístiko di Jonathan Turley: “Si bo menshoná e nòmber Testigunan di Yehova, mayoria di hende ta pensa mesora riba e predikadónan ku ta yama na nos porta na mal ora. Testigunan di Yehova no ta mira buskamentu di hende di kas-pa-kas pa kombertí komo un manera pa promové nan kreensia, sino komo un parti fundamental di nan fe.” (Cato Supreme Court Review, 2001-2002)

[Kuadro na página 9]

Bo A Saka Afó Ta Ken?

Den e seri di artíkulo akí nos a analisá vários karakterístika ku segun Beibel ta identifiká kristiannan berdadero. Bo a logra identifiká nan? Ta bèrdat ku tin míles di grupo i denominashon religioso ku ta afirmá di ta kristian. Pero kòrda kiko Hesus a bisa su siguidónan: “No ta tur hende ku bisa mi: ‘Señor, Señor,’ lo drenta e Reino di shelu, sino esun ku ta hasi e boluntat di mi Tata ku ta den shelu.” (Mateo 7:21) Pues, pa disfrutá di bendishon eterno bou di gobernashon di e Reino di Dios, bo tin ku identifiká esnan ku ta hasiendo e boluntat di e Tata—esnan ku tin tur e karakterístikanan di kristianismo berdadero—i forma parti di e grupo ei. Lo bo ke sa mas tokante e Reino di Dios i e bendishonnan ku lo e trese? Wèl, nos ta animá bo pa papia ku esnan ku a duna bo e revista akí, esta, Testigunan di Yehova.—Lukas 4:43.