“Mi a hasi bo nòmber konosí na e hendenan ku tabata den mundu i ku bo a duna mi. . . . Mi a hasi bo nòmber konosí na nan i lo mi sigui hasié konosí.”—HUAN 17:6, 26.

Kiko Hesus Tabata Ke Men? El a usa e nòmber di Dios den su sirbishi i asina a hasié konosí. Sin duda, el a pronunsiá Dios su nòmber personal ora e tabata lesa for di e Skritura, loke el a hasi ku frekuensia. (Lukas 4:16-21) El a siña su siguidónan pa nan pidi den orashon: “Tata, laga bo nòmber sea santifiká.”—Lukas 11:2.

E Ehèmpel di e Promé Kristiannan: Apòstel Pedro a konta e ansianonan na Herúsalèm ku Dios a saka for di e nashonnan “un pueblo pa karga su nòmber.” (Echonan 15:14) Ademas, e apòstelnan i otro kristiannan a prediká e mensahe ku “tur hende ku invoká e nòmber di Yehova lo ser salbá.” (Echonan 2:21; Romanonan 10:13) Tambe nan a inkluí e nòmber di Dios den e obranan ku nan a skirbi. Un kolekshon di lei hudiu ku nan a kompletá rònt di aña 300 di nos era, konosí komo E Tosefta, a papia tokante e kimamentu di buki kristian na man di opositor. E obra akí a bisa: “No mester skapa e bukinan di e eskritornan di Evangelio ni di minim [probablemente kristiannan hudiu]. Laga nan kima kaminda nan ta, . . . nan ku e nòmber di Dios ku nan ta kontené.”

Ken Awe Ta Hasi Meskos? E Beibel Revised Standard Version—edishon outorisá pa e Konseho Nashonal di Iglesianan di Kristu na Merka—ta bisa den su prólogo: “E uso di kualke nòmber propio pa e úniko Dios ku tin, komo si fuera ta eksistí otro dios for di kua lo mester distinguié, a ser deskontinuá den hudaismo promé ku e era kristian i ta kompletamente inapropiá pa e fe universal di e Iglesia Kristian.” P’esei, e tradukshon ei a remplasá e nòmber di Dios ku e título “SEÑOR.” Resientemente, Vatikano a instruí su obispunan: “No mester usa ni pronunsiá e nòmber di Dios den forma di e tetragrámaton YHWH den kantika ni den orashon.” *

Ken awe ta usa e nòmber personal di Dios i hasié konosí? Un hóben ku yama Sergey a haña sa ta ken. Tempu e tabata tiner na Kirgizstan, el a wak un pelíkula ku a identifiká e nòmber di Dios komo Yehova. Dies aña largu e no a tende e nòmber ei mas. Entretantu, el a bai biba na Merka, i dos Testigu di Yehova a bishit’é na kas i a mustr’é e nòmber di Dios den Beibel. Sergey a keda masha kontentu ku el a haña un grupo ku ta usa e nòmber Yehova. Un dikshonario ingles ta definí “Yehova Dios” komo “un dios supremo rekonosí i e úniko Dios ku Testigunan di Yehova ta adorá.” (Webster’s Third New International Dictionary)

[Nota]