“Mundu a odia nan, pasobra nan no ta parti di mundu.”—HUAN 17:14.

Kiko Hesus Tabata Ke Men? Komo ku e no tabata parti di mundu, el a keda neutral den e konfliktonan sosial i polítiko di su tempu. El a splika: “Si mi reino tabata parti di e mundu akí, mi sirbidónan lo a bringa pa mi no ser entregá den man di e hudiunan. Ma echo ta ku mi reino no ta djaki.” (Huan 18:36) Ademas, el a urgi su siguidónan pa rechasá aktitut, manera di papia i komportashon ku Beibel ta kondená.—Mateo 20:25-27.

E Ehèmpel di e Promé Kristiannan: Segun e eskritor religioso Jonathan Dymond, e promé kristiannan “a nenga di partisipá den [guera]; nan no tabatin kunes ku e konsekuensianan, sea esei tabata bèrgwensa, enkarselashon òf morto.” En bes di aktua kontra nan posishon neutral, nan a preferá di sufri. Nan normanan moral haltu tambe a hasi nan diferente. Un apòstel a bisa nan: “Nan ta keda straño ku boso no ta sigui anda ku nan den nan bagamunderia, i p’esei nan ta papia malu di boso.” (1 Pedro 4:4) Manera historiadó Will Durant a splika, e kristiannan, “ku nan deboshon i desensia, tabata molestiá konsenshi di e mundu pagano loko pa plaser.”

Ken Awe Ta Hasi Meskos? Relashoná ku neutralidat kristian, New Catholic Encyclopedia a deklará ku ‘for di e punto di bista moral, no tin ningun hustifikashon pa nenga di karga arma pa motibu di konsenshi.’ Di otro banda, basá riba un informe di e organisashon di derecho humano African Rights, e korant suiso Reformierte Presse a konfirmá ku tur iglesia a partisipá den e genosidio na Ruanda na 1994, “ku eksepshon di Testigunan di Yehova.”

Tratando e tema di e Holokousto nazi, un maestro di skol sekundario a lamentá ku “ningun grupo òf organisashon di siudadano no a denunsiá e kantidat di mentira, e trato kruel i, mas despues, e atrosidatnan ku a tuma lugá. Despues di konsultá ku e Museo pa Konmemorá Holokousto na Merka, el a skirbi: “Awor mi sa ku no tabata manera m’a pensa.” El a haña sa ku Testigunan di Yehova a para firme den nan kreensianan apesar di e trato teribel ku nan a risibí.

Kiko di moralidat kristian? Segun e revista U.S. Catholic, “mayoria di hóben adulto katóliko no ta di akuerdo ku e siñansanan di Iglesia relashoná ku asuntunan manera bibamentu huntu [i] sèks promé ku kasa.” E revista a sita un diákono ku a bisa: “Un porsentahe grandi di persona ku mi ta guia—mi ta kalkulá ku ta mas ku 50%—ta biba huntu kaba ora nan bini pa kasa.” The New Encyclopædia Britannica a komentá ku Testigunan di Yehova “ta tene duru na normanan moral haltu di kondukta personal.”