KONOSEMENTU por salba bida. Ora Nouhou, un bebi di dies luna, a bira malu, su mama kende ta traha den sektor di kuido na Niger tabata sa kiko pa hasi. El a meskla awa, suku i salu pa su yu bebe i asina a evitá ku e bebi ta deshidratá. Segun UNICEF, “debí ku e mama a aktua lihé i e yu a haña kuido na un sentro médiko, e por a rekuperá lihé.”

Konosementu bíbliko tambe por salba bida. Moises, e eskritor di e promé buki di Beibel, a bisa: “Esaki no ta un palabra bashí pa boso; di bèrdat, esaki ta boso bida. I pa medio di e palabra akí boso lo prolongá boso dianan.” (Deuteronomio 32:47) Ta bèrdat ku Beibel por prolongá un hende su bida? Den ki sentido e ta nos bida?

E promé sinku artíkulonan den e seri akí ta mustra ku Beibel ta un buki úniko. Dikon? Pasobra su profesianan ta konfiabel, e ta un buki histórikamente i sientífikamente eksakto, su bukinan ta kompletamente na armonia ku otro i e ta un buki di guia práktiko. No tin duda, Beibel ta un buki úniko! Pues, si Beibel ta bisa ku bo por biba mas largu, esta pa semper, no ta bale la pena konsiderá su kontenido?

Nos ta animá bo pa studia Beibel pa bo por haña sa kon bo por tin pas mental for di awor i berdadero felisidat den futuro. Testigunan di Yehova ta kontentu pa studia Beibel ku bo.

[Kuadro/Plachi na página 9]

Beibel ta úniko tambe pasobra ta e so por duna kontesta satisfaktorio riba preguntanan importante manera:

• Kiko ta e propósito di bida?

• Dikon tin asina tantu sufrimentu?

• Tin speransa pa mi sernan kerí ku a muri?

Bo por haña kontesta bíbliko pa e preguntanan ei den e buki akí, Kiko Beibel Ta Siña Realmente?, publiká pa Testigunan di Yehova.