‘Mi ta hasi un apelashon na boso pa mantené e union di spiritu.’—EFE. 4:1, 3.

1, 2. Kiko ta Yehova su propósito pa tera i pa hende?

FAMIA. Kiko ta bini na bo mente ora bo tende e palabra ei? Amor? Felisidat? Hende ku ta traha huntu pa logra un meta komun? Un ambiente trankil den kua muchanan ta lanta, siña i kaminda tur hende por kompartí nan ideanan? Probablemente, e kosnan akí lo bini na bo mente si bo a lanta den un famia amoroso. Ta Yehova a originá famia. (Efe. 3:14, 15) I su propósito tabata pa tur su kriaturanan, tantu esnan den shelu komo esnan riba tera, ta un famia uní, ku ta konfia otro i ku ta sinti nan safe.

² Pero debí ku Adam ku Eva a peka, hende no por a forma parti mas di Yehova su famia universal. No opstante, Yehova su propósito no a kambia. Lo e sòru pa tera bira un paradeis yená ku desendiente di Adam ku Eva. (Gén. 1:28; Isa. 45:18) Ya kaba el a hasi tur preparashon pa e propósito ei kumpli. E buki bíbliko di Efesionan, ku tin union komo tema prinsipal, ta menshoná algun di e kosnan ku Yehova a hasi i ta hasiendo pa kumpli ku su propósito. P’esei, laga nos analisá algun versíkulo di e buki akí i mira kon nos por kooperá ku Yehova su propósito pa uni tur su kriaturanan komo un solo famia.

LOKE YEHOVA TA HASIENDO

3. Kon Yehova a kuminsá manehá kosnan segun Efesionan 1:10, i na ki tempu e promé fase a kuminsá?

³ Tur loke Yehova hasi ta pa kumpli ku su propósito. Beibel ta bisa ku “durante kulminashon di e tempu stipulá,” Dios lo a kuminsá “manehá kosnan,” esta, prepará su kriaturanan, tantu esnan den shelu komo esnan riba tera, pa nan por ta un famia uní. (Lesa Efesionan 1:8-10.) E preparashon akí ta konsistí  di dos fase. Durante e promé fase, Yehova ta prepará e ungínan pa biba den shelu, kaminda nan lo sigui traha bou di direkshon di Hesukristu. E preparashon akí a kuminsá na Pentekòste di aña 33 di nos era ora Yehova a kuminsá reuní esnan ku lo goberná ku Kristu den shelu. (Echo. 2:1-4) Mediante Kristu su sakrifisio di reskate, Yehova ta deklará e ungínan hustu i digno di risibí bida. I e ungínan ta aseptá mesora ku nan a ser adoptá komo “yu di Dios.”—Rom. 3:23, 24; 5:1; 8:15-17.

4, 5. Kiko e di dos fase di Yehova su preparashon ta enserá?

⁴ Durante e di dos fase, Dios lo prepará tur hende ku lo biba den Paradeis aki riba tera; e hendenan akí lo ta súpdito di e Reino Mesiániko. Anto e “multitut grandi” lo ta e promé grupo ku lo biba den Paradeis. (Rev. 7:9, 13-17; 21:1-5) Durante e Reinado di Mil Aña, míles di miónes di hende lo ser resusitá pa uni ku nan. (Rev. 20:12, 13) Bo por imaginá bo kuantu oportunidat nos lo tin e ora ei pa demostrá ku nos ta uní? Na fin di e mil aña, e “kosnan riba tera,” esta e multitut grandi i tur e personanan ku a resusitá, lo pasa un prueba final. I tur esnan ku keda fiel lo ser adoptá komo “yunan di Dios” pa biba riba tera.—Rom. 8:21; Rev. 20:7, 8.

⁵ Pues, manera nos a mira, Dios ta preparando e ungínan pa biba den shelu i e otro karnénan pa biba den Paradeis aki riba tera. Pero, kon kada un di nos por kooperá ku Yehova?

“MANTENÉ E UNION DI SPIRITU”

6. Kon Beibel ta mustra ku kristiannan mester reuní?

⁶ Beibel ta bisa ku kristiannan mester reuní. (1 Kor. 14:23; Heb. 10:24, 25) Pero pa nos por ta berdaderamente uní, nos tin ku hasi mas ku djis pasa un ratu huntu na un lugá spesífiko, manera sa ta e kaso na un plasa òf stadion. Nos mester apliká instrukshon ku nos ta haña di Yehova i laga su spiritu santu hasi nos un mihó persona.

7. Kon nos por “mantené e union di spiritu”?

⁷ Aunke Yehova a deklará su sirbidónan hustu—esnan ungí komo yu i e otro karnénan komo amigu—a base di e sakrifisio di reskate di Kristu, tanten ku nos ta biba den e mundu malbado akí, lo tin desakuerdo entre rumannan. (Rom. 5:9; Sant. 2:23) Si esei no tabata asina, Beibel lo no a animá nos pa sigui ‘soportá otro.’ Pero kiko nos mester hasi pa ta uní ku nos rumannan? Nos mester hasi esfuerso pa ta ‘humilde i suave.’ Apòstel Pablo a urgi nos pa traha duru “pa mantené e union di spiritu den e vínkulo di pas.” (Lesa Efesionan 4:1-3.) I pa nos por hasi esei, nos mester laga Dios su spiritu santu obra den nos bida i yuda nos produsí e fruta di spiritu. Dikon? Pasobra kontrali na obra di karni ku ta kousa desunion, fruta di spiritu ta yuda nos resolvé kualke problema ku nos por tin ku otro hende.

8. Den ki sentido obra di karni ta kousa desunion?

⁸ Laga nos wak kon “obranan di karni” ta kousa desunion. (Lesa Galationan 5:19-21.) Fornikashon, por ehèmpel, ta separá un persona for di Yehova i for di e kongregashon kristian. Adulterio ta separá yunan for di nan mayornan i personanan inosente for di nan kasá. Impuresa tambe ta kousa desunion. Meskos ku dos opheto no por pega bon na otro si un di nan ta sushi, un persona ku no ta moralmente òf físikamente limpi no por tin un bon relashon ku Dios ni ku su sernan kerí. Hende ku kondukta sinbèrgwensa tambe ta mustra un falta di rèspèt pa Dios su leinan hustu. Tur e otro obranan di karni tambe ta separá  hende for di otro i for di Dios. P’esei mes Yehova ta odia e kosnan ei.

9. Ki preguntanan nos por hasi nos mes pa wak si nos ta “hasiendo esfuerso sinsero pa mantené e union di spiritu”?

⁹ Kada un di nos ta hasi bon di puntra nos mes: ‘Mi ta hasiendo tur mi esfuerso pa mantené pas i union den kongregashon? Kon mi ta reakshoná si surgi un problema entre ami ku un otro persona? Mi ta kore konta yen hende e asuntu pa nan tuma parti pa mi? Mi ta spera pa e ansianonan resolvé e problema pa mi ya mi mes no tin ku bai hasi pas ku e persona? Si mi sa ku un hende tin algu kontra mi, mi ta evitá kontakto kuné pa mi no tin nodi di papia kuné tokante e asuntu?’ Si nos no ta hasi esfuerso pa mantené pas i union, nos por bisa ku nos ta kooperá ku Yehova su propósito pa uni tur persona bou di e liderato di Kristu?

10, 11. (a) Dikon ta importante pa nos ta na pas ku nos rumannan? (b) Kiko nos por hasi pa mantené pas i risibí Yehova su bendishon?

¹⁰ Hesus a bisa: “Si bo trese bo ofrenda na altar, i einan bo kòrda ku bo ruman tin algu kontra bo, laga bo ofrenda einan, dilanti di altar, i bai. Hasi pas ku bo ruman promé, i despues, ora bo bini bèk, duna bo ofrenda. Sea lihé pa drecha asuntu.” (Mat. 5:23-25) Disipel Santiago a bisa ku “hende ku ta hasi pas lo sembra kaminda tin pas i lo kosechá e fruta di hustisia.” (Sant. 3:17, 18) Pues anto, si bo no ta na pas ku otro hende, bo no por sigui hasi loke ta korekto.

¹¹ Nos por ilustrá esei di e manera akí: Den algun pais ku a ser asotá pa guera, mas ku un tersera parti di e tera no por ser kultivá pa motibu di e minanan ku tin den tera. Dikon? Pasobra manera un mina eksplotá, kunukeronan ta bandoná e sitio, i esei ta hasi e situashon difísil: Hende ta keda sin trabou i statnan ta keda sin kuminda. Di igual manera, lo ta difísil pa nos mehorá nos kualidatnan kristian si nos tin un karakter manera mina ku ta stroba nos di ta na pas ku nos rumannan. Pero si nos ta lihé pa pordoná i ta hasi bon na otro hende, nos lo ta na pas ku nan i Yehova lo bendishoná nos.

12. Kon ansianonan por yuda nos pa ta uní?

¹² E ‘regalonan den forma di hende,’ esta, ansianonan, tambe ta yuda nos keda uní den kongregashon. Sí, nan t’ei pa yuda nos “alkansá e union di fe.” (Efe. 4:8, 13) Kon nan ta hasi esei? Ora nan ta traha huntu ku nos den sirbishi i ta duna nos konseho basá riba e Palabra di Dios, nan ta yuda nos mehorá nos  personalidat kristian. (Efe. 4:22-24) Anto ora ansianonan ta duna bo konseho, bo ta mira esei komo un manera ku Yehova ta prepará bo pa biba den su mundu nobo? I ansianonan, boso ta hasi esfuerso pa reahustá boso rumannan ku e meta ei na mente?—Gal. 6:1.

“BIRA BONDADOSO KU OTRO”

13. Kiko lo por ta e resultado si nos no hasi kaso di e konseho na Efesionan 4:25-32?

¹³ Efesionan 4:25-29 ta papia spesífikamente di e klase di kondukta ku nos mester evitá. E tekstonan akí ta mustra bon kla ku nos no mester ta hende floho, hende ku ta gusta rabia, ku ta gaña i ku ta ekspresá palabranan putrí. Mas bien, nos palabranan mester edifiká otro. Si nos no ta sigui e konsehonan akí, nos ta hasi Dios su spiritu santu tristu i ta stroba esaki di promové union. (Efe. 4:30) Ademas, pa nos por tin pas i union, nos mester hasi kaso tambe di e siguiente konseho di Pablo: “Kita tur tipo di amargura malisioso, rabia, furia, gritamentu i papiamentu di kos ofensivo for di boso, i tambe tur loke ta perhudisial. Pero bira bondadoso ku otro, mustra tierno kompashon, pordoná otro libremente meskos ku Dios tambe a pordoná boso libremente pa medio di Kristu.”—Efe. 4:31, 32.

14. (a) Dikon Beibel ta animá nos pa “bira bondadoso”? (b) Kiko lo yuda nos ta bondadoso?

¹⁴ E echo ku Beibel ta animá nos pa “bira bondadoso” ta mustra ku no ta tur ora nos ta bondadoso i ku nos tin ku mehorá. Nos mester siña tene kuenta ku sintimentu di otro hende i pone nan interes promé ku esun di nos. (Flp. 2:4) Tin biaha, nos ke bisa algu pa pone otronan hari òf pa laga nos parse inteligente. Pero esaki ta bondadoso? Si nos pensa promé ku nos papia, nos lo “bira bondadoso.”

SIÑA STIMA I RESPETÁ BO FAMIA

15. Kon esposonan tin ku imitá Kristu segun Efesionan 5:28?

¹⁵ Apòstel Pablo a kompará e relashon entre Kristu i e kongregashon kristian ku e relashon entre un esposo i esposa. Kristu su ehèmpel ta laga nos komprondé ku un esposo mester guia, stima i kuida su esposa i ku e esposa mester ta sumiso na su esposo. (Efe. 5:22-33) Awor, kiko Pablo tabata ke men ku e ekspreshon di e “manera” akí ora el a bisa: “Di e manera akí, esposonan mester stima nan esposa manera nan mes kurpa”? (Efe. 5:28) Wèl, e palabranan ku Pablo a ekspresá promé ta deskribí e manera ku Kristu a trata e kongregashon. El a bisa ku Kristu a stima e kongregashon i a entregá su bida p’e i a purifik’é ku “baño di awa pa medio di e palabra.” Pues, esposonan tin ku trata nan esposa manera Kristu a trata e kongregashon, i esaki ta enserá ku nan tin e responsabilidat di alimentá nan famia spiritualmente. Hasiendo esei, nan ta kooperá ku Yehova su propósito pa uni tur kriatura komo un solo famia bou di e liderato di Kristu.

16. Kiko lo ta e resultado ora mayornan ta kumpli ku e responsabilidat ku Yehova a duna nan?

¹⁶ Mayornan mester kòrda ku nan tin un responsabilidat ku Yehova a duna nan; nan tin ku kuida nan yunan. Pero lamentablemente, den e mundu djawe, hopi hende ta “sin kariño.” (2 Tim. 3:1, 3) Por ehèmpel, tin hopi tata ku no ta kumpli ku nan responsabilidat, i esaki ta perhudiká i hasi nan yunan tristu. Pero Pablo a konsehá tatanan kristian: “No iritá boso yunan, ma sigui lanta nan den e disiplina di Yehova i inkulká su manera di pensa den nan.” (Efe. 6:4) Pues, ta mayornan tin ku siña  nan yunan stima hende i respetá outoridat. I mayornan ku ta hasi esei ta kooperá ku Yehova su propósito pa uni tur hende. Dikon nos ta bisa asina? Pasobra ora mayornan ta perkurá pa un ambiente di amor i kariño den famia, ta kontrolá nan rabia i ta evitá di grita i zundra nan yunan, nan ta siña nan yunan mustra amor na otro hende i respetá outoridat. Di e manera ei, nan ta prepará nan yunan pa biba den Dios su mundu nobo.

17. Kiko nos mester hasi pa resistí Diabel?

¹⁷ Nos tin ku kòrda ku Diabel, e promé persona ku a kita pas universal, lo sigui hasi tur loke ta na su alkanse pa stòp nos di hasi Dios su boluntat. I hopi hende den mundu ta hasiendo loke Diabel ke, pasobra hopi ta divorsiá, biba huntu sin kasa i aseptá matrimonio homoseksual. Pero nos sí no ta imitá kondukta ku pa mundu ta normal. Nos ta imitá Kristu. (Efe. 4:17-21) Ademas, Beibel ta urgi nos pa “bisti e armadura kompleto ku Dios ta duna” pa asina nos por resistí Diabel i su demoñonan ku éksito.—Lesa Efesionan 6:10-13.

“SIGUI KANA DEN AMOR”

18. Kiko ta e klave pa union?

¹⁸ E klave pa union ta amor. Komo ku nos ta stima Yehova, Hesukristu i nos próhimo, nos ta determiná “pa mantené e union di spiritu den e vínkulo di pas.” (Efe. 4:3-6) Hesus a hasi orashon tokante e klase di amor ei, bisando: “Mi no ta pidi bo pa esakinan so, ma tambe pa esnan ku pone fe den mi pa medio di nan palabra; pa nan tur por ta ún, meskos ku abo, Tata, ta den union ku mi i ami ta den union ku bo, pa nan tambe por ta den union ku nos. . . . I mi a hasi bo nòmber konosí na nan i lo mi sigui hasié konosí, pa nan por demostrá e amor ku bo a stima mi kuné i pa mi por ta den union ku nan.”—Huan 17:20, 21, 26.

19. Kiko bo ta determiná pa hasi?

¹⁹ P’esei, si debí na imperfekshon nos tin un karakter ku ta difísil pa kambia, laga amor motivá nos pa hasi orashon meskos ku e salmista, kende a pidi Dios: “Uni mi kurason pa teme bo nòmber.” (Sal. 86:11) I laga nos ta determiná pa resistí Diabel su esfuerso pa alehá nos for di nos Tata amoroso i di nos rumannan. Sí, laga nos traha duru pa “imitá Dios, komo yunan stimá, i sigui kana den amor,” tantu den famia, den sirbishi komo den kongregashon.—Efe. 5:1, 2.

[Preguntanan di Estudio]

[Plachi na página 29]

E ta laga su ofrenda na altar i ta bai hasi pas ku su ruman

[Plachi na página 31]

Mayornan, siña boso yunan mustra rèspèt