HOPI hende ku ta kere den Dios no por splika dikon nan ta kere den dje. Nan no por splika tampoko dikon hopi bes religion ta un fuente di problema ni dikon Dios ta permití sufrimentu. E úniko kos ku nan por hasi ta resa na un Dios ku nan no konosé.

No opstante, nos por tin un bon relashon ku Dios si nos siña konos’é. Mas bo konosé Dios, mas bo ta stim’é i balor’é. I bo fe den dje lo krese. De echo, fe berdadero ta basá riba evidensia. (Hebreonan 11:1) Ora bo haña sa e bèrdat tokante Dios, bo ta siña konos’é i bo por papia kuné meskos ku bo ta papia ku un amigu. At’akí algun eksperensia di personanan ku tabatin kustumber di hasi orashon maske nan tabata duda ku Dios ta eksistí.

▪ Patricia, kende nos a menshoná den e promé artíkulo, a konta: “Un dia, mi tabata huntu ku un grupo di mas o ménos dies amigu. I nan a kuminsá papia tokante religion. Mi a bisa nan ku mi a kaba di sali for di kas pa mi no tende e diskushon entre mi tata, kende tabata un ateista, i un Testigu di Yehova ku a yama na nos kas. Anto ún di mi amigunan a bisa mi: ‘Kisas e Testigunan di Yehova tin e bèrdat.’

Un otro a bisa: ‘Dikon nos no ta bai un di nan reunionnan pa averiguá esei?’ I esei ta loke nos a hasi. Aunke nos tabatin nos dudanan, algun di nos a sigui asistí na e reunionnan djis pasobra e Testigunan tabata masha kariñoso.

Pero un djadumingu, mi a tende algu ku a kambia mi pensamentu. E oradó a splika dikon hende ta sufri. Nunka mi tabata sa ku Dios a krea hende perfekto i ku ta pa motibu di ún hende piká i morto a pasa pa henter humanidat. E oradó a splika tambe dikon Hesus mester a muri pa hende por haña loke e promé hòmber a tira afó. * (Romanonan 5:12, 18, 19) Diripiente, mi a komprondé tur kos. I mi a bisa den mi mes, ‘Di bèrdat tin un Dios ku ta interesá den nos!’ Mi a sigui studia Beibel i pronto, pa promé biaha den mi bida, mi por a hasi orashon na un persona ku ta eksistí di bèrdat.”

▪ Allan, menshoná tambe den e promé artíkulo, a konta: “Un dia, Testigunan di Yehova a yama na nos kas i a papia ku mi kasá tokante bida pa semper aki riba tera. I komo ku el a haña esaki interesante, el a invitá nan paden. Mi no a gusta e kos ei niun tiki. P’esei, mi a yama mi kasá bin tende den kushina, i mi a bis’é: ‘Stòp di hasi ko’i kèns. No laga e hendenan ei gaña bo.’

 El a bisa mi: ‘Wèl, abo bai serka nan i demostrá ku nan ta gaña.’

Ta klaru ku mi no por a proba nada. Pero e Testigunan tabata masha amabel, i nan a duna mi un buki ku ta splika e orígen di bida: Si bida a bini di evolushon òf kreashon. E buki a splika e asuntu asina bon i lógiko ku mi kier a siña mas tokante Dios. Mi a kuminsá studia Beibel ku e Testigunan, i pronto mi a realisá ku loke Beibel ta siña ta diferente for di loke mi tabata pensa di religion. Mas mi a siña konosé Yehova, mas spesífiko mi orashonnan a bira. Mi a pidi Dios yuda mi kambia sierto aspektonan di mi karakter. I Yehova a kontestá mi orashonnan.”

▪ Andrew, kende ta biba na Inglatera, a bisa: “Maske mi tabatin mi mes opinion i masha interes den siensia, mi tabata kere den evolushon djis pasobra hende tabata bisa ku e ta un teoria sientífikamente probá. I debí na tur e kosnan malu ku ta sosodé, mi no kier a kere den Dios.

Tòg, tin biaha mi tabata pensa: ‘Si tin un Dios ei riba, mi ke sa dikon tur e kosnan akí  ta sosodé: Dikon tin asina tantu krímen i guera?’ I ora mi tabata den situashon difísil, tin biaha mi tabata resa pidi yudansa, sin sa na ken mi tabata dirigí mi mes.

Un persona a duna mi kasá un tratado di Testigunan di Yehova ku tabatin komo título: E Mundu Aki Lo Sobrebibí? Hopi bes mi tabata hasi mi mes e pregunta ei. E tratado a pone mi para ketu i puntra mi mes: ‘Ta bale la pena analisá loke Beibel ta siña?’ Un poko tempu despues, miéntras mi tabata ku fakansi, un hende a duna mi e buki E Bijbel—e Palabra di Dios of e palabra di hende? Ora mi a realisá ku Beibel ta na armonia ku siensia, mi kier a siña mas di Beibel. P’esei, manera un Testigu di Yehova a ofresé mi un estudio di Beibel, mi a aseptá mesora. Ora mi a komprondé kiko ta Yehova su propósito pa humanidat, mi a kuminsá mir’é komo un persona real ku ken mi por papia libremente den orashon.”

▪ Jane, un señora ku a lanta komo protestant na Lònden, a bisa: “E hipokresia ku mi tabata mira den religion i e tantísimo sufrimentu ku tin na mundu a pone mi pèrdè interes den religion. Ademas, mi a stòp ku mi estudio universitario i a kuminsá kanta i toka guitara pa sèn. Ta e tempu ei mi a konosé Pat. El a lanta komo katóliko pero e tambe a stòp di kere den Dios, meskos ku mi.

Nos tabata biba den un kas bandoná huntu ku algun otro hóben ku tambe a stòp di bai skol i ku tabata interesá den e religionnan di Oriente. Nos tabata diskutí te den oranan lat di anochi tokante e propósito di bida. Aunke ami ku Pat no tabata kere den Dios, nos tabata kere sí ku mester tabatin un forsa ku a krea tur kos.

Despues ku nos a muda bai nort Inglatera pa buska trabou komo músiko, nos yu hòmber a nase. Un anochi el a bira malu, i mi a haña mi ta hasi orashon na e Dios ku mi no tabata kere den dje. Poko tempu despues, ami ku Pat tabatin problema ku otro; p’esei, mi a kohe nos bebi i a bai lag’é. Atrobe mi a resa pidi yudansa por si a kaso tabatin un persona ta skucha. Mi no tabata sa, pero Pat tambe a hasi orashon.

Mas despues riba e mesun dia ei, dos Testigu di Yehova a bishitá Pat i a mustr’é algun konseho práktiko den Beibel. Pat a yama mi i a puntra mi si mi ta dispuesto pa studia Beibel ku Testigunan di Yehova huntu kuné. No a dura muchu ku nos a komprondé ku pa agradá Dios, nos mester kasa. Pero siendo ku nos relashon no tabata masha bon, esei a parse un desafio.

Ma nos kier a sa mas tokante kumplimentu di profesia bíbliko, tokante e Reino di Dios i tambe dikon tin asina tantu sufrimentu. Gradualmente, nos a komprondé ku Dios ta interesá den hende i nos a sinti nos motivá pa hasi loke e bisa; p’esei, nos a kasa. Ku e sabiduria di e Palabra di Dios nos a lanta nos tres yunan. Nos ta konvensí ku Yehova a skucha nos orashonnan.”

Analisá e Evidensianan

Meskos ku miónes di otro hende, e personanan sitá den e artíkulo akí no a laga religion falsu gaña nan ma a buska pa sa dikon Dios ta permití sufrimentu. Bo a ripará kiko a yuda konvensé kada un di nan ku Yehova realmente ta skucha orashon? Sí, komprondementu eksakto di Beibel.

Abo ke analisá e evidensianan ku Dios ta eksistí? Testigunan di Yehova gustosamente ke yuda bo haña sa e bèrdat tokante Yehova i kon bo por tin un bon relashon kuné, “[Esun] ku ta skucha orashon.”—Salmo 65:2.

[Nota]

[Komentario na página 10]

“Ora mi a komprondé kiko ta Yehova su propósito pa humanidat, mi a kuminsá mir’é komo un persona real ku ken mi por papia libremente den orashon”

[Komentario na página 9]

Fe berdadero ta basá riba evidensia, i pa nos por tin un fe asina, nos mester tin deseo pa sa e bèrdat tokante Dios