ALGUN hende ta hasi orashon, pero nan ta duda ku Dios ta eksistí. Dikon nan ta duda? Podisé ta pa motibu di e sufrimentu ku tin na mundu. Abo a yega di puntra bo mes dikon Dios ta permití sufrimentu?

Akaso el a krea hende pa nan ta imperfekto i sufri? Lo ta difísil pa respetá un dios ku ke pa hende sufri, no ta bèrdat? Pensa riba esaki: Suponé bo ta atmirando un outo nobo-nobo, i diripiente bo ta ripará ku e outo tin un sla. Lo bo asumí ku ta e fabrikante a diseñá e outo asina? Klaru ku nò! Mas bien, lo bo pensa ku e outo tabata bon-bon ora el a sali di fábrika i ku ta algu otro òf un persona a okashoná e daño.

Awor, na ki konklushon nos ta yega ora nos ta atmirá e órden i diseño maravioso ku tin den naturalesa i a la bes ta mira e káos i korupshon ku tin na mundu? Beibel ta bisa ku Dios a krea e promé pareha humano perfekto pero ku ta nan mes falta ku nan a bira imperfekto. (Deuteronomio 32:4, 5) E bon notisia ta ku Dios a primintí ku lo e drecha e daño akí i ku lo e hasi sigur ku hende obediente lo bira perfekto. Pero, dikon e ta warda asina tantu pa hasi esei?

Dikon Asina Tantu Tempu?

E kontesta pa e pregunta akí tin di haber ku e kuestion tokante ken tin derecho di goberná humanidat. Nunka tabata Yehova su propósito pa hende goberná nan mes. Nan mester obedesé é komo nan Rei. Beibel ta bisa: “No ta keda na hende pa dirigí su pasonan.” (Yeremías 10:23) Pero lamentablemente, Adam ku Eva a skohe pa rebeldiá kontra e gobernashon di Dios, i e akto di maldat ei a pone ku nan a bira  pekadó. (1 Huan 3:4) Nan a bira imperfekto i a kousa daño na nan mes i na nan yunan.

Pa míles di aña, Yehova a permití hende goberná nan mes. I historia a mustra ku hende no tin e kapasidat pa hasi esei: Tur gobièrnu humano ta kousa sufrimentu. Niun di nan no por kaba ku guera, krímen, inhustisia òf malesa.

Kon Dios Lo Drecha e Daño?

Beibel ta primintí ku pronto Dios lo trese un mundu nobo, kaminda hustisia lo reina. (2 Pedro 3:13) Pero ta solamente hende ku ta skohe pa demostrá amor na otro i na Dios por biba den e mundu ei.—Deuteronomio 30:15, 16, 19, 20.

Beibel ta bisa tambe ku durante “e dia di huisio” ku ta aserkando rápidamente, Dios lo kaba ku sufrimentu i ku esnan ku ta kousa esaki. (2 Pedro 3:7) Despues, Hesukristu, e Rei ku Dios a nombra, lo goberná riba humanidat obediente. (Daniel 7:13, 14) Kiko e gobièrnu ei lo logra? Beibel ta bisa: “E humildenan lo heredá e tera, i lo deleitá nan mes den pas abundante.”—Salmo 37:11.

Komo Rei selestial, Hesus lo eliminá malesa, behes, morto i tur otro daño kousá pa e rebelion kontra Yehova, “e fuente di bida.” (Salmo 36:9) Hesus lo kura tur hende ku aseptá su gobernashon amoroso. Bou di su gobernashon, e siguiente promesanan bíbliko lo bira realidat:

▪ “Ningun habitante lo no bisa: ‘Mi ta malu’; e pueblo ku ta biba ayanan lo wòrdu pordoná pa nan inikidat.”—Isaías 33:24.

▪ Dios lo “seka tur lágrima for di nan wowo, i lo no tin morto mas; ni tristesa ni  sklamashon ni doló lo no tin mas. E kosnan ku tabata pasa ántes no t’ei mas.”—Revelashon 21:4.

No ta un konsuelo pa sa ku pronto Dios lo kumpli ku su promesa i kaba ku sufrimentu? Pues, e echo ku e ta permití sufrimentu awor, no mester pone nos pensa ku e no ta skucha nos orashonnan.

Dios ta eksistí, i e ta skucha bo. E ta tende asta bo ekspreshonnan di doló i tristesa. I e ta ansioso pa e dia yega ku bo por disfrutá di un bida liber di tur duda i doló.