SI TIN un Persona ku ta skucha orashon, esei mester ta e Kreador. Ken otro por lesa nos pensamentunan ku no ta e Kreador, esun ku a krea selebro humano? Ken otro por kontestá nos orashonnan i brinda nos e yudansa ku nos tin mester? Pero, kisas bo ta puntra bo mes: ‘Ta sabí pa kere ku ta eksistí un Kreador?’

Hopi hende ta di opinion ku pa kere den un Kreador, bo mester nenga evidensia di siensia moderno. Pero e pensamentu ku kere den Dios ta na konflikto ku loke siensia ta siña, no ta kuadra ku realidat.

▪ Segun un enkuesta resien ku nan a hasi na 21 di e mihó universidatnan na Merka, un tersera parti so di e 1.646 profesornan di siensia ku a partisipá na esaki a skohe e opshon ku ta bisa: “Mi no ta kere den Dios.”

Pues, realidat ta ku hopi sientífiko ta kere ku Dios ta eksistí.

Evidensia Ku Tin un Kreador

Akaso nos mester djis aseptá ku tin un Skuchador di orashon sin ku nos tin prueba di esaki? Klaru ku nò. E idea ku fe ta enserá kere siegamente den algu ku bo no por proba ta robes. Beibel ta definí fe komo ‘demostrashon kla di realidatnan ku nos no ta mira.’ (Hebreonan 11:1) Pensa riba esaki: Nos no por mira ondanan di radio, pero e echo ku nos por skucha hende papia na radio ta proba klaramente ku onda ta eksistí, pasobra ta e ondanan ta transmití stèm. Di igual manera, aunke nos no por mira Esun ku ta skucha orashon, tin prueba ku ta konvensé nos ku e ta eksistí.

Ki prueba nos tin ku Dios ta eksistí? Nos tin ku djis wak rònt di nos. Beibel ta bisa: “Naturalmente, ta hende a traha tur kas, ma esun ku a traha tur kos ta Dios.” (Hebreonan 3:4) Abo ta di akuerdo ku e rasonamentu  lógiko akí? Si bo para ketu i pensa riba e órden ku tin den universo, e manera ku bida a kuminsá òf riba e diseño di mas kompliká na mundu, esta, esun di nos selebro, bo ta yega na e konklushon ku mester tin algu superior na nos. *

Pero kreashon no por siña nos tur loke nos mester sa tokante Dios. Ora nos ta kontemplá evidensia di Dios den kreashon ta komo si fuera nos ta tende pasonan di un persona ku ta aserkando un porta. Nos sa ku tin un hende tras di e porta, pero pa haña sa ta ken, nos mester habri e porta. Di mes manera, pa identifiká e Persona tras di kreashon, nos tin ku habri un porta.

Kua porta? Beibel. Sí, esaki ta e porta ku ta hiba na konosementu tokante Dios. Ora bo habri e porta ei i analisá algun di su profesianan i nan kumplimentu, lo bo haña prueba ku Dios ta eksistí. * Pero lo bo haña sa mas ku esei, pasobra e relatonan enkuanto Dios su trato ku hende ta mustra ki klase di persona e Skuchador di orashon ta.

Ki Klase di Persona e Skuchador di Orashon Ta?

Beibel ta mustra ku e Skuchador di orashon ta un persona real i ku nos por siña konos’é. I esei ta lógiko, pasobra ta un persona real por skucha i komprondé nos. P’esei ta un konsuelo pa lesa: “Abo ku ta  skucha orashon, serka bo tur hende ta bini.” (Salmo 65:2) Sí, Esun ku ta skucha orashon ta presta atenshon ora hende ta resa na dje ku fe. I e Persona ei tin un nòmber. Beibel ta bisa: “Yehova ta leu for di hende malbado, pero e ta tende orashon di hende hustu.”—Proverbionan 15:29, NW.

Yehova tin sintimentu. E ta “e Dios di amor” i “e Dios felis.” (2 Korintionan 13:11; 1 Timoteo 1:11) Beibel ta bisa tambe ku Yehova “tabata tristu den su kurason” tempu ku tera tabata pèstá ku maldat. (Génesis 6:5, 6) P’esei, e idea ku Dios ta pone hende sufri pa tèst nan no ta bèrdat. Beibel ta bisa: “Leu sea di Dios di hasi maldat.” (Yòb 34:10) Pero, kisas bo ta puntra bo mes: ‘Si e Kreador ta todopoderoso, dikon e ta permití sufrimentu?’

Yehova a duna nos boluntat liber, i esei ta mustra nos ki klase di persona e ta. Nos ta kontentu ku nos tin libertat pa skohe kon nos ke biba, no ta bèrdat? Pero lamentablemente, hopi hende ta hasi mal uso di nan libertat i ta kousa hopi sufrimentu, pa nan mes i pa otro hende. Awor e pregunta ta: Kon Dios lo eliminá sufrimentu sin kita boluntat liber for di hende? Nos lo haña e kontesta den e siguiente artíkulo.

[Nota]

[Kuadro na página 5]

Religion Ta Pone Bo Duda?

Lamentablemente, ta religion ta pone ku hopi hende ta duda ku tin un Dios kompasivo ku ta skucha orashon. Asta hende ku tabata deboto a stòp di kere den Dios pa motibu ku religion ta involukrá nan mes den guera, terorismo i ta tolerá abusu di mucha.

Pero kon bini religion ta kousa asina tantu problema? E kontesta ta masha simpel: Hende malbado ta hasi maldat den nòmber di religion. Beibel a profetisá ku algun hende lo hasi mal uso di e fe kristian pa kometé tur sorto di maldat. Apòstel Pablo a bisa superintendentenan kristian: “For di meimei di boso mes lo lanta hòmbernan ku lo trose e bèrdat pa pone e disipelnan bai nan tras.”—Echonan 20:29, 30.

Dios ta aboresé religion falsu. De echo, su Palabra, Beibel, ta mustra ku religion falsu ta responsabel pa “sanger . . . di tur esnan ku a ser matá riba tera.” (Revelashon 18:24) Religion falsu ta kulpabel di sanger pasobra nan no a siña hende e bèrdat tokante Dios, kende su kualidat prinsipal ta amor.—1 Huan 4:8.

Esun ku ta skucha orashon ta sinti pa esnan ku a bira víktima di religion opresivo. Pronto, su amor lo motiv’é pa laga su Yu husga tur religion falsu. Hesus a bisa: “Hopi hende lo bisa mi riba e dia ei: ‘Señor, Señor, nos no a profetisá den bo nòmber?’ . . . Sinembargo, lo mi bisa nan públikamente e ora ei: ‘Mi no konosé boso! Bai for di mi, hasidónan di maldat!’”—Mateo 7:22, 23.