Komportá Boso Mes Komo Siudadano di e Reino
“Komportá boso na un manera digno di e bon notisia.”—FLP. 1:27.
1, 2. Dikon e konseho ku Pablo a duna e kongregashon na Filipo tabatin un nifikashon spesial?
APÒSTEL Pablo a enkurashá e kongregashon di Filipo pa nan “komportá [nan mes] na un manera digno di e bon notisia.” (Lesa Filipensenan 1:27.) E verbo griego ku Pablo a usa pa e ekspreshon “komportá boso” por nifiká tambe “komportá boso manera siudadano.” E ekspreshon akí tabatin un nifikashon spesial pa e kongregashon di Filipo. Dikon? Ta parse ku e stat Filipo tabata un di e poko statnan ku a haña siudadania romano. Tantu e filipensenan komo e romanonan tabata masha orguyoso di nan siudadania, pasobra asina nan por a disfrutá di e protekshon ku lei romano tabata brinda i di otro benefisionan ku masha poko hende tabatin.
2 Pero e rumannan di e kongregashon di Filipo tabatin un motibu mas importante pa ta orguyoso. Pablo a rekordá nan ku, komo kristian ungí, nan siudadania ta “den shelu.” (Flp. 3:20) Nan tabata siudadano di e Reino di Dios i no djis di un imperio humano. Komo tal, nan tabata disfrutá di protekshon i benefisionan ku ningun otro gobièrnu por a brinda.—Efe. 2:19-22.
3. (a) Ken tin e oportunidat di bira siudadano di e Reino di Dios? (b) Kiko nos lo analisá den e artíkulo akí?
3 Pablo su konseho pa “komportá boso” manera siudadano tabata prinsipalmente pa e personanan ku lo goberná ku Kristu den shelu. (Flp. 3:20) Pero e konseho akí ta konta tambe pa tur hende ku ke biba riba tera komo siudadano di e Reino di Dios. Dikon? Pasobra nos tur ta sirbi e mesun Rei, Yehova, kende tin e mesun rekisitonan pa tur su sirbidónan. (Efe. 4:4-6) Awe, hende ta hasi masha esfuerso pa bira siudadano di un pais próspero. Pero, e privilegio pa bira siudadano di e Reino di Dios ta di muchu mas balor. Pa nos por haña un mihó idea ki un gran privilegio esei ta, laga nos konsiderá algun similaridat entre e rekisitonan pa bira siudadano di un gobièrnu humano i esnan pa bira siudadano di e Reino di Dios. Nos lo analisá tres rekisito ku nos mester kumpli kuné pa nos por keda siudadano di e Reino.
ALGUN REKISITO PA BIRA SIUDADANO
4. Kiko e idioma puru ta, i ki ora un persona por bisa ku e ta papia e idioma puru?
4 Siña e idioma. Algun gobièrnu ta eksigí pa e hendenan ku ke bira siudadano di nan pais siña e idioma di e pais. Pero tin hende ta siña dominá e idioma di un pais basta aña despues ku nan a bira siudadano di e pais ei. Kisas nan ta siña e reglanan di gramátika masha lihé, pero ta tuma mas tempu pa siña pronunsiá sierto palabranan korektamente. Di mes manera, e Reino di Dios ta rekerí pa su siudadanonan siña loke Beibel ta yama e “idioma puru.” (Lesa Sofonías 3:9. *) Ki idioma esei ta? E idioma puru ta e bèrdat ku Beibel ta siña nos tokante Dios i su propósitonan. Papia e idioma puru ta nifiká biba segun e lei- i prinsipionan di Dios. Kisas, ta masha lihé nos a siña e siñansanan básiko di Beibel pa nos por a batisá i bira siudadano di e Reino di Dios. Pero asta despues di nos boutismo, ainda nos tin ku sigui hasi esfuerso pa siña papia e idioma puru mas i mas mihó. Kon asina? Nos mester sigui hasi esfuerso pa apliká siñansa bíbliko lo mihó ku nos por.
5. Dikon nos mester siña tur loke nos por di e historia di Dios su organisashon?
5 Studia historia di e gobièrnu. Un persona ku ke bira siudadano di un pais probablemente tin ku sa tambe historia di gobernashon di e pais. Di mes manera, si un hende ke bira siudadano di e Reino di Dios, e mester siña tur loke e por tokante e Reino. Tuma por ehèmpel e yunan di Koré, kendenan a sirbi na Israel. Nan ehèmpel ta digno di imitá, pasobra nan tabata stima Herúsalèm i su lugá di adorashon. Ademas, nan tabata gusta konta e historia di e stat ei, no pasobra Herúsalèm tabata un stat bunita, pero pa loke e stat ei i e lugá di adorashon a representá. E tabata “e stat di e gran Rei,” Yehova, kaminda hende tabata bini pa siña e Lei di Yehova i ador’é. I ta e hendenan ei ku tabata kai bou di e gobernashon di Yehova, e Rei di Herúsalèm, tabata disfrutá di Su miserikòrdia. (Lesa Salmo 48:1, 2, 9, 12, 13.) Awor kiko di abo? Abo tin deseo di studia i konta otro hende e historia di Yehova su organisashon, meskos ku e yunan di Kore a hasi den nan tempu? Mas bo siña tokante Yehova su organisashon i di e manera ku e ta yuda su pueblo, mas real su Reino ta bira pa bo. I esaki lo duna bo mas smak di prediká e bon notisia di Reino.—Yer. 9:24; Luk. 4:43.
6. Dikon ta komprendibel ku Yehova ke pa nos siña i obedesé e lei- i prinsipionan di e Reino?
6 Siña konosé e leinan. Gobièrnunan humano ta eksigí pa e siudadanonan di nan pais siña i obedesé nan leinan. Ta di komprondé anto ku Yehova tambe ta spera ku tur siudadano di su Reino ta siña i obedesé su lei- i prinsipionan. (Isa. 2:3; Huan 15:10; 1 Huan 5:3) Hopi bes, e leinan ku hende ta bini kuné ta defisiente i inhustu. Pero “e lei di SEÑOR ta perfekto.” (Sal. 19:7) Abo tin “delisia” den e lei di Dios i ta lesa su Palabra tur dia? (Sal. 1:1, 2) E úniko manera ku nos por siña konosé e leinan di Dios ta di studia su Palabra. I niun hende no por hasi esei pa nos.
SIUDADANONAN DI E REINO DI DIOS TA STIMA DIOS SU LEINAN
7. Dikon siudadanonan di e Reino di Dios ta diferente?
7 Pa nos por keda siudadano di e Reino, nos mester konosé i stima Dios su leinan. Hopi hende ta bisa ku nan ta di akuerdo ku e lei- i prinsipionan di e pais unda nan ta biba. Pero ora un lei no ta kumbiní nan, i no tin ningun hende ta wak, nan no ta kumpli kuné. Hopi biaha, nan ta sigui lei djis pa ‘komplasé hende.’ (Kol. 3:22) Pero siudadanonan di e Reino di Dios ta biba segun un norma mas elevá: Nan ta kla pa obedesé Dios su leinan, asta si niun hende no ta wak. Dikon? Pasobra nan ta stima e Dunador di lei.—Isa. 33:22; lesa Lukas 10:27.
8, 9. Kon bo por sa si di bèrdat bo ta stima e leinan di Dios?
8 Awor, kon bo por sa si di bèrdat bo ta stima e leinan di Dios? Wèl, para ketu un ratu i pensa riba e manera ku bo ta reakshoná ora bo haña konseho riba algu ku tin di haber ku gustu personal. Tuma por ehèmpel bo manera di bisti i peña. Kisas, promé ku bo a bira siudadano di e Reino di Dios, bo manera di bisti tabata slòns òf provokativo. Pero segun ku bo amor pa Dios a krese, bo a siña bisti na un manera ku ta duna gloria na dje. (1 Tim. 2:9, 10; 1 Ped. 3:3, 4) Podisé bo ta haña ku awor sí bo pañanan ta na òrdu. Pero kiko si un ansiano bisa bo ku hopi ruman den kongregashon tin problema ku bo manera di bisti? Kon lo bo reakshoná? Lo bo bini ku èksküs, lo bo rabia òf nenga di hasi kambio? Un di e leinan di mas importante ku siudadanonan di e Reino mester obedesé ta bisa ku nos mester imitá Kristu. (1 Ped. 2:21) I apòstel Pablo a bisa ku ni “Kristu no a agradá su mes.” P’esei, Pablo su konseho ta pa ‘kada un di nos agradá nos próhimo pa su bon i pa fortales’é.’ (Rom. 15:2, 3) Un kristian maduro semper ta dispuesto pa mantené pas den kongregashon i ta evitá di hasi kos ku por molestiá konsenshi di otro hende.—Rom. 14:19-21.
9 Awor, pensa un ratu riba bo aktitut enkuanto sèks i matrimonio. Hende ku no ta siudadano di e Reino di Dios kisas no ta mira nada malu den homoseksualidat, pornografia, adulterio òf divorsio. Pero siudadanonan di e Reino a siña pensa di antemano riba e konsekuensianan ku nan echonan por tin pa nan mes i otro hende. Ta bèrdat ku algun di nan tabata hiba un bida inmoral promé ku nan a bira siudadano di e Reino. Pero awor, nan ta mira sèks i matrimonio komo regalo di Dios i ta balorá Yehova su normanan elevá. Nan sa ku personanan ku ta desobedesé Yehova su leinan enkuanto sèks i matrimonio no por bira siudadano di e Reino di Dios. (1 Kor. 6:9-11) I nan ta konsiente tambe ku nan kurason por gaña nan. (Yer. 17:9) P’esei nan ta apresiá tur spièrtamentu spesífiko ku nan ta haña pa yuda nan sigui kumpli ku e leinan di Dios.
SIUDADANONAN DI E REINO DI DIOS TA APRESIÁ SPIÈRTAMENTU
10, 11. Di kiko e Reino di Dios ta spièrta nos, i kon nos ta sinti ora nos haña e spièrtamentunan akí?
10 Tin biaha gobièrnunan sa spièrta nan siudadanonan enkuanto sierto kuminda òf medisina. Ta klaru ku no ta tur kuminda òf medisina ta malu, pero si un sierto produkto ta forma peliger pa e siudadanonan, e gobièrnu su obligashon ta di spièrta nan pa protehá nan. Di mes manera, e Reino di Dios ta spièrta su siudadanonan di sierto peligernan ku por daña nan relashon ku Dios. Internet, por ehèmpel, ta un medio práktiko pa hende komuniká ku otro i eduká i entretené nan mes. Yehova su organisashon tambe ta hasi bon uso di Internet. Sinembargo, tin hopi website ku ta forma un peliger pa hende ku ke keda moralmente i spiritualmente limpi. Websitenan ku ta promové pornografia, por ehèmpel, ta sumamente peligroso. Pa dékadanan kaba, e esklabo fiel ta spièrta nos tokante e tipo di websitenan akí. I nos ta masha kontentu ku e spièrtamentunan akí.
11 Tin un otro tipo di website ku a bira masha popular últimamente: retnan sosial. Si nos usa nan ku koutela, nan por ta masha práktiko. Pero, nan por ta perhudisial tambe. E sitenan akí fásilmente por pone nos den kontakto ku mal kompania. (1 Kor. 15:33) P’esei, no ta nada straño ku Yehova su organisashon ta spièrta nos na un manera balansá enkuanto e uso di e websitenan akí. Abo a lesa tur e artíkulonan ku e esklabo fiel a publiká resientemente tokante uso di ret sosial? Telefòn selular tambe por ta masha útil si nos us’é na un manera sabí. Bo a lesa artíkulonan ku ta kontené informashon importante enkuanto uso di telefòn selular? Lo no ta sabí pa hasi uso di ret sosial òf telefòn selular sin lesa e informashonnan akí promé. * Dikon? Pasobra esei lo ta meskos ku usa un remedi fuerte sin lesa su instrukshon promé.
12. Dikon ta un bobedat pa no hasi kaso di spièrtamentu?
12 Esnan ku no ta hasi kaso di e spièrtamentunan di e esklabo fiel sin duda lo kousa sufrimentu pa nan mes i pa nan sernan kerí. Por ehèmpel, algun a bira adikto na pornografia òf ta kometé inmoralidat seksual i ta gaña nan mes ku Yehova no ta mira loke nan ta hasi. Ta un gran bobedat pa pensa ku nos por skonde pa Yehova! (Pro. 15:3; lesa Hebreonan 4:13.) Pero Yehova ta un Dios miserikòrdioso, i p’esei e ta urgi su representantenan riba tera pa yuda esnan ku a kometé piká. (Gal. 6:1) Sinembargo, meskos ku gobernantenan humano lo no permití hende ku kometé sierto aktonan ilegal keda siudadano di nan pais, Yehova tampoko lo no permití hende ku ta violá su leinan i ku no ta arepentí sigui ta siudadano di su Reino. * (1 Kor. 5:11-13) Pero hende ku arepentí i stòp di hasi loke ta malu por tin un bon relashon atrobe ku Yehova i keda siudadano di e Reino. (2 Kor. 2:5-8) Ki un gran privilegio nos tin di sirbi un Rei asina amoroso!
SIUDADANONAN DI E REINO DI DIOS TA BALORÁ EDUKASHON
13. Kon siudadanonan di e Reino di Dios ta demostrá ku nan ta balorá edukashon?
13 Hopi gobièrnu ta hasi masha esfuerso pa eduká nan siudadanonan. Nan ta perkurá skolnan pa hende por haña edukashon básiko i siña fishi. Siudadanonan di e Reino di Dios ta kontentu ku tin e skolnan akí i ta hasi bon uso di nan pa siña lesa, skirbi i siña un fishi pa por sostené nan mes finansieramente. Pero pa nan, e edukashon ku nan ta haña komo siudadano di e Reino ta muchu mas balioso. E kongregashon kristian ta animá nos pa siña lesa i skirbi. Mayornan ta ser animá pa lesa pa nan yunan. Tur luna, e esklabo fiel ta publiká E Toren di Vigilansia, La Atalaya i ¡Despertad! ku ta kontené hopi informashon bíbliko. Si bo lesa un par di página pa dia, lo bo por keda al dia ku e edukashon ku Yehova ta perkurá.
14. (a) Ki entrenamentu nos ta risibí? (b) Kua sugerensia pa e Adorashon Komo Famia bo a pone na práktika?
14 Tur siman, siudadanonan di e Reino ta risibí entrenamentu na nan reunionnan di kongregashon. E Skol di Ministerio Teokrátiko, por ehèmpel, tin mas ku seis dékada ta yuda studiantenan di Beibel bira maestro efikas di e Palabra di Dios. Abo ta inskribí den e skol akí? Ademas, e último añanan, e esklabo fiel a enfatisá e importansia di tene un anochi di Adorashon Komo Famia tur siman. Esaki ta yuda uni famianan mas. Bo a logra apliká e sugerensianan publiká den nos literatura? *
15. Kiko ta un di e privilegionan di mas grandi ku nos tin?
15 Ora di elekshon, hopi siudadano ta hasi esfuerso pa haña hende pa sostené nan partido polítiko. Algun ta asta bai di kas pa kas en buska di e hendenan akí. Rònt mundu, siudadanonan di e Reino di Dios ta hasi nan máksimo esfuerso pa sostené e Reino, dunando testimonio riba kaya i predikando di kas pa kas. Manera e artíkulo anterior a bisa, E Toren di Vigilansia, ku tin e propósito di anunsiá e Reino di Yehova, ta e revista mas distribuí na mundu. Ta un gran onor pa konta otro hende tokante e Reino di Dios. Abo ta un predikadó zeloso di e bon notisia di e Reino di Dios?—Mat. 28:19, 20.
16. Kon bo por demostrá ku bo ta un bon siudadano di e Reino di Dios?
16 Pronto e Reino di Dios lo ta e úniko gobièrnu ku lo goberná tera. E tempu ei, ta e leinan di e Reino di Dios so lo guia hende. Abo lo t’ei? Si esei ta bo deseo, for di awor bo tin ku duna prueba ku bo ta un bon siudadano di e Reino di Dios. Kon? Laga tur e desishonnan ku bo tuma ta desishonnan ku ta duna gloria na Yehova Dios.—1 Kor. 10:31.
[Nota]
^ par. 4 Sofonías 3:9 (NW): “Pasobra e ora ei lo mi duna pueblonan e kambio pa un idioma puru, pa nan tur por invoká e nòmber di Yehova, pa nan sirbié skouder ku skouder.”
^ par. 11 Wak, por ehèmpel, e ¡Despertad! di 22 di òktober 2002, página 18-20; òktober 2008, página 4-9; yüli 2011, página 24-27; ougùstùs 2011, página 10-13; febrüari 2012, página 3-9.
^ par. 12 Wak La Atalaya di 15 di mart 2012, página 30-31.
^ par. 14 Wak La Atalaya di 15 di ougùstùs 2011, página 6 i 7 i Nos Ministerio di Reino di yanüari 2011, página 3-6.
[Preguntanan di Estudio]
[Komentario na página 21]
Bo ta hasi kaso di e spièrtamentunan ku e esklabo fiel ta duna tokante Internet?
[Plachi na página 19]
Bo tin e mesun amor pa adorashon puru i su historia ku e yunan di Koré tabatin?
[Plachi na página 22]
Bo anochi di Adorashon Komo Famia por yuda abo i bo sernan kerí bira bon siudadano di e Reino di Dios
