“Skapa for di e trampa di Diabel.”—2 TIM. 2:26

1, 2. Kua trampanan di Diabel nos lo trata den e artíkulo akí?

DIABEL ta buska tur manera pa kohe sirbidónan di Yehova den trampa. Pero su intenshon no nesesariamente ta pa kaba ku nan manera un yagdó ku ta mata bestia. Su meta prinsipal ta pa gara su víktimanan bibu p’e hasi ku nan manera e ta haña ta bon.—Lesa 2 Timoteo 2:24-26.

² Un yagdó por usa vários trampa pa gara un bestia bibu. Podisé e ta lòk e bestia pa sali for di su lugá di skonde p’e por gar’é ku un las. Òf kisas e ta pone un trampa pa kohe e bestia di sorpresa. Satanas ta usa trampanan similar pa gara sirbidónan di Yehova. Si nos no ke kai den su gara, nos mester ta alerta i hasi kaso di e spièrtamentunan ku ta yuda nos identifiká su trampanan. Den e artíkulo akí nos lo trata tres trampa ku Diabel tin éksito kuné. Nan ta: (1) e kustumber di papia sin pensa, (2) miedu di hende i preshon di otronan i (3) sintimentu di kulpa innesesario. Nos lo mira tambe kon nos por evitá e trampanan akí. E siguiente artíkulo lo trata dos trampa mas ku Satanas ta usa.

NO PAPIA SIN PENSA

3, 4. Kiko por sosodé si nos no kontrolá nos lenga? Duna un ehèmpel.

³ Por lo general bestia ta safe den mondi. P’esei, pa saka algun bestia for di mondi—nan lugá di skonde—un yagdó kisas ta pega parti di e mondi na kandela di manera ku e por gara e bestianan ku ta purba di skapa. Den sentido figurativo, Diabel ta usa e mesun strategia ei: E ke pega e kongregashon kristian na kandela pa asina pone algun miembro di kongregashon kore sali for di nan refugio sigur i kai den su gara. Awor kon nos por ta kolaborando kuné, ku otro palabra, ta den su gara, sin ku nos sa?

 ⁴ Disipel Santiago a kompará nos lenga ku kandela. (Lesa Santiago 3:6-8.) P’esei, si nos no kontrolá nos lenga, nos por pega nos kongregashon na kandela. Kon esei por sosodé? At’akí un ehèmpel: Na reunion di kongregashon, nan ta anunsiá ku un ruman muhé a bira pionero regular. Despues di reunion, dos ruman muhé ta komentá riba e anunsio. Un di nan ta bisa ku e ta kontentu ku e ruman a bira pionero i ku e ta deseá pa tur kos bai bon ku e ruman. Pero e otro ta kuestioná e motibunan di e ruman i ta insinuá ku el a bira pionero djis p’e ta importante. Kua di e publikadónan akí lo bo ke komo amiga? No ta difísil pa saka afó kua di nan lo por pega e kongregashon na kandela.

5. Kiko nos mester hasi pa no usa nos lenga manera kandela?

⁵ Awor, kon nos por evitá di usa nos lenga manera kandela? Hesus a bisa: “Loke kurason ta yen di dje, boka ta papia.” (Mat. 12:34) Pues, e promé kos ku nos tin ku hasi ta analisá nos kurason. Nos ta hasi esfuerso pa evitá sintimentunan negativo ku por pone nos papia malu di otro hende? Suponé ku bo a tende ku un ruman hòmber ta hasiendo su bèst pa progresá den kongregashon. Bo ta pensa mesora ku e ta trahando duru pa hasi Yehova su kurason kontentu, òf bo ta pensa ku e ta hasié pa puru egoismo? Si mayoria di biaha bo ta reakshoná na un manera sarkástiko, kòrda ku Diabel tambe a kuestioná e motibunan di Dios su fiel sirbidó Yòb. (Yòb 1:9-11) P’esei, en bes di kuestioná e motibunan di nos rumannan, ta bon pa nos para ketu i puntra nos mes ta dikon nos ta pensa malu di nan. Realmente nos tin bon motibu pa kritiká nos rumannan? Òf ta e spiritu di mundu ku ta reina durante e último dianan akí ta influensiá nos?—2 Tim. 3:1-4.

6, 7. (a) Kiko ta algun motibu ku nos lo por tin pa kritiká otro hende? (b) Kon nos mester reakshoná ora hende insultá nos?

⁶ Ki otro motibu nos lo por tin pa kritiká otro hende? Kisas, nos ke sobresalí riba otronan. P’esei, podisé nos ta kritiká nan pa duna e impreshon ku nos ta mihó ku nan. Òf podisé esei ta un manera pa nos skonde e echo ku nos no a kumpli ku loke nos mester a hasi. Sea ku ta orguyo, envidia òf insiguridat ta pone ku nos ta kritiká otro hende, esaki semper tin un resultado negativo.

⁷ Kisas nos ta pensa ku nos tin bon motibu pa kritiká un persona. Podisé el a yega di papia malu di nos. Si ta asina mes, paga malu ku malu no ta e solushon pasobra esei lo ta meskos ku basha gasolin riba kandela. Ta pió so e situashon lo bira, nèt loke  Diabel ke. (2 Tim. 2:26) Na lugá di hasi esei, nos mester hasi loke Dios ke. Pues, nos tin ku imitá Hesus. Ora nan tabata insultá Hesus, “e no a insultá bèk;” mas bien, el a “laga su mes na enkargo di esun ku ta husga ku hustisia.” (1 Ped. 2:21-23) Hesus tabatin konfiansa ku Yehova lo a resolvé e asuntu, na Su manera i na e debido tempu. Nos tambe mester tin e mesun konfiansa ei. Ora nos ta papia kosnan edifikante, nos ta yuda mantené “pas” i “union” den kongregashon.—Lesa Efesionan 4:1-3.

NO LAGA MIEDU DI HENDE NI PRESHON DI OTRONAN SER UN TRAMPA PA BO

8, 9. Dikon Pilato a laga mata Hesus?

⁸ Ora un bestia kai den trampa, e no tin libertat mas pa bai kaminda e ke. Di mes manera, si un persona sukumbí na miedu i preshon, e ta pèrdè un grado di su libertat. (Lesa Proverbionan 29:25.) Laga nos trata dos ehèmpel di hende ku a sukumbí na preshon i miedu di hende, i wak kiko nos por siña for di nan eksperensia.

⁹ E gobernador romano Ponsio Pilato tabata sa ku Hesus tabata inosente, i aparentemente e no tabata ke hasié daño. De echo, el a bisa ku Hesus “no a hasi nada ku meresé morto.” Tòg, el a konden’é na morto. Dikon? Pasobra Pilato a sukumbí na preshon di e multitut. (Luk. 23:15, 21-25) Nan tabata grita: “Si bo laga e hòmber akí den libertat, bo no ta amigu di Sésar.” Asina nan a pone preshon riba dje pa e hasi loke nan tabata ke. (Huan 19:12) Podisé Pilato tabatin miedu di pèrdè su puesto òf asta su bida, p’esei e no laga Kristu den libertat. Pues, el a sukumbí na preshon di e multitut i a hasi presis loke Diabel tabata ke.

10. Kiko a pone ku Pedro a nenga Kristu?

¹⁰ Apòstel Pedro tabata un di Hesus su mihó amigunan. El a deklará públikamente ku Hesus tabata e Mesías. (Mat. 16:16) Ora algun disipel di Hesus a bandon’é pasobra nan no a komprondé algu ku el a bisa, Pedro sí a keda leal na dje. (Huan 6:66-69) I ora Hesus su enemigunan a bin arest’é, Pedro a usa spada pa defendé su Maestro. (Huan 18:10, 11) Pero, mas despues, miedu di hende a pone Pedro asta nenga ku e konosé Hesukristu. Pa un ratu, e apòstel akí a kai den trampa di Satanas; el a laga miedu di hende strob’é di aktua ku kurashi i keda leal na Hesus.—Mat. 26:74, 75.

11. Ki klase di preshon nos mester resistí?

¹¹ Komo kristian, nos mester resistí e preshon pa hasi loke ta desagradá Dios. Podisé nos doño di trabou òf otro hende ta preshoná nos pa ta desonesto òf pa kometé inmoralidat seksual. Na skol, hóbennan ta haña nan ku preshon di otronan pa spik, wak pornografia, huma, usa droga, bebe alkohòl òf kometé inmoralidat seksual. Kon nos por evitá ku miedu di hende òf preshon pa hasi loke ta desagradá Yehova ta bira un trampa pa nos?

12. Ki lès nos por siña for di e ehèmpel di Pilato i di Pedro?

¹² Kiko nos por a siña for di e ehèmpel di Pilato i di Pedro? Pilato no tabata sa hopi di Hesukristu, pero e tabata sa sí ku Hesus tabata inosente i ku e no tabata kualke persona. Ma falta di humildat i amor pa e Dios berdadero a pone ku Pilato a bira víktima fásil di Diabel. Di otro banda, Pedro tabatin tantu konosementu eksakto komo amor pa Dios. Pero na algun okashon Pedro no tabata modesto, e tabatin miedu di hende i el a sukumbí na preshon. Promé ku nan a arestá Hesus, Pedro a broma: “Asta si tur e otronan trompeká, ami sí lo no trompeká.” (Mar. 14:29) Pedro lo tabata mihó prepará pa e pruebanan ku el a konfrontá despues si el a konfia den Yehova meskos ku e salmista kende a kanta: “SENOR ta ku mi; lo mi no tin miedu; kiko hende por hasi mi?” (Sal. 118:6) Riba Hesus su último anochi riba tera, el a bai ku Pedro i dos otro  apòstel den e hòfi di Getsémani i a bisa nan pa keda alerta. Pero, en bes di keda vigilá, Pedro i su kompañeronan a pega soño. Hesus a lanta nan i a bisa nan: “Keda vigilá i hasi orashon pa boso no kai den tentashon.” (Mar. 14:38) Pero Pedro a bolbe pega soño, i mas despues el a laga miedu i preshon di hende domin’é.

13. Kon nos por resistí preshon pa hasi loke ta malu?

¹³ E ehèmpel di Pilato i di Pedro por siña nos un otro lès importante: Pa por resistí preshon i no sukumbí na miedu di hende, nos mester di konosementu eksakto di e bèrdat, humildat, modestia, amor i temor di Yehova. Si nos fe ta basá riba konosementu eksakto, nos lo tin kurashi pa papia ku konvikshon di nos kreensianan. Esaki lo yuda nos resistí preshon i vense miedu di hende. Ta klaru ku nunka nos no mester tin demasiado konfiansa den nos mes. Mas bien, nos mester rekonosé humildemente ku nos mester di Dios su forsa pa por resistí preshon; nos mester resa pidi Yehova su spiritu santu i laga nos amor pa Dios motivá nos pa tene su nòmber na haltu i kumpli ku su prinsipionan. Es mas, nos mester prepará nos mes pa resistí kualke tentashon ku nos por haña nos kuné. Mayornan, por ehèmpel, mester hasi orashon ku nan yunan i prepará nan pa nan por sa kon pa reakshoná ora nan pareunan preshoná nan pa hasi loke ta malu.—2 Kor. 13:7. *

NO LAGA SINTIMENTU DI KULPA SIGUI TORMENTÁ BO

14. Kon Satanas ke pa nos pensa di nos erornan di pasado?

¹⁴ Tin biaha, yagdónan ta mara un tronkon pisá òf un baranka na un liña i kolog’é na un palu ku ta riba e kaminda ku e bestianan ku nan ke kohe den trampa ta frekuentá. E yagdó ta pone e sobrá liña abou kaminda e bestianan tin ku pasa di manera ku si un di nan mishi ku e liña, e tronkon òf baranka ta kai riba dje i plèch’é. Nos por kompará sintimentu di kulpa innesesario ku e tronkon òf piedra pisá ku ta plècha un bestia. P’esei, si konstantemente nos ta laga erornan di pasado tormentá nos, nos por sinti nos “mashá kibrá.” (Lesa Salmo 38:3-5, 8.) Ta Satanas ke pa nos pensa ku nos erornan ta asina grave ku Yehova lo no mustra miserikòrdia na nos i ku nos no por kumpli ku Su mandamentunan.

15, 16. Kon nos por evitá ku nos erornan di pasado ta sigui tormentá nos?

¹⁵ Kon nos por evitá di kai den e trampa akí ku ta kibra nos asina tantu? Wèl, si bo a kometé un piká grave, hasi esfuerso mesora pa bo drecha bo relashon ku Yehova. Aserká e ansianonan pa yudansa. (Sant. 5:14-16) Hasi loke bo por pa korigí bo eror. (2 Kor. 7:11) Si bo haña disiplina, no desanimá, pasobra disiplina ta un prueba di Yehova su amor pa bo. (Heb. 12:6) Hasi bo máksimo esfuerso pa nunka mas bo kometé e piká ei. Pues, evitá tur loke a hiba na esei. Unabes ku bo a arepentí i ta hasiendo esfuerso atrobe pa hasi loke ta agradá Dios, bo por tin fe ku pa medio di e sakrifisio di reskate di Hesus bo pikánan a ser pordoná i lubidá.—1 Huan 4:9, 14.

¹⁶ No opstante, algun ruman ta sigui sinti nan malu pa motibu di pikánan pa kual nan a haña pordon kaba. Si esei ta bo kaso, kòrda ku Yehova a pordoná Pedro i e otro apòstelnan pa e echo ku nan a bandoná su Yu stimá na e momento ku mas e tabatin mester di nan. Asta un hòmber ku a ser ekspulsá for di e kongregashon di Korinto pa motibu di inmoralidat grosero pero ku  despues a arepentí a haña pordon di Yehova. (1 Kor. 5:1-5; 2 Kor. 2:6-8) Sí, den e Palabra di Dios, nos ta lesa di diferente persona ku a kometé piká grave pero ku a risibí pordon di Dios despues ku nan a arepentí.—2 Kró. 33:2, 10-13; 1 Kor. 6:9-11.

17. Kiko e reskate por hasi pa nos?

¹⁷ Si bo a arepentí di kurason i ta aseptá Yehova su miserikòrdia, lo e pordoná i lubidá bo erornan di pasado. Nunka pensa ku e sakrifisio di reskate di Hesus no ta sufisiente pa Yehova pordoná bo pikánan. Si bo ta pensa asina, bo a kai den un di e trampanan di Satanas. Ni maske kiko Diabel ke pa bo kere, e sakrifisio di reskate ta sufisiente pa kubri piká di tur esnan ku a peka i ku a arepentí. (Pro. 24:16) Fe den e sakrifisio di reskate por libra bo di e peso ku sintimentu di kulpa innesesario ta pone riba hende i duna bo e forsa pa sirbi Dios ku henter bo kurason, mente i alma.—Mat. 22:37.

E TRAMPANAN DI SATANAS NO TA DESKONOSÍ PA NOS

18. Kon nos por evitá di kai den trampa di Diabel?

¹⁸ Pa Satanas, no ta importante den kua trampa nos kai, basta e tin nos den su gara pa nos hasi loke e ke. Pero komo ku su trampanan no ta deskonosí pa nos, nos no tin nodi di bira su víktima. (2 Kor. 2:10, 11) Anto si nos ta resa pidi Dios sabiduria pa sa kon pa trata ku prueba, nos lo no kai den Satanas su trampanan. Disipel Santiago a skirbi: “Si un di boso falta sabiduria, lag’é sigui pidi Dios, i lo e dun’é esaki, pasobra e ta duna tur hende generosamente, sin tira na nan kara.” (Sant. 1:5) Pa nos por haña e sabiduria ei, nos mester obra na armonia ku nos orashon, studia Beibel regularmente i biba na armonia ku prinsipionan bíbliko. E publikashonnan ku e esklabo fiel i prudente a perkurá pa nos ta siña nos identifiká e trampanan di Diabel i yuda nos evitá esakinan.

19, 20. Dikon nos mester odia loke ta malu?

¹⁹ Orashon i estudio di Beibel ta yuda nos stima loke ta bon. Pero ta importante tambe pa nos siña odia loke ta malu. (Sal. 97:10) Ademas, si nos ta meditá riba e konsekuensianan di deseo egoista, nos lo no kumpli ku e deseonan ei. (Sant. 1:14, 15) Ora nos siña odia loke ta malu i di bèrdat ta stima loke ta bon, e as ku Satanas ta pone den su trampanan ta duna nos asko i lo no atraé nos.

²⁰ Nos ta masha gradisidu ku Yehova ta yuda nos pa nos no kai den trampa di Satanas. Yehova ta usa su spiritu santu, Beibel i su organisashon pa libra nos “di e Malbado.” (Mat. 6:13) Den e siguiente artíkulo, nos lo siña kon pa evitá dos trampa mas ku Diabel ta usa pa gara sirbidónan di Dios.

[Nota]

[Preguntanan di Estudio]

[Plachi na página 24]

Ora nos ta papia sin pensa, nos por kousa problema den kongregashon

[Plachi na página 27]

Libra bo di e peso di sintimentu di kulpa innesesario