SI UN amigu konta bo un historia asombroso, kiko lo determiná si lo bo ker’é? No solamente e manera ku e ta konta bo e, sino tambe su reputashon, no ta bèrdat? Kon ku bai bini, si bo amigu semper a papia e bèrdat i nunka no a gaña bo, lo bo tin bon motibu pa ker’é.

Esei ta e kaso tambe ku e milagernan ku tin den Beibel. Aunke nos niun no tabata na bida ora e milagernan ei a tuma lugá, tòg nos por determiná si nan ta kreibel. Kon nos por hasi esei? Ban analisá sinku faktor ku por duna nos mas motibu pa kere ku e milagernan ku tin den Beibel di bèrdat a tuma lugá.

Hopi milager a tuma lugá na lugánan públiko. Na algun okashon, míles di hende, tin biaha asta miónes, a mira milager tuma lugá. (Éksodo 14:21-31; 19:16-19) Nan no a tuma lugá den sekreto, sino na bista públiko.

E milagernan a tuma lugá na un manera simpel. Nan no a bai kompañá ku un espektákulo tur afó i efekto spesial di iluminashon. Mayoria di milager bíbliko a tuma lugá despues di un enkuentro kasual i riba petishon di un òf otro hende. (Marko 5:25-29; Lukas 7:11-16) Pues, den e kaso ei esun ku a hasi e milager no por a plania pa monta henter un show.

Esnan ku a hasi milager no tabata buska fama, gloria i rikesa. Mas bien, nan a hasi milager pa duna gloria na Dios. (Huan 11:1-4, 15, 40) Yehova a kondená tur intento pa saka ganashi for di e milagernan ei.—2 Reinan 5:15, 16, 20, 25-27; Echonan 8:18-23.

E vários tipo di milager ku tin den Beibel ta demostrá bon kla ku nan no por tabata obra di hende. Por ehèmpel, pa medio di milager laman i bientu a kalma, awa a bira biña, áwaseru a stòp i bolbe kuminsá kai, hende malu a kura i hende siegu a haña nan bista bèk. Tur e milagernan ei i hopi mas ta duna prueba ku e poder ku por ehersé influensia riba tur  e kosnan ei mester ta sobrehumano.—1 Reinan 17:1-7; 18:41-45; Mateo 8:24-27; Lukas 17:11-19; Huan 2:1-11; 9:1-7.

E enemigunan di Hesus ku a mira e milagernan no a nenga ku nan a sosodé. Ora Hesus a resusitá su amigu Lázaro, su enemigunan religioso no a nenga ku Lázaro tabata morto. Nan no por a tribi di bisa esei, ya ku Lázaro tabatin kuater dia den graf. (Huan 11:45-48; 12:9-11) Siglonan despues di Hesus su morto, ainda e eskritornan di e Talmut hudiu tabata rekonosé ku Hesus tabatin poder pa hasi milager. Úniko kos ku nan a kuestioná tabata e fuente di tal poder. Meskos tambe, ora e disipelnan di Hesus a haña nan dilanti di e korte hudiu, e lidernan religioso no a puntra nan: “Boso a hasi un milager?” Nò, mas bien, nan a puntra nan: “Ku ki outoridat òf den nòmber di ken boso a hasi e kos akí?”—Echonan 4:1-13.

Kiko di abo? Bo por kere loke Beibel ta bisa tokante milager? For di loke nos a kaba di konsiderá, ta bisto ku nos por kere e relatonan den Beibel relashoná ku milager. I tin mas motibu pa kere e relatonan ei. Por ehèmpel, ora Beibel ta papia di sierto suseso, e ta duna nos e tempu, lugá i nòmber di e personanan enbolbí. Asta hende ku ta kritiká Beibel ta keda asombrá di kon eksakto su detayenan históriko ta. Sientos di profesia ku tin den Beibel a kumpli te den e mínimo detaye. Ademas, den Beibel tin hopi konseho tokante kon hende por biba bon ku otro i esakinan a yuda hende di tur edat i gremio sosial. Tipo di konseho asina bo no por haña ningun otro kaminda.

Si ainda bo ta sinti ku bo no por kere tur loke Beibel ta trese padilanti, dikon bo no ta tuma tempu pa analis’é mas a fondo? Mas bo siña di Beibel, mas bo konfiansa den dje lo krese. (Huan 17:17) Lo bo realisá ku bo por kere loke e ta bisa tokante e milagernan ku a tuma lugá den pasado. Unabes bo kere e milagernan ei, lo bo tin mas motibu pa kere tambe loke Beibel ta bisa ku lo sosodé den futuro.

[Plachi na página 5]

Hesus su enemigunan no a nenga ku Lázaro tabata morto