PROMÉ OPHESHON: Milager ta bai kontra lei di naturalesa. Loke nos ta komprondé di lei di naturalesa ta basá riba loke sientífikonan a opservá den e mundu rònt di nos. Sinembargo, e leinan ei ta meskos ku regla di gramátika di idioma—semper por tin eksepshon riba un regla. De echo, kisas nos no ta komprondé e “reglanan” ei muchu bon. (Yòb 38:4) Un sientífiko por dediká henter su bida na estudio di un sierto lei di naturalesa. Pero si e topa un “eksepshon” riba e lei ei, e ta hañ’é ta bai investigá e lei kompletamente di nobo pa e por komprond’é mihó. Manera un dicho ingles ta bisa, “dia bo topa un solo zuan pretu, henter e teoria ku tur zuan ta blanku ta basha den otro.”

Tin biaha hende por forma un opinion riba algu sin ku nan tin tur e detayenan. Esaki ta bisto den un kuenta chistoso ku e filósofo John Locke (1632-1704) a konta di un embahador hulandes i e rei di Saim. E embahador a bisa e rei ku na Hulanda den sierto temporada un elefante por kana riba awa. E rei no por a kere esei i a pensa ku e embahador kier a nèk e. Pero loke a pasa ta ku e embahador a menshoná algu ku e rei no a yega di mira. E rei no tabata sa ku ora awa bira eis, e por wanta peso di un elefante. Pa e rei esaki a parse imposibel, pasobra e no tabata sa di e detaye ei.

Tuma nota di algun logro moderno ku un par di dékada pasá a parse imposibel:

● Un avion por transportá mas ku 800 pasahero i bula nònstòp di New York pa Singapur ku un velosidat di 900 kilometer pa ora.

● Ku yudansa di kòmpiuter ku tin kámara, un hende ku ta biba na un kontinente por kòmbersá ‘kara kara’ ku un ku ta biba na un otro kontinente.

● Den un aparato mas chikí ku un kaha di lusafè, hende por warda míles di kantika.

● Siruhano por hasi transplante di kurason i otro partinan di kurpa.

Na ki konklushon lógiko nos por yega a base di e ehèmpelnan ei? Si hende por logra hasi kosnan ku apénas algun aña pasá tabata parse imposibel, e Kreador di universo i tur loke tin den dje sigur por hasi kosnan asombroso ku ainda nos no ta komprondé kompletamente ni no por imitá aworakí. *—Génesis 18:14; Mateo 19:26.

DI DOS OPHESHON: Milager ta skirbí den Beibel djis pa hende haña mas fe. Beibel no ta bisa ku nos tin ku kere den tur milager. Al kontrario, e ta spièrta nos pa no kore kere den milager. Por ehèmpel, na 2 Tesalonisensenan 2:9 i 10 nos ta haña e siguiente spièrtamentu: “Presensia di e hòmber di maldat ta segun e aktividat di Satanas, kompañá pa tur tipo di obra poderoso, señal i milager engañoso, inhustisia i tur sorto di engaño.”

Hesukristu tambe a spièrta ku hopi hende lo a pretendé di ta su siguidó. Algun di nan asta lo a puntr’é: “Señor, Señor! N’ ta den bo nòmber nos a profetisá, saka demoño i hasi hopi milager?” (Mateo 7:22, BPK) Ma Hesus a bisa ku lo e no konsiderá e hendenan ei komo su siguidó. (Mateo 7:23) Ta bisto anto ku pa Hesus no ta tur milager ta bini di Dios.

Ademas, Dios no ta ferwagt ku su sirbidónan ta basa nan fe simplemente riba milager. Mas bien, nan fe mester ta basá firmemente riba evidensia.—Hebreonan 11:1.

Laga nos konsiderá por ehèmpel un milager di Beibel ku ta bon konosí, esta, e resurekshon di Hesukristu. Hopi aña despues di e suseso ei, algun kristian na Korinto a kuminsá duda ku si di bèrdat Hesus a resusitá. Kon apòstel Pablo a yuda e kristiannan ei? El a djis bisa nan:  “Boso tin mester di mas fe”? Nò. El a hala nan atenshon riba e pruebanan palpabel ku nan tabatin. Pablo a bisa “ku nan a dera [Hesus], ku el a ser lantá for di morto riba e di tres dia, segun e Skritura, ku el a aparesé na Sefas i despues na e 12 apòstelnan. Despues di esei el a aparesé na mas ku 500 ruman pareu; algun di nan a bai sosegá, ma mayoria di nan t’ei huntu ku nos ainda.”—1 Korintionan 15:4-8.

A hasi un diferensia si e kristiannan di Korinto a kere den e milager ei? Pablo a agregá: “Si Kristu no a ser lantá, siguramente nos predikashon ta enbano, i nos fe tambe ta enbano.” (1 Korintionan 15:14) Pa Pablo, e punto ei no tabata di menor importansia: Sea e milager di e resurekshon di Hesus a tuma lugá òf e no a tuma lugá. I Pablo tabata sa ku el a tuma lugá pasobra sientos di testigu okular di e suseso ei ainda tabata na bida. I nan lo a preferá di muri en bes di nenga loke nan a mira.—1 Korintionan 15:17-19.

DI TRES OPHESHON: Milager ta fenómeno natural ku hende sin skol ta interpretá robes. Algun akadémiko ta purba di splika ku e milagernan den Beibel ta simplemente fenómenonan natural ku a tuma lugá sin intervenshon divino. Nan ta pensa ku asina ei e relatonan ta bira mas kreibel. Aunke ta bèrdat ku algun milager tabatin di haber ku fenómeno natural—manera temblor, plaga i avalancha di lodo—tòg tin un punto sí ku e hendenan ei ta pasa por alto. Nan ta ignorá e faktor tempu, esta, e momento eksakto ku, segun e Skritura, e milager a tuma lugá.

Por ehèmpel, algun hende ta pretendé ku ora e promé plaga a dal Egipto i pone Riu Neil bira sanger, en realidat ta tera kòrá a basha den e riu huntu ku algun organismo kòrá ku yama flagela. Pero ripará ku e relato bíbliko ta bisa ku e riu a bira sanger, i no lodo kòrá. Un análisis kuidadoso di Éksodo 7:14-21 ta mustra ku e milager ei a tuma lugá na momento ku Moises a manda Aron dal su bara riba Riu Neil. Pues asta si ta un fenómeno natural a pone e riu bira kòrá, e echo ku esei a tuma lugá na momento ku Aron a dal e riu riba su mes ta algu milagroso.

Un otro ehèmpel ku ta resaltá e importansia di e faktor tempu, es desir, e momento eksakto ku un milager ta sosodé, ta loke a pasa ku e israelitanan ora nan tabata kla pa drenta e Tera Primintí. Riu Hordan tabata blòkia nan paso, i pa kolmo, e riu a desbordá. Beibel ta bisa: “Ora ku esnan ku tabata karga e arka a drenta Hordan, i e pianan di e saserdotenan ku tabata karga e arka a muha den e awa na kantu . . . , e awanan ku tabata kore for di ariba a keda para i a lanta na un monton, un distansia grandi for di Adam, e stat ku ta keda banda di Saretan.” (Hosue 3:15, 16) Ta un temblor òf avalancha di lodo a kousa esaki? E relato no ta bisa. Pero e momento eksakto ku e suseso ei a tuma lugá ta hasié milagroso. El a sosodé eksaktamente na e momento ku Yehova a bisa ku e lo a tuma lugá.—Hosue 3:7, 8, 13.

Pues, ta eksistí milager? Beibel ta mustra ku sí. Di akuerdo ku loke e ta bisa nos, un milager no ta djis un fenómeno natural. Ta lógiko pa bisa anto ku milager no ta eksistí djis pasobra nan no ta sosodé tur dia?

[Nota]