IMAGINÁ ku bo tin ku hasi un operashon kompliká. Kon lo bo sinti bo si bo haña sa ku e siruhano nunka no a yega di hasi e tipo di operashon ei? Sin duda lo bo ta preokupá, no ta bèrdat? Pero kon lo bo sinti bo si, di otro banda, bo haña sa ku e dòkter akí ta e mihó siruhano den su ramo i ku e tin hopi eksperensia ku e tipo di operashon ei, i ku el a yega di hasi sientos di nan ku bon resultado? Esei lo no duna bo mas konfiansa ku e lo por yuda bo?

E mundu enfermo ku nos ta biba aden awe mester hasi un “operashon” grandi. Yehova, komo e gran siruhano, a primintí pa medio di su Palabra, Beibel, ku lo e hasi e tera akí un paradeis. (2 Pedro 3:13) Pero pa logra esei, e tin ku kita maldat promé, esta, elimin’é kompletamente. (Salmo 37:9-11; Proverbionan 2:21, 22) Tur e kondishonnan deplorabel ku nos ta mira rònt di nos awe mester keda eliminá promé ku nos planeta por bira un paradeis atrobe. Ta ku un milager so por logra esaki.—Revelashon 21:4, 5.

Testigunan di Yehova ta kere ku e kambionan grandi akí lo tuma lugá pronto. Nan ta sigur di esaki, pasobra e milagernan ku Yehova Dios a hasi kaba ta duna prueba ku e tin poder pa kumpli ku su promesanan. Laga nos kompará seis di e milagernan ku tin den Beibel ku e promesanan ku e ta duna pa futuro.

 Purba siña mas di e promesanan di Beibel pa futuro. Segun ku bo fe ta krese, bo speransa tambe lo oumentá—e speransa di benefisiá personalmente di e milagernan ku Yehova lo hasi pronto.

[Kuadro/Plachi na página 7]

MILAGER:

HESUS A ALIMENTÁ MÍLES DI HENDE KU ALGUN PAN I PISKÁ.—MATEO 14:13-21; MARKO 8:1-9; HUAN 6:1-14.

PROMESA:

“Tera a duna su fruta; Dios, nos Dios, ta bendishoná nos.”—SALMO 67:6.

NIFIKASHON PA NOS:

HENDE LO NO PASA HAMBER MAS.

MILAGER:

HESUS A PONE HENDE SIEGU MIRA.—MATEO 9:27-31; MARKO 8:22-26.

PROMESA:

“Wowo di e siegunan lo mira.”—ISAÍAS 35:5.

NIFIKASHON PA NOS:

TUR HENDE SIEGU LO MIRA ATROBE.

MILAGER:

HESUS A KURA HENDE DESABILITÁ.—MATEO 11:5, 6; HUAN 5:3-9.

PROMESA:

“E kohonan lo bula manera biná.”—ISAÍAS 35:6.

NIFIKASHON PA NOS:

LO NO TIN DESABILIDAT FÍSIKO MAS.

MILAGER:

HESUS A KURA VÁRIOS MALESA.—MARKO 1:32-34; LUKAS 4:40.

PROMESA:

“Ningun habitante lo no bisa: ‘Mi ta malu.’”—ISAÍAS 33:24.

NIFIKASHON PA NOS:

LO NO TIN NINGUN SORTO DI MALESA MAS. NOS LO DISFRUTÁ DI SALÚ PERFEKTO.

MILAGER:

HESUS TABATIN KONTROL RIBA E FORSANAN DI NATURALESA.—MATEO 8:23-27; LUKAS 8:22-25.

PROMESA:

“Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha en bano.”—ISAÍAS 65:21, 23.

“Lo bo ta leu di opreshon, pasobra lo bo no tin miedu; i leu di teror, pasobra esei lo no yega serka bo.”—ISAÍAS 54:14.

NIFIKASHON PA NOS:

LO NO TIN DESASTER NATURAL MAS.

MILAGER:

HESUS A LANTA MORTO.—MATEO 9:18-26; LUKAS 7:11-17.

PROMESA:

“Tur esnan ku ta den graf . . . lo sali afó.”—HUAN 5:28, 29.

“Laman a entregá e mortonan den dje, i morto i Graf a entregá e mortonan den nan.”—REVELASHON 20:13.

NIFIKASHON PA NOS:

NOS SERNAN KERÍ KU A MURI LO SER RESUSITÁ.