“Dios ta nos refugio i fortalesa, un pronto ousilio den tempu di angustia.”—SAL. 46:1.

1, 2. Ki situashonnan difísil humanidat ta konfrontá awe, i kiko nos kada un tin ku hasi?

NOS ta bibando den un tempu masha difísil. Mundu ta ser asotá pa diferente kalamidat: temblor, tsunami, kandela, inundashon, volkan, tornado, tifon i orkan. Ademas, problemanan personal i den famia ta kousa miedu i sufrimentu. Ta manera Beibel ta bisa, ‘tempu malu ta bini diripiente riba nos.’—Ekl. 9:12.

² Apesar di e situashonnan angustioso akí, e pueblo di Dios ta sigui sirbié ku goso. Pero segun ku e era malbado akí ta yegando su fin, nos kada un tin ku prepará nos mes pa kualke situashon difísil ku nos por haña nos kuné den futuro. Awor, kon nos por hasi esei, i kiko por yuda nos enfrentá situashonnan difísil ku kurashi awe?

SIÑA FOR DI SIRBIDÓNAN DI DIOS KU A DESPLEGÁ KURASHI

3. Segun Romanonan 15:4, kiko por ta un konsuelo pa nos ora nos ta konfrontá problema serio?

³ E situashonnan difísil ku ta afektá mas i mas hende awe no ta nada nobo. P’esei, laga nos wak kiko nos por siña for di algun sirbidó di Dios di pasado ku a enfrentá situashonnan difísil ku kurashi.—Rom. 15:4.

4. Kiko David mester a soportá, i kiko a yud’é?

⁴ David, por ehèmpel, tabatin ku soportá hopi kos: Un rei tabata odi’é, su enemigunan a atak’é, nan a kapturá su kasánan, famia i amigunan a traishon’é i e tabata kibrá emoshonalmente. (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8) Beibel ta mustra bon kla ku David a sufri mashá pa motibu di e situashonnan akí. Sinembargo, David no a laga e kosnan ei debilitá su fe den Yehova. El a bisa: “SEÑOR ta  e fortalesa di mi bida; di ken lo mi tin miedu?”—Sal. 27:1; lesa Salmo 27:5, 10.

5. Kiko a yuda Abraham ku Sara trata ku situashonnan difísil?

⁵ Abraham ku Sara a biba mayor parti di nan bida den tènt den paisnan stranhero. Nan no tabatin un bida fásil. Tabatin skarsedat di kuminda, i nan a pasa den situashonnan peligroso pa motibu di e nashonnan rònt di nan. (Gén. 12:10; 14:14-16) Kon bini nan por a enfrentá e situashonnan akí ku éksito? Dios su Palabra ta bisa ku Abraham “tabata spera e stat ku tin berdadero fundeshi, e stat di kua Dios mes ta e diseñadó i konstruktor.” (Heb. 11:8-10) Sí, Abraham ku Sara a keda enfoká riba loke Dios a primintí nan i no a laga ningun situashon difísil kita nan goso.

6. Ki ehèmpel Yòb a pone pa nos?

⁶ Yòb a sufri masha hopi mes. Bo por imaginá bo kon el a sintié ora a parse ku tur kos tabata bai malu? (Yòb 3:3, 11) Loke a hasi e situashon pió ta ku e no tabata ni komprondé pakiko e kosnan ei tabata pasa kuné. Pero e no a entregá; el a mantené su integridat na Yehova i no a pèrdè su fe. (Lesa Yòb 27:5.) Ki un ekselente ehèmpel pa nos imitá!

7. Kiko Pablo a pasa aden komo sirbidó di Dios, i kiko a dun’é kurashi pa sigui padilanti?

⁷ Un otro ehèmpel ta esun di apòstel Pablo. El a hañ’é “den peliger den stat, den peliger di lugá desolá, den peliger riba laman”; el a bisa ku el a ‘pasa hamber i set, den friu i sin paña.’ Ademas, el a “pasa un dia i un anochi riba laman ganchu” probablemente pa motibu di noufragio. (2 Kor. 11:23-27) Apesar di tur e kosnan ei, el a keda ku un bon aktitut. Un biaha ku nan a hera di mat’é, el a bisa: “Esaki tabata pa nos no pone nos konfiansa den nos mes, sino den e Dios ku ta lanta hende for di morto. Pues, bon mirá, el a reskatá nos for di peliger di morto.” (2 Kor. 1:8-10) Masha poko di nos a yega di haña nos ku asina tantu situashon difísil, pero hopi di nos sa sinti meskos ku Pablo. P’esei, su ehèmpel ta un konsuelo pa nos.

NO LAGA MAL EKSPERENSIA DESANIMÁ NOS

8. Kon algun problema por afektá nos awendia? Duna un ehèmpel.

⁸ Awendia, hopi hende ta sinti ku desasternan natural, desafio i preshon ku nan sa haña nan kuné ta muchu pa soportá. Asta algun sirbidó di Yehova sa sinti nan asina. Por ehèmpel, Lani * di Australia, kende huntu ku su kasá tabata traha den sirbishi di tempu kompleto, a bisa ku ora el a haña notisia ku e tabatin kanser na pechu, esaki a shòk e i lag’é kibrá. El a bisa: “E tratamentunan tabata hasi mi malu. Mi tabata sinti ku mi no ta sirbi pa nada.” Riba tur esei, e tabatin ku kuida su esposo, kende a kaba di operá lomba. Kiko nos por hasi si nos ta den un situashon asina?

9, 10. (a) Kiko nos no mester permití Satanas hasi? (b) Ki efekto e palabranan di Echonan 14:22 mester tin riba nos?

⁹ Nos mester kòrda ku Satanas ta usa e problemanan ku nos ta haña nos kuné pa debilitá nos fe i kita nos goso. Pero nos no mester permití esei. Proverbionan 24:10 ta bisa: “Si bo desmayá den e dia di angustia, bo forsa ta keda limitá.” Si nos meditá riba ehèmpelnan bíbliko, manera esnan ku nos a kaba di analisá, nos lo haña kurashi pa soportá situashonnan difísil.

¹⁰ Ademas, ta bon pa nos tene na mente ku tin sierto problemanan ku nos no por kaba kuné ni evitá. (2 Tim. 3:12) Echonan 14:22 ta bisa: “Nos tin ku pasa hopi tribulashon pa drenta e Reino di Dios.” P’esei,  ora nos ta enfrentá situashonnan difísil, nos no mester desanimá; mas bien, nos mester mira esakinan komo oportunidat pa demostrá ku nos tin pleno konfiansa ku Dios por yuda nos.

11. Kiko nos mester hasi pa nos no desanimá?

¹¹ Nos mester enfoká riba kosnan positivo. E Palabra di Dios ta bisa ku “un kurason alegre ta hasi kara kontentu, ma ora ku e kurason ta tristu, e spiritu ta kibrá.” (Pro. 15:13) Pa hopi tempu kaba dòkternan ta rekonosé ku pensamentu positivo por yuda un pashènt rekuperá. Hopi pashènt ku nan a duna loke na hulandes yama placebo (ku no ta remedi di bèrdat) a kuminsá sinti nan bon pasobra nan tabata kere ku e “remedinan” akí ta yuda nan. Lo kontrario tambe a keda probá (e asina yamá nocebo-effect): Ora un hende ku ta malu kuminsá pensa ku ta un sierto remedi ta manda su salú atras, lo e kuminsá sintié mas malu tambe. P’esei, si konstantemente nos ta lamentá tokante kosnan ku nos no por kambia, nos por desanimá. Ta bon ku Yehova sí no ta duna nos “placebo”; e ta duna nos berdadero yudansa. Den tempu di angustia, e ta usa su Palabra pa duna nos kurashi, nos hermandat pa yuda nos i su spiritu santu pa duna nos forsa pa perseverá. P’esei, si nos ta enfoká riba e kosnan positivo akí, nos lo haña ánimo. Pues, en bes di laga pensamentunan negativo tormentá bo, hasi tur loke bo por pa trata ku bo problema i sigui pensa riba kosnan positivo.—Pro. 17:22.

12, 13. (a) Kiko a yuda algun sirbidó di Dios perseverá bou di situashon difísil? Duna un ehèmpel. (b) Kon desaster natural ta revelá kiko ta mas importante den bida?

¹² Últimamente, algun pais a ser asotá severamente pa desaster natural. Ta remarkabel kon hopi di nos rumannan den fe a logra superá e situashonnan difísil akí. Na komienso di aña 2010, por ehèmpel, un temblor pisá i un tsunami a asotá Chile. Vários ruman a pèrdè nan kas i nan pertenensianan. Algun a asta pèrdè trabou. Pero e rumannan akí a keda sirbi Yehova fielmente apesar di e situashon difísil ei. Samuel, kende su kas a keda kompletamente destruí, a bisa: ‘Asta bou di e sirkunstansianan difísil akí, ami ku mi kasá a sigui bai nos reunionnan i sirbishi. Esaki a yuda nos keda trankil i no desesperá.’ Sí, meskos ku hopi otro ruman, nan a sigui sirbi Yehova zelosamente i no a laga e kosnan akí desanimá nan.

¹³ Na sèptèmber 2009, áwaseru pisá a inundá gran parti di Manila, Filipinas. Un hòmber riku ku a pèrdè hopi di su propiedatnan a bisa: ‘E desaster akí a afektá tur hende; el a kousa difikultat i sufrimentu pa tantu riku komo pober.’ Esaki ta laga nos kòrda riba e konseho sabí ku Hesus a duna: “Montoná tesoro den shelu, kaminda ni mòt ni frus no por kome nan, ni ladron no por kibra drenta i hòrta.” (Mat. 6:20) Si nos bida ta drei rònt di kos material, ku un dia pa otro por disparsé, fásilmente nos por keda desapuntá. P’esei, ta mas sabí pa enfoká riba nos relashon ku Yehova, pasobra esei sí nos por keda kuné maske kiko ku pasa.—Lesa Hebreonan 13:5, 6.

MOTIBUNAN PA DESPLEGÁ KURASHI

14. Ki motibu nos tin pa desplegá kurashi?

¹⁴ Aunke Hesus a atvertí ku su disipelnan lo haña nan ku problema durante su presensia, el a bisa pa nan “no spanta.” (Luk. 21:9) Dikon nò? Pasobra tantu é, nos Rei, komo Yehova, e Kreador di universo, ta kla pa yuda nos. Pues, nos tin tur motibu pa desplegá kurashi. Pablo a animá Timoteo, bisando: “Dios no a duna nos un spiritu di kobardia, sino di poder, di amor i di sano huisio.”—2 Tim. 1:7.

15. Kon algun sirbidó di Dios a ekspresá nan konfiansa den Yehova, i kon nos por tin e mesun kurashi ku nan tabatin?

 ¹⁵ Hopi sirbidó di Dios a ekspresá nan konfiansa den Yehova. David a bisa: “SEÑOR ta mi fortalesa i mi eskudo; mi kurason ta konfia den dje, i mi ta wòrdu yudá; p’esei mi kurason ta regosihá.” (Sal. 28:7) Pablo a bisa: “Den tur e kosnan akí nos ta sali kompletamente viktorioso pa medio di esun ku a stima nos.” (Rom. 8:37) Hesus, sabiendo ku pronto lo e ser arestá i matá, a bisa su apòstelnan: “Mi no ta mi so, pasobra e Tata ta ku mi.” (Huan 16:32) Asina el a laga nan komprondé bon kla ku e tin un bon relashon ku Dios. Tur e ekspreshonnan akí ta revelá ku e hòmbernan akí tabatin pleno konfiansa den Yehova. Si nos tambe siña konfia den Yehova di e manera ei, nos lo haña kurashi pa enfrentá kualke situashon difísil.—Lesa Salmo 46:1-3.

HASI USO DI E YUDANSA KU DIOS TA PERKURÁ

16. Dikon ta importante pa studia e Palabra di Dios?

¹⁶ Pa nos por tin kurashi, nos no mester dependé riba nos mes sino riba Dios, esun ku ta duna kurashi. Nos ta haña e kurashi akí si nos ta studia Dios su Palabra, Beibel, regularmente. Di e manera ei, nos ta siña konosé Dios i konfia den dje. Un ruman muhé ku ta sufri di depreshon a bisa kiko ta yud’é: “Bes tras bes, mi ta lesa pasashinan di Beibel ku ta duna konsuelo.” Awor, kiko di e konseho pa tene adorashon komo famia tur siman? Nos ta hasi kaso di e konseho akí di e esklabo fiel? Si ta asina, nos por tin e mesun aktitut ku e salmista kende a bisa: “O kuantu mi ta stima bo lei! E ta mi meditashon henter dia.”—Sal. 119:97.

17. (a) Menshoná un otro manera ku Yehova ta yuda nos haña kurashi. (b) Duna un ehèmpel di un historia di bida den nos publikashonnan ku a yuda abo.

¹⁷ Un otro manera ku nos por haña kurashi ta mediante publikashonnan basá riba Beibel ku ta fortalesé nos konfiansa den Yehova. Hopi ruman ta haña e historianan di bida ku tin den nos revistanan masha edifikante. Un ruman muhé na Asia, kende ta sufri di trastorno bipolar, a sintié masha animá ora el a lesa e historia di bida di un ruman hòmber, un eks misionero, ku tabata sufri di e mesun tipo di depreshon kuné. Apesar di su depreshon, e ruman hòmber a sigui sirbi Yehova fielmente. E ruman muhé a bisa: “E artíkulo a yuda mi komprondé mi problema i a duna mi speransa.”

18. Dikon nos mester hasi orashon regularmente?

¹⁸ Un otro manera ku Yehova ta yuda nos ta mediante orashon. Apòstel Pablo a  enfatisá e balor di orashon ora el a bisa: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente pa medio di Kristu Hesus.” (Flp. 4:6, 7) Abo ta resa regularmente i pidi Yehova yuda bo soportá kualke situashon difísil? Alex, un ruman hòmber na Inglatera, kende pa hopi tempu kaba ta sufri di depreshon, a bisa: ‘E kosnan ku mas ta yuda mi ta papia ku Yehova den orashon i tende loke e ta bisa mediante su Palabra.’

19. Dikon ta importante pa nos asistí na nos reunionnan?

¹⁹ Nos reunionnan di kongregashon ta un otro medio ku Yehova ta usa pa yuda nos. Un salmista a skirbi: “Mi alma ta anhelá, sí, ta antohá pa e pationan di SEÑOR.” (Sal. 84:2) Abo tambe ta sinti asina? Lani, e ruman muhé ku nos a menshoná anteriormente, ta splika ku ta masha importante pa nos asistí na tur nos reunionnan i asosiá ku nos rumannan. El a bisa: “Si mi ke pa Yehova yuda mi, mi mester bai mi reunionnan.”

20. Kon e trabou di prediká ta yuda nos?

²⁰ Si nos ke tin kurashi, nos mester ta aktivo tambe den e trabou di prediká e Reino. (1 Tim. 4:16) Un ruman muhé na Australia ku a hañ’é ku hopi problema a bisa: “Mi no tabatin niun tiki gana di bai prediká, pero un ansiano a animá mi pa sali kuné den sirbishi. I mi a bai. Sin duda, Yehova tabata ku mi, pasobra kada bes ku mi a sali den sirbishi, mi tabata sinti mi felis.” (Pro. 16:20) Hopi ruman a ripará ku ora nan ta siña otro hende pone fe den Yehova, nan fe tambe ta bira mas fuerte. Ademas, ora nan ta yuda otro hende, nan ta lubidá nan problemanan i ta konsentrá riba e kosnan di mas importante.—Flp. 1:10, 11.

21. Kiko nos por ta sigur di dje aunke nos ta pasando den situashon difísil?

²¹ Manera nos a mira, Yehova ta usa vários medio pa yuda nos enfrentá situashonnan difísil ku kurashi. Si nos ta hasi uso di e medionan akí i ta meditá riba e ekselente ehèmpelnan ku tin den Beibel di personanan ku a desplegá kurashi i imitá nan, nos lo por enfrentá kualke prueba ku éksito. Sí, maske nos por haña nos ku hopi situashon difísil segun ku e era malbado akí ta yega na su fin, nos lo por tin e mesun konvikshon ku Pablo, kende a bisa: “Nos ta ser tumbá, ma no destruí. . . . Nos no ta entregá.” (2 Kor. 4:9, 16) Dikon? Pasobra ku Yehova su yudansa, nos por enfrentá kualke situashon difísil ku kurashi!—Lesa 2 Korintionan 4:17, 18.

[Nota]

[Preguntanan di Estudio]

[Plachi na página 14]

Si bo ta den un situashon difísil, hasi bon uso di e yudansa ku Yehova ta perkurá