E PALABRANAN ei ta duna un bon deskripshon di e manera ku lidernan humano a aktua atraves di tempu. Pa nan motibu tin gran sufrimentu i miseria. Aunke semper tabatin hende ku kier a forma un komunidat mas hustu, golosidat i korupshon a kaba ku tur nan bon intenshonnan. Pa ki motibu nan a frakasá? Dikon hende mes no por kaba ku korupshon? Básikamente, esaki ta debí na tres faktor ku ta ehersé un influensia negativo riba nos.

Beibel ta bisa bon kla ku nos tur ta “den gara di piká.” (Romanonan 3:9) Piká ta “biba” den nos manera un enfermedat inkurabel ku nos a heredá. Pa míles di aña kaba piká ta “reina” manera rei riba humanidat i su “leinan” ketu bai ta dirigí nos bida. Hende su inklinashonnan pekaminoso ta pone ku nan ta wak pa nan mes promé òf ta biba pa akumulá sea rikesa òf poder a kosto di otro hende.—Romanonan 5:21; 7:17, 20, 23, 25.

Golosidat i egoismo ta bisto tur kaminda, i pa motibu di esei algun hende ta haña ku no ta fásil pa ta diferente. Ambishon kombiná ku egoismo ta duna nan set pa poder. Tambe nan ta kuminsá deseá mas plaka i propiedat—mas di loke nan tin mester. Ta tristu pa bisa ku pa logra e metanan ei, nan ta asta dispuesto pa hasi kosnan desonesto. En bes di resistí influensia negativo, tipo di hende asina ta “sigui e mayoria den hasimentu di maldat.”—Éksodo 23:2.

Satanas, un kriatura spiritual rebelde, ‘ta gañando henter e tera habitá.’ (Revelashon 12:9) E tin plaser den manipulá hende. Na un manera astuto e ta probechá di e deseo natural ku hende tin pa komodidat material i siguridat finansiero te na e grado ku nan ta bira korupto.

Akaso esaki ta nifiká ku nos ta obligá pa obedesé Satanas i hasi loke é ke? Nos lo haña e kontesta den e siguiente artíkulo.