1, 2. Dikon semper ta bon pa nos buska pa sa kiko ta Dios su punto di bista, i kiko nos lo siña for di e ehèmpel di Rei David?

IMAGINÁ ku bo ta kanando den un teritorio ku bo no konosé bon. Dado momento, bo ta yega un kaminda ku bo tin ku skohe entre dos direkshon. Awor, kua di nan bo tin ku skohe? Probablemente bo ta puntra un persona ku konosé e teritorio bon yuda bo. Ora di tuma desishon importante den bida, nos tin ku hasi meskos. Nos mester akudí na Yehova, nos Kreador, kende sa tur kos, anto e lo yuda nos ‘kana den e kaminda’ ku e ta aprobá.—Isa. 30:21.

² Rei David di antiguo Israel tabata un bon ehèmpel pa nos. Semper el a buska pa sa kiko tabata Yehova su punto di bista. Di e manera ei, el a demostrá ku su kurason tabata kompletamente dediká na Yehova. P’esei, laga nos analisá algun suseso den David su bida i siña for di e manera ku el a trata ku situashon difísil.—1 Rei. 11:4.

3, 4. (a) Kiko a motivá David pa enfrentá Goliat? (b) Ki balor e nòmber di Dios tabatin pa David?

³ Pensa riba e okashon ku David a enfrentá e filisteo Goliat. Kiko a motivá e hóben akí pa enfrentá un gigante di mas o ménos 2,9 meter kende tabata bon armá? (1 Sam. 17:4) Su kurashi kisas? Òf tabata su fe den Dios? Wèl, e dos kualidatnan akí sigur a hunga un ròl importante, pero loke spesialmente a motivá David pa enfrentá e gigante akí tabata e rèspèt ku e tabatin pa Yehova i pa Su gran nòmber. Indigná, David a puntra: “Ken e filisteo insirkunsidá akí ta, ku e ta reta e ehérsitonan di e Dios bibu?”—1 Sam. 17:26.

⁴ David a bisa Goliat: “Bo ta bini riba mi ku spada, ku lansa i ku yabalina, ma ami ta bini riba bo  den e nòmber di e SEÑOR di ehérsitonan, e Dios di e ehérsitonan di Israel, kende bo a reta.” (1 Sam. 17:45) David a dependé riba e Dios berdadero i a tumba e gigante ku ún solo piedra. No ta na e okashon ei so David a konfia den Yehova i a mustra rèspèt pa Su nòmber; el a hasi esei henter su bida. David a urgi su kompañeronan israelita pa nan sinti nan orguyoso di Yehova su nòmber santu.—Lesa 1 Krónikanan 16:8-10, BPK. *

5. Kon hende awe ta mustra falta di rèspèt pa Yehova, manera Goliat a hasi, i kon nos mester reakshoná den un kaso asina?

⁵ Abo ta orguyoso di ta un Testigu di Yehova? (Yer. 9:24) Kon bo ta reakshoná ora koleganan di trabou, kompañeronan di skol, famia òf bisiñanan ta papia malu di Yehova i ta hasi chèrchi di su Testigunan? Bo ta defendé e nòmber di Yehova i konfia ku lo E sostené bo? Ta bèrdat ku tin ora nos mester “keda ketu.” Pero nos no mester tin bèrgwensa di ta Testigu di Yehova i siguidó di Hesus. (Ekl. 3:1, 7; Mar. 8:38) Pues, maske nos ta usa takto i ta keda kariñoso ku hende ku no ta respetá Yehova ni su mensahe, nos no ke ta manera e israelitanan kendenan a “desmayá i a haña hopi miedu” ora nan a tende e palabranan di Goliat. (1 Sam. 17:11) Mas bien, nos mester ta semper kla pa defendé e nòmber santu di Yehova, pasobra nos deseo ta pa yuda hende haña sa ki klase di Dios Yehova ta realmente. Pa logra esei, nos ta usa Beibel pa laga hende mira dikon ta importante pa nan hala serka Dios, esta, kultivá un bon relashon kuné.—Sant. 4:8.

6. Kiko tabata e motibu prinsipal pakiko David a enfrentá Goliat, i kiko mester ta nos ophetivo prinsipal?

⁶ E relato di David i Goliat ta siña nos un otro lès importante. Ora David a kore yega e kampo di bataya, el a puntra: “Kiko lo wòrdu hasí pa e hòmber ku mata e filisteo akí i kita e reproche for di Israel?” E pueblo a bis’é e mesun kos ku nan a bisa anteriormente, esta, ku “e hòmber ku [mata Goliat], esei rei lo enrikesé ku gran rikesa, i lo dun’é su yu muhé.” (1 Sam. 17:25-27) Pero David su interes primordial no tabata e rekompensa. E tabatin algu mas importante na mente: E kier a halsa e nòmber di e Dios berdadero. (Lesa 1 Samuel 17:46, 47.) Kiko di nos? Kiko ta nos ophetivo prinsipal? Nos ke traha un nòmber pa nos mes, akumulando rikesa i bira un persona importante den mundu? Siguramente nos ke ta manera David, kende a kanta: “O engrandesé SEÑOR ku mi, i laga nos halsa su nòmber huntu.” (Sal. 34:3) Pues, laga nos konfia den Dios, mustrando mas interes den su nòmber ku den esun di nos.—Mat. 6:9.

7. Kon nos por kultivá un fe fuerte pa por enfrentá hende ku no ke skucha nos mensahe?

⁷ Pa David por a enfrentá Goliat ku kurashi, e mester tabatin un fe fuerte i pleno konfiansa den Yehova. Un di e kosnan ku a yud’é edifiká un fe fuerte ta e echo ku, komo wardadó di karné, semper el a dependé riba Dios. (1 Sam. 17:34-37) Nos tambe mester tin un fe fuerte pa nos por sigui prediká, spesialmente ora nos topa hende ku no ke skucha nos mensahe. P’esei, nos tambe mester dependé riba Yehova den nos bida diario. Kon asina? Por ehèmpel, nos por kuminsá un kòmbersashon ku hende ku ta sintá banda di nos den transporte públiko. I pakiko no papia ku hende ku nos topa riba kaya ora nos ta prediká di kas pa kas?—Echo. 20:20, 21.

8, 9. Ora Rei Saul tabata buska David pa mata, kon David a mustra ku e boluntat di Yehova tabata e kos di mas importante p’e?

⁸ Un otro ehèmpel ku a mustra ku David tabata konfia den Yehova tin di haber ku Saul—e promé rei di Israel. Saul tabata yalurs riba David. Na tres okashon, el a tira lansa riba dje pa peg’é den muraya. Pero tur biaha David a skapa i no a tuma represaya tampoko. Finalmente, David a hui pa Saul. (1 Sam. 18:7-11; 19:10) Despues, Saul a skohe 3.000 hòmber di Israel i a bai buska David den desierto. (1 Sam. 24:2) I tabatin un biaha ku Saul, sin ku e tabata sa, a drenta nèt den e kueba kaminda David i su hòmbernan tabata skondí. David por a probechá di e oportunidat ei pa mata Saul. Al fin al kabo, tabata Dios su boluntat pa e remplasá Saul komo rei di Israel. (1 Sam. 16:1, 13) David su hòmbernan a asta konseh’é pa mata Saul. Pero David a bisa: “Ku esaki sea leu di mi di hasi un kos asin’akí ku mi señor, SEÑOR su ungí, di lanta mi man kontra dje, siendo ku e ta SEÑOR su ungí.” (Lesa 1 Samuel 24:4-7.) Sí, e tempu ei ainda Saul tabata Dios su rei ungí. I David no kier a kita e trono for di Saul, siendo ku Yehova mes no a hasi esei ainda. Anto e echo ku David a kòrta djis un pida di e mantel di Saul a mustra ku e no kier a hasié daño.—1 Sam. 24:11.

⁹ E último biaha ku David a mira Saul, el a bolbe mustra rèspèt pa Dios su ungí. Tabata asina ku David i Abisai a yega e kampamentu di Saul i a hañ’é drumí. Abisai a pensa ku ta Dios a entregá Saul den man di David. El a asta ofresé pa e mes mata Saul ku su lansa, pero David no a permitié. (1 Sam. 26:8-11) David a keda spera riba Yehova, ku otro palabra, el a sigui buska Yehova su guia. E tabata determiná pa hasi Yehova su boluntat i no esun di Abisai, kende kier a mata Saul.

10. Ki situashon difísil nos por haña nos aden, i kiko por yuda nos para firme?

¹⁰ Nos tambe por haña nos ku hende ku ta preshoná nos pa hasi loke nan ta haña ta bon en bes di animá nos pa hasi Yehova su boluntat. Meskos ku Abisai, algun hende kisas ta asta animá nos pa dal sierto pasonan sin tene kuenta ku e boluntat di Dios. Pero pa nos por para firme den un situashon asina, nos mester sa kiko ta Yehova su punto di bista tokante e asuntu i sea determiná pa kumpli ku su boluntat.

11. Kon David a sigui demostrá ku e boluntat di Dios tabata e kos di mas importante p’e, i kon nos por imit’é?

 ¹¹ David a pidi Yehova Dios: “Siña mi hasi bo boluntat.” (Lesa Salmo 143:5, 8, 10.) Sí, David no a dependé riba su mes ideanan ni tabata djis hasi loke otronan ta bisa. E tabata ke pa Dios siñ’é. P’esei, e tabata ‘meditá riba tur Yehova su obranan i tabata reflekshoná riba e obra di Su mannan.’ Nos tambe por diserní kiko ta e boluntat di Dios si nos ta studia e Skritura kuidadosamente i meditá riba e relatonan ku ta mustra kon Yehova a trata hende den pasado.

12, 13. Dikon David a basha e awa ku e tres hòmbernan a trese p’e riba suela?

¹² Tin un otro kos ku nos por siña for di e ehèmpel di David: El a aktua na armonia ku e prinsipionan tras di e Lei. Tuma nota por ehèmpel di loke a pasa ora David a bisa ku e tabatin gana di ‘bebe awa di e pos di Bètlehèm.’ Tres di su hòmbernan a riska nan bida pa drenta e stat, ku e tempu ei tabata teritorio di e filisteonan, i a saka awa for di e pos i trese pa David. Pero “David no kier a beb’é, ma a dram’é pa SEÑOR.” Dikon? David a splika: “Leu sea di mi, o mi Dios, di hasi e kos akí. Lo mi bebe e sanger di e hòmbernan akí ku a riska nan bida pa bai? Pasobra nan a riska nan bida pa tres’é.”—1 Kró. 11:15-19.

¹³ David tabata sa ku Lei a prohibí hende di kome sanger; mas bien, sanger mester a ser bashá riba suela. Ademas, el a komprondé pakiko mester a hasi esaki. Sí, David a komprondé ku “bida di e karni ta den e sanger.” Pero ta awa David a rechasá i no sanger. Dikon el a hasi esei? Pasobra el a komprondé e prinsipio tras di e lei: Sanger ta presioso den bista di Yehova. Anto siendo ku e tres hòmbernan ei por a muri ora nan a bai saka awa p’e, David a sinti ku lo tabata un falta di rèspèt pa nan sanger presioso si el a bebe e awa. P’esei, en bes di beb’é, el a bash’é riba suela.—Lev. 17:11; Deu. 12:23, 24.

14. Kon bini David por a tuma desishonnan ku a agradá Yehova?

 ¹⁴ David a okupá su mes diariamente ku e lei di Dios. El a kanta: “Pa hasi bo boluntat, o mi Dios, ta un delisia pa mi; bo Lei ta den mi kurason.” (Sal. 40:8) David tabata studia e lei di Dios i meditá profundamente riba dje. E tabata konvensí ku si e kumpli ku Yehova su mandamentunan lo bai e bon. P’esei, e tabata ansioso pa kumpli ku e reglanan di e Lei i tambe ku e prinsipionan tras di esakinan. Ora nos ta studia Beibel, ta sabí pa meditá riba loke nos ta lesa. Dikon? Pasobra ora nos ta meditá, loke nos a siña ta baha den nos kurason. I esei ta pone ku nos por tuma desishonnan ku ta agradá Yehova.

15. Kon Sálomon a desobedesé e Lei di Dios?

¹⁵ Sálomon, yu di David, a risibí hopi bendishon for di Yehova Dios. Sinembargo, despues di tempu, Sálomon a kuminsá desobedesé e Lei di Dios. E no a hasi kaso di Yehova su mandamentu ku a bisa ku un rei israelita “no mester tuma hopi esposa pa su mes.” (Deu. 17:17) De echo, Sálomon a kasa ku hopi muhé stranhero. I ora el a bira bieu, “su esposanan a hasi su kurason desviá pa sigui tras di otro diosnan.” Maske Sálomon por a bini ku yen di èksküs, echo ta ku e tabata “hasi loke tabata malu den bista di SEÑOR, i no tabata sigui SEÑOR kompletamente, manera su tata David a hasi.” (1 Rei. 11:1-6) P’esei ta masha importante pa obedesé e lei- i prinsipionan ku nos ta siña den e Palabra di Dios. Por ehèmpel, esaki ta masha importante si nos tin pensá di kasa.

16. Kon e spiritu tras di e lei pa kasa “basta ta den Señor” ta yuda nos?

¹⁶ Kon nos ta reakshoná ora un persona ku no ta Testigu di Yehova mustra interes romántiko den nos? Nos ta reakshoná manera David, òf nos ta hasi manera Sálomon? Beibel ta bisa ku adoradónan berdadero ta liber pa kasa “basta ta den Señor.” (1 Kor. 7:39) Pues, si un kristian ke kasa, e mester kasa ku un Testigu di Yehova. Ademas, si nos ta komprondé e spiritu tras di e lei akí, nos lo no ni permití un persona ku no ta sirbi Yehova mustra interes romántiko den nos.

17. Kiko por yuda nos evitá di kai den e trampa di pornografia?

¹⁷ E ehèmpel di David, kende a buska Yehova su guia, por yuda nos resistí tentashon pa wak pornografia tambe. Lesa e siguiente tekstonan, pensa riba e prinsipionan ku tin nan tras i purba di saka afó kiko Yehova ta pensa tokante pornografia. (Lesa Salmo 119:37; Mateo 5:28, 29; Kolosensenan 3:5.) Ora nos ta meditá riba Yehova su normanan elevá, nos lo no kai den e trampa di pornografia.

18, 19. (a) Apesar ku David tabata imperfekto, kiko a yud’é keda ku Dios su aprobashon? (b) Kiko abo ta determiná pa hasi?

¹⁸ Aunke David tabata un bon ehèmpel den hopi aspekto, el a yega di kometé vários piká serio. (2 Sam. 11:2-4, 14, 15, 22-27; 1 Kró. 21:1, 7) No opstante, semper el a arepentí di su pikánan. David a kana “den integridat di kurason.” (1 Rei. 9:4) Dikon nos por bisa esei? Pasobra semper el a hasi esfuerso pa agradá Yehova.

¹⁹ Apesar ku nos ta imperfekto, nos por tin Yehova su aprobashon. P’esei, laga nos studia e Palabra di Dios diligentemente, meditá profundamente riba loke nos ta siña i laga esaki baha den nos kurason i aplik’é mesora. Si nos ta hasi e kosnan akí, nos lo ta manera e salmista kende humildemente a pidi Yehova den orashon: “Siña mi hasi bo boluntat.”