1, 2. (a) Kon hopi hende ta deskribí un persona eksitoso? (b) Kiko bo por hasi pa saka afó ki ora segun abo un persona ta eksitoso?

KI ORA nos por bisa ku un hende ta eksitoso? Si bo hasi vários hende e pregunta ei, lo bo haña diferente kontesta. Por ehèmpel, hopi lo bisa ku un hende eksitoso ta un persona bon pará finansieramente, ku tin un bon trabou òf bon edukashon. Otronan lo bisa ku pa un persona por ta eksitoso, e mester tin bon relashon ku su famia, amigunan i koleganan di trabou. Kisas un kristian berdadero lo asta kontestá ku un persona eksitoso ta un persona ku tin sierto responsabilidat den kongregashon òf ku tin éksito den e trabou di prediká.

² Awor, segun abo, ki ora un hende ta eksitoso? At’akí algu ku por yuda bo kontestá e pregunta ei: Skirbi nòmber di algun hende ku bo ta konsiderá eksitoso i ku bo ta atmirá i respetá mashá. Kaba, wak kiko e personanan akí tin en komun. Nan ta riku òf famoso? Nan ta personanan prominente den komunidat? Bo kontesta kisas ta revelá loke tin den bo kurason. Anto esaki por influensiá e metanan ku bo ta pone den bida i bo eskohonan.—Luk. 6:45.

3. (a) Kiko Hosue mester a hasi pa e por tabatin éksito? (b) Kiko nos lo analisá awor?

³ E kos di mas importante pa nos mester ta: Ser eksitoso den bista di Yehova. Dikon? Pasobra nos bida ta dependé di dje. Ora Yehova a duna Hosue e tarea pisá di guia e israelitanan na e Tera Primintí, el a mand’é lesa e Lei di Moises “di dia i anochi” i hasi konforme tur loke ta pará skirbí den dje. Anto Dios a sigur’é: “E ora ei lo bo hasi bo kaminda prosperá, i e ora ei lo bo tin éksito.” (Hos. 1:7, 8) I manera nos sa, Hosue tabatin éksito. Awor, kiko di nos? Kon nos por sa si nos punto di bista enkuanto éksito ta kuadra ku esun di  Dios? Pa nos por sa esei, laga nos analisá ehèmpel di dos personahe bíbliko.

4. Dikon nos por bisa ku Sálomon tabata un hòmber eksitoso?

⁴ Sálomon tabata un hòmber masha eksitoso den vários área di bida. Kon bini? Wèl, pa hopi aña, el a teme i obedesé Yehova, i Yehova a bendishon’é rikamente. Bo ta kòrda kiko el a pidi ora Yehova a bis’é pa pidi loke e tabata ke? Sí, el a pidi sabiduria pa guia e pueblo. Anto Yehova a dun’é tantu sabiduria komo rikesa. (Lesa 1 Reinan 3:10-14.) Rei Sálomon su sabiduria a “surpasá e sabiduria di tur e hòmbernan di oriente i tur e sabiduria di Egipto.” Sálomon a bira famoso “den tur e nashonnan tur rònt.” (1 Rei. 4:30, 31) I pa loke ta su rikesa, e tabatin un entrada di 25 tòn di oro pa aña, ku awe ta mas ku mil mion dòler merikano! (2 Kró. 9:13) Ademas, e tabata un bon komersiante, el a konstruí hopi kos bunita i tabatin bon relashon ku otro nashonnan. Sí, tanten ku Sálomon tabata fiel na Dios, e tabatin éksito.—2 Kró. 9:22-24.

5. Segun Sálomon, ki ora un hende ta berdaderamente eksitoso?

⁵ For di loke Sálomon a skirbi den e buki di Eklesiástes, nos ta komprondé ku e no tabata pensa ku un hende mester ta riku i prominente pa e por ta eksitoso i felis. El a skirbi: “Mi sa ku no tin nada mihó pa hende, ku regosihá i hasi bon den su bida, i tambe ku tur hende por kome i bebe i mira e bon ku tin den tur su trabou—esaki ta e regalo di Dios.” (Ekl. 3:12, 13) I Sálomon a realisá ku e kosnan akí por duna un hende berdadero goso solamente ora e tin Dios su aprobashon, esta, un bon relashon ku Dios. P’esei mes el a bisa: “E konklushon di tur loke ku a wòrdu tendí, ta: teme Dios i warda su mandamentunan, pasobra esaki ta aplikabel na kada persona.”—Ekl. 12:13.

6. Kon e ehèmpel di Sálomon ta yuda nos komprondé kiko ta berdadero éksito?

⁶ Sálomon a teme Dios pa hopi aña largu. Beibel ta bisa ku e “tabata stima SEÑOR, i tabata kana den e statutonan di su tata David.” (1 Rei. 3:3) Tanten ku Sálomon tabata hasi esei, e tabata berdaderamente eksitoso. Bou di guia di Dios, Sálomon a konstruí un magnífiko tèmpel pa adorashon berdadero i a skirbi tres buki bíbliko. Aunke nos lo no por logra e mesun kosnan ku Sálomon, e ehèmpel ku el a pone tempu ku e tabata fiel na Dios mester yuda nos komprondé kiko ta berdadero éksito i kiko nos mester hasi pa logra esei. I kòrda ku Dios a inspirá Sálomon pa skirbi ku rikesa, sabiduria, fama i poder—kosnan ku mayoria di hende awe ta usa pa midi éksito—ta puru banidat. Segun Sálomon, hende ku ta traha duru pa logra e kosnan akí ta ‘kore tras di bientu’; ku otro palabra, nan ta kore tras di kosnan ku no ta hasi nan berdaderamente felis. Bo no a ripará esei? Hende ku ta stima plaka ke tin mas i mas. I hopi biaha, nan ta preokupá pa nan no pèrdè loke nan tin. I loke nan tin, tardi òf trempan, lo pasa pa otro hende.—Lesa Eklesiástes 2:8-11, 17; 5:10-12.

7, 8. Kon bini Sálomon a bira infiel, i kiko tabata e resultado?

⁷ Manera nos sa, ora Sálomon a bira bieu, el a stòp di obedesé Yehova. E Palabra di Dios ta bisa: “A sosodé ku ora Sálomon a bira bieu, su esposanan a hasi su kurason desviá pa sigui tras di otro diosnan; i su kurason no tabata kompletamente dediká na SEÑOR su Dios, manera kurason di su tata David tabata. . . . Sálomon a hasi loke tabata malu den bista di SEÑOR.”—1 Rei. 11:4-6.

⁸ Yehova no a keda kontentu ku Sálomon i a bis’é: “Pasobra . . . bo no a warda mi  aliansa i mi statutonan ku mi a ordená bo, lo mi sker e reino kit’é for di bo sigur-sigur i dun’é na bo sirbidó.” (1 Rei. 11:11) Ki un resultado tristu pa su desobedensia! Sí, aunke Sálomon tabata eksitoso den vários área di bida, ku tempu, el a desapuntá Yehova. Sálomon a stòp di hasi e kos di mas importante ku hende mester hasi: El a stòp di sirbi Yehova fielmente. P’esei, nos kada un mester puntra nos mes: ‘Lo mi hasi bon uso di loke mi a siña for di e eksperensia di Sálomon pa mi por ta eksitoso?’

9. Dikon segun e normanan di mundu, Pablo no tabata eksitoso? Splika.

⁹ Apòstel Pablo tabatin un bida hopi diferente for di esun di Rei Sálomon. Pablo no tabatin un bida kómodo: E no a biba den palasio ni kome i bebe ku reinan. Al kontrario, tabatin biaha ku el a pasa hamber, set, den friu i sin paña. (2 Kor. 11:24-27) Despues ku Pablo a aseptá Hesus komo e Mesías, el a pèrdè fabor di e miembronan di e religion hudiu. E lidernan religioso hudiu a odi’é. Nan a enkarsel’é, sut’é ku zuip i bara i piedr’é. Pablo a indiká ku é i su rumannan den fe a ser insultá, odiá i persiguí. El a bisa: “Te ku awor, nos ta manera e sushi di mundu, e desperdisio di tur kos.”—1 Kor. 4:11-13.

10. Dikon por a parse ku Pablo a tira su oportunidat di logra éksito afó?

¹⁰ Ta parse ku apòstel Pablo tabatin hopi kos na su fabor tempu ku e tabata yònkuman i tabata konosí komo Saulo. Parse ku el a bini di un famia prominente i a haña lès serka Gamaliel, un maestro respetá. I Pablo mes a skirbi despues ku el ‘a hasi mas progreso den hudaismo ku hopi hende di su nashon ku tabata di su edat.’ (Gal. 1:14) Pablo por a papia hebreo i griego bon. Ademas, e tabatin siudadania romano, i esaki a dun’é sierto privilegio- i derechonan spesial ku hopi hende tabata deseá. Si Pablo a sigui hasi esfuerso pa logra éksito den mundu, probablemente lo el a bira un persona riku i respetá. Pero el a skohe un otro rumbo; anto segun otronan, kisas asta algun di su famianan, esaki tabata un bobedat. Dikon el a skohe e rumbo ei?

11. Kiko Pablo a balorá, kiko tabata su determinashon i dikon?

¹¹ Pablo tabata stima Yehova i a preferá di tin un bon relashon ku Yehova en bes di rikesa i fama. Ora Pablo a haña konosementu eksakto di e bèrdat, el a kuminsá balorá kosnan ku mayoria di hende den mundu no ta haña importante, manera por ehèmpel e reskate, e trabou di prediká i  e speransa selestial. Ademas, Pablo tabata sa di e kuestion ku Satanas a lanta, esta, ku e por kita tur hende di sirbi Dios. (Yòb 1:9-11; 2:3-5) P’esei, e tabata determiná pa keda fiel na Dios i a perseverá den adorashon berdadero apesar di kualke prueba ku el a konfrontá pa asina proba ku Satanas ta mentiroso. Mayoria di hende ku ke bira eksitoso den mundu no tin e determinashon ei.

12. Dikon abo ta pone bo konfiansa den Yehova?

¹² Abo tin e mesun determinashon ku Pablo tabatin? Wèl, no ta tur ora ta fásil pa keda fiel na Yehova. Pero si nos keda fiel, nos lo hasié kontentu i lo e bendishoná nos. I ta esei ta hasi nos berdaderamente eksitoso. (Pro. 10:22) Sí, Dios lo bendishoná nos awor i muchu mas den futuro. (Lesa Marko 10:29, 30.) P’esei, nos tin tur motibu pa pone nos pleno konfiansa, ‘no den rikesa insigur, sino, den Dios, kende ta duna nos tur e kosnan ku nos ta disfrutá di dje.’ Hasiendo esei, nos ta ‘akumulá komo tesoro pa nos mes un bon fundeshi pa futuro, a fin ku nos por haña un gara firme riba loke realmente ta bida.’ (1 Tim. 6:17-19) Sí, nos por tin sigur ku aki shen, mil òf mas aña, nos lo wak bèk i bisa: “Mi tabatin un bida berdaderamente eksitoso.”

13. Ki konseho Hesus a duna enkuanto montoná tesoro?

¹³ Relashoná ku tesoro, Hesus a bisa: “Stòp di montoná tesoro riba tera, kaminda mòt i frus ta kome nan i kaminda ladron ta kibra drenta i hòrta. Mas bien, montoná tesoro den shelu, kaminda ni mòt ni frus no por kome nan, ni ladron no por kibra drenta i hòrta. Pasobra kaminda bo tesoro ta, einan bo kurason tambe lo ta.”—Mat. 6:19-21.

14. Dikon no ta sabí pa montoná tesoro riba tera?

¹⁴ Un hende su “tesoro riba tera” por enserá mas ku plaka. E por enserá kualke un di e kosnan ku Sálomon a papia di dje i ku hende ta balorá, manera prestigio, fama i poder. Bon mirá, Hesus a enfatisá e mesun punto ku Sálomon a resaltá den e buki di Eklesiástes, esta, ku tesoro ku nos por akumulá den mundu no ta dura pa semper. Manera bo por a ripará, e tesoronan ei por kaba na nada òf bo por pèrdè nan di un dia pa otro. Wak kiko Profèser F. Dale Bruner a bisa tokante “tesoro riba tera.” El a skirbi: ‘Mayoria di hende sa ku fama no ta dura pa semper. Un hende por ta famoso awe, pero mañan niun hende no sa ken e ta. Un hende por gana hopi plaka e aña akí, i e siguiente aña, bati bankarota. Komo ku Hesus ta stima hende, e ta spièrta nos ku fama den e mundu akí ta engañoso: Awe e t’ei, pero mañan e por disparsé, lagando hende sin speransa i desapuntá. Esei ta pasa ku hopi hende awe, i Hesus no tabata ke pa esei pasa ku su disipelnan.’ Mayoria di hende ta di akuerdo ku loke e outor  akí a skirbi. Pero kuantu di nan ta sigui e konseho di Hesus? Abo ta hasié?

15. Ki klase di éksito nos mester traha duru pa logra?

¹⁵ Algun lider religioso ta siña hende ku nan no mester hasi esfuerso pa bira eksitoso den ningun sentido. Pero Hesus no a bisa esei. Al kontrario, el a animá su disipelnan pa lucha pa logra berdadero éksito; el a enkurashá nan pa montoná “tesoro den shelu,” pasobra esei lo dura pa semper. Nos deseo di mas grandi mester ta pa ta eksitoso den bista di Yehova. Hesus su palabranan ta rekordá nos ku ta nos kada un ta skohe loke nos ke lucha p’e. Pero realidat ta ku ta loke tin den nos kurason nos ta balorá i lucha p’e.

16. Di kiko nos por tin sigur di dje?

¹⁶ Si nos ta deseá sinseramente di agradá Yehova, nos por tin sigur ku lo e duna nos loke nos tin mester. Pero tin biaha por sosodé ku nos ta sufri di hamber i set meskos ku tabata e kaso ku apòstel Pablo. (1 Kor. 4:11) No opstante, nos por pone tur nos konfiansa den e konseho akí di Hesus: “No sea nunka anshá i puntra: ‘Kiko nos lo kome?’ òf: ‘Kiko nos lo bebe?’ òf: ‘Kiko nos lo bisti?’ Pasobra tur e kosnan akí ta loke e nashonnan ta kore tras di dje. Ma boso Tata selestial sa ku boso tin mester di tur e kosnan akí. Sigui buska anto promé e Reino i e hustisia di Dios, i lo e duna boso tur e kosnan akí.”—Mat. 6:31-33.

17, 18. (a) Di kiko berdadero éksito ta dependé? (b) Di kiko éksito no ta dependé?

¹⁷ Nos tur mester kòrda esaki: Berdadero éksito no ta dependé di nos logronan ni di nos posishon den e mundu akí. Es mas, berdadero éksito no ta dependé di e responsabilidatnan ku nos por tin den kongregashon. Privilegionan asina básikamente ta resultado di obedensia i fieldat na Dios, kende ta bisa nos: “Loke ta ser ferwagt di un mayordomo ta pa e ta fiel.” (1 Kor. 4:2) I nos mester sigui hasi esfuerso pa ta fiel na Dios. Hesus a bisa: “Esun ku perseverá te na fin lo ser salbá.” (Mat. 10:22) Bo no ta di akuerdo ku nos salbashon lo ta un prueba palpabel ku nos realmente tabata eksitoso?

¹⁸ Manera nos a mira, berdadero éksito ta dependé di nos fieldat na Dios. I nos tur por keda fiel na Dios apesar di nos sirkunstansia di bida. Pues, nos fieldat no ta dependé di nos edukashon ni di kuantu fama òf plaka nos tin. E no ta dependé tampoko di nos inteligensia, talento ni abilidat. Algun sirbidó di Dios di promé siglo tabata riku, pero otronan tabata pober. Apòstel Pablo a konsehá e kristiannan riku pa nan “hasi bon, pa nan ta riku den bon obra, pa nan ta generoso, kla pa kompartí ku otro.” Sí, tantu hende riku komo pober por a “haña un gara firme riba loke realmente ta bida.” (1 Tim. 6:17-19) I esei ta konta pa nos tambe. Nos tur tin e mesun oportunidat i responsabilidat: Nos mester keda fiel na Dios i ser “riku den bon obra.” Si esei ta e kaso, nos lo ta eksitoso den bista di nos Kreador, i nos lo tin e satisfakshon ku nos ta agrad’é.—Pro. 27:11.

19. Kiko bo ta determiná pa hasi pa logra berdadero éksito?

¹⁹ Kisas, nos no por kambia nos sirkunstansia di bida; loke sí nos por kambia ta e manera ku nos ta trata ku esaki. Sea kual sea nos sirkunstansia, laga nos hasi tur nos esfuerso pa keda fiel na Dios. E ta bale la pena. Yehova lo bendishoná nos rikamente, awor i pa semper. Nunka lubidá loke Hesus a bisa kristiannan ungí: “Sea fiel, sí, asta te na morto, i lo mi duna bo e korona di bida.” (Rev. 2:10) Sí, tur persona ku risibí bida eterno tabatin un bida berdaderamente eksitoso!