Na yüli 1879, nos a publiká e promé edishon di e revista ku bo ta lesando aktualmente. For di e tempu ei padilanti, hopi kos a kambia, inkluso e revista akí. (Wak e potrètnan ariba.) Kuminsando ku e edishon akí, lo bo mira mas kambio den e diseño di E Toren di Vigilansia. Kiko ta e kambionan?

Un di e motibunan ta ku den hopi pais mas i mas hende ta gusta buska informashon online. Ku un klek di nan mouse, nan por haña un sinfin di informashon disponibel solamente riba Internet. Por ehèmpel, nan por lesa tur tipo di buki, revista i korant online.

Teniendo tur esaki na mente, nos a disidí di duna nos website jw.org un bachi nobo, ku e meta di hasié mas interesante i fásil pa traha kuné. Personanan ku bishitá e site por lesa publikashonnan ku a ser tradusí den mas ku 430 idioma. Pero, kuminsando e luna akí, algun artíkulo ku nos tabata publiká den nos revistanan imprimí lo ta disponibel na otro idioma solamente riba nos website. *

Komo ku nos lo sigui publiká mas artíkulo solamente online, nos lo redusí e edishon di E Toren di Vigilansia pa públiko di 32 página pa 16 página, kuminsando ku e edishon akí. Nos ta tradusiendo E Toren di Vigilansia na 204 idioma kaba. P’esei awor ku e edishon pa públiko tin ménos página, nos lo por tradusié na mas tantu idioma ainda.

Nos ta spera ku e kambionan akí lo yuda nos alkansá mas tantu hende ku e mensahe di Beibel ku ta salba bida. Nos ta determiná pa sigui duna un variedat amplio di informashon instruktivo i interesante, tantu imprimí komo online, pa yuda tur nos lektornan ku tin rèspèt pa e Palabra di Dios i ku ke sa kiko e ta siña realmente.

E Editornan