Bo tin gana di konosé Dios—sa ken e ta, kiko e ta gusta, kiko e no ta gusta i kiko ta su boluntat? Den su Palabra, Beibel, Yehova Dios ta revelá e bèrdat tokante su mes. Pero no ta tur hende ku ta lesa Beibel por komprondé e bèrdat ei kompletamente. Dikon nò? Pasobra ta algun hende so a haña e privilegio ei. Ban wak kiko Hesus a bisa enkuanto esaki.—Lesa Mateo 11:25.

Ripará e palabranan ku e versíkulo ei ta kuminsá kuné: “Na e okashon ei Hesus a bisa.” Ta parse ku loke Hesus tabata bai bisa tabata relashoná ku loke a kaba di sosodé. El a kaba di skual e habitantenan di tres stat di Galilea, kaminda el a hasi mayoria di su obranan poderoso, pasobra nan no kier a aseptá su mensahe. (Mateo 11:20-24) Kisas bo ta puntra bo mes: ‘Kon un hende por yega asina leu di mira e milagernan ku Hesus a hasi i no aseptá e bèrdatnan ku el a siña hende?’ Nan no kier a bira disipel di Hesus pasobra nan tabata tèrko.—Mateo 13:10-15.

Hesus tabata sa ku pa nos por komprondé e bèrdat tokante Dios ku tin den Beibel, nos tin mester di dos kos: e yudansa di Dios i e motivashon korekto. Hesus a bisa: “Mi ta alabá bo públikamente, Tata, Señor di shelu i tera, pasobra bo a skonde e kosnan akí for di hende sabí i intelektual i a revelá nan na mucha chikitu.” Bo ta komprondé awor dikon ta algun hende so tin e privilegio di komprondé e bèrdat tokante Dios? Komo ku Yehova ta e “Señor di shelu i tera,” ta e tin derecho di disidí na ken e ta revelá e bèrdat ei. Ma tur hende ta haña chèns di komprondé e bèrdat, pasobra Dios no ta hasi distinshon di persona. Kiko Dios ta wak pa mira si e ta revelá bèrdat bíbliko na un hende i na un otro nò?

Yehova ta gusta hende humilde, no esnan orguyoso. (Santiago 4:6) E ta skonde e bèrdat for di “hende sabí i intelektual.” E sabí- i siñánan di e mundu akí ta muchu orguyoso pa aseptá e yudansa di Dios. (1 Korintionan 1:19-21) Ma e ta revelá e bèrdat na “mucha chikitu”—hende humilde ku ta buska su yudansa di kurason. (Mateo 18:1-4; 1 Korintionan 1:26-28) Hesus, e Yu di Dios, a konosé tur e dos klase di hendenan ei. Hopi lider religioso bon siñá i orguyoso no a kapta e mensahe di Hesus, pero piskadónan humilde sí a komprondé esaki. (Mateo 4:18-22; 23:1-5; Echonan 4:13) Na mesun tempu, algun hende riku i bon siñá ku di bèrdat tabata humilde a bira siguidó di Hesus.—Lukas 19:1, 2, 8; Echonan 22:1-3.

Laga nos bolbe na e pregunta ku nos a hasi na kuminsamentu: Bo tin gana di konosé Dios? Si ta asina, lo bo ta kontentu di sa ku Dios no ta gusta hende ku ta konsiderá nan mes sabí den bista di mundu. Al kontrario, e ta gusta hende ku esnan sabí den bista di mundu ta menospresiá. P’esei si bo studia e Palabra di Dios ku un aktitut humilde i e motivashon korekto, lo bo por ta un di esnan ku Yehova ta duna e regalo presioso di komprondé e bèrdat tokante dje. Ora bo komprondé e bèrdat ei, bo bida ta haña muchu mas nifikashon for di awor, i esei por hiba na “loke realmente ta bida”—bida pa semper den un hustu mundu nobo ku Dios a primintí ku lo bini pronto. *—1 Timoteo 6:12, 19; 2 Pedro 3:13.