Kiko Dios ta pidi di nos? El a duna nos un kantidat di regla ku nos tin ku sigui? Nò! Segun Hesus, e Yu di Dios, nos por resumí loke Dios ta pidi di nos den un solo palabra.—Lesa Marko 12:28-31.

Laga nos wak promé na ki okashon Hesus a bisa esaki. E tabata siña hende den e tèmpel riba 11 di nisan, un par di dia promé ku su morto. Su enemigunan tabata hasié algun pregunta kontroversial pa koh’é den trampa. Bes tras bes e tabata tapa nan boka ku su kontestanan sin ku nan por a puntr’é nada mas. Despues di esei, nan a hasi Hesus e pregunta akí: “Di tur e mandamentunan, kua ta esun di mas importante?”—Versíkulo 28.

Esei no tabata un pregunta fásil. Algun hudiu tabata debatí ku otro tokante kua di e 600 i piku leinan ku a forma parti di e Lei di Moises tabata esun di mas importante. Ta parse ku otronan tabata pretendé ku tur e leinan tabata mes importante i ku ta robes pa pensa ku algun di nan tabata mas importante ku otro. Kon Hesus lo a kontestá e pregunta ei?

Den su kontesta, Hesus a menshoná dos mandamentu na lugá di un so. El a bisa ku e promé ta: “Bo tin ku stima Yehova bo Dios ku henter bo kurason, ku henter bo alma, ku henter bo mente i ku tur bo forsa.” (Versíkulo 30; Deuteronomio 6:5) Ku otro palabra: Amor pa Yehova tin di haber ku e persona kompleto, esta, tur su abilidatnan, energia i rekursonan. Un obra di konsulta a bisa asin’akí: “Nos tin ku stima Dios den un forma kompleto.” Pues, si bo ta stima Dios, bo tin ku hasi bo bèst tur dia pa gana su aprobashon.—1 Huan 5:3.

Na di dos lugá, Hesus a bisa: “Stima bo próhimo meskos ku bo mes.” (Versíkulo 31; Levítiko 19:18) Amor pa Dios i amor pa próhimo ta estrechamente ligá ku otro. Ora nos ta stima Dios, nos ta stima nos próhimo tambe. (1 Huan 4:20, 21) I si nos ta stima nos próhimo meskos ku nos mes, nos lo trata hende manera nos ke pa nan trata nos. (Mateo 7:12) Asina nos ta demostrá ku nos ta stima e Dios ku a krea tantu nos komo nan den su imágen.—Génesis 1:26.

Kon importante e mandamentunan akí ta? Hesus a bisa: “No tin ningun otro mandamentu mas grandi ku esakinan.” (Versíkulo 31) Den un relato paralelo, Hesus a bisa ku tur e otro mandamentunan ta basá riba e dos mandamentunan akí.—Mateo 22:40.

No ta difísil pa agradá Dios. Nos por resumí tur loke e ta pidi di nos den un solo palabra: amor. Esei semper tabata i lo sigui ser e fundeshi di e adorashon ku nos ta rindi na dje. Pero, amor no ta djis un asuntu di palabra i sintimentu; e tin ku ser demostrá tambe pa medio di akshon. (1 Huan 3:18) Lo bo no tin gana di sa kon bo por kultivá i demostrá bo amor pa Yehova Dios, kende “ta amor”?—1 Huan 4:8.