HESUS su bida tabatin sentido? El a lanta den un ambiente humilde, i durante su bida e no tabatin hopi kos material. Realmente, e no tabatin ni sikiera un “kaminda pa pone su kabes.” (Lukas 9:57, 58) Ademas, su enemigunan a odi’é, kalumni’é i finalmente a laga mat’é.

Kisas bo ta pensa: ‘Esei no ta loke mi ta yama un bida ku sentido.’ Pero tin hopi aspekto di Hesus su bida ku ta bale la pena pa konsiderá. Ban analisá kuater di nan.

“Mi kuminda ta pa hasi e boluntat di esun ku a manda mi.”—Huan 4:34.

Tantu ku palabra komo akshon, Hesus kier a hasi e boluntat di su tata selestial, Yehova. * E tabatin un goso grandi den kumpli ku e boluntat di Dios. De echo, manera e teksto bíbliko sitá ta mustra, Hesus a kompará esei ku su kuminda. Laga nos analisá e sirkunstansianan den kua el a hasi e komparashon ei.

Ora Hesus a bisa e palabranan ei, tabata mèrdia kaba. (Huan 4:6) El a kana henter mainta dor di Samaria, ku ta un lugá yen di seru. Pues no tin duda ku e tabatin hamber. De echo, su disipelnan mes a urgié: “Rabi, kome.” (Huan 4:31) Pero loke Hesus a bisa nan a indiká ku ta e trabou ku Dios a mand’é hasi a dun’é e nutrishon i fortalesa ku e tabatin mester. Bo no ta haña ku Hesus a hiba un bida ku tabata bale la pena?

“Mi ta stima e Tata.”—Huan 14:31.

Hesus tabatin un relashon masha será ku su Tata den shelu. E amor ku Hesus tabatin pa Dios a motiv’é pa siña hende di e kualidatnan, propósito i tambe nòmber di su Tata. Pues ku su palabranan, su akshon i su aktitut, Hesus a reflehá su Tata na un manera perfekto; e tabata enditu su Tata. P’esei ora Felipe a pidié: “Mustra nos e Tata,” Hesus a kontest’é: “Esun ku a mira mi, a mira e Tata tambe.”—Huan 14:8, 9.

Hesus a stima su Tata asina tantu ku e tabata dispuesto pa obedes’é te na morto. (Filipensenan 2:7, 8; 1 Huan 5:3) E amor ei a duna su bida berdadero sentido.

“Ningun hende no tin un amor mas grandi ku esun ku ta entregá su alma pa su amigunan.”—Huan 15:13.

Komo hende imperfekto, nos tin ku rekonosé ku nos futuro no ta muchu alentador. Beibel ta bisa: “Pa medio di ún hende [Adam] piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Romanonan 5:12) Riba nos mes nos no por skapa di e konsekuensia di piká, esta morto.—Romanonan 6:23.

Pero nos por ta kontentu ku Yehova, den su gran amor, a perkurá e solushon pa humanidat. El a permití su Yu perfekto i sin piká, Hesus, sufri i muri pa asina perkurá e reskate nesesario pa libra humanidat for di sklabitut na piká i morto. Hesus, motivá pa amor pa su Tata i pa hende, a duna su bida humano perfekto di buena gana na nos fabor. (Romanonan 5:6-8) Tal klase di amor sin egoismo a duna su bida berdadero sentido. *

“Esaki ta mi Yu stimá, esun ku tin mi aprobashon.”—Mateo 3:17.

Ora Hesus a batisá, Yehova a papia e palabranan ei for di shelu. Asina Yehova a ekspresá abiertamente ku el a stima i aprobá su Yu. P’esei Hesus por a bisa ku tur konfiansa: “E Tata stima mi.” (Huan 10:17) Sabiendo ku su Tata stim’é i ku e tin su aprobashon, e por a enfrentá oposishon i krítika ku kurashi. Asta e por a mantené su balansa i stabilidat emoshonal ora e tabatin ku enfrentá morto. (Huan 10:18) E echo ku Hesus tabata sa ku e tabatin e amor i aprobashon di su Tata definitivamente a duna su bida mas sentido ainda.

Sin duda, Hesus tabatin un bida ku berdadero sentido. Nos tambe por siña hopi for di Hesus pa nos tambe por tin un bida ku berdadero sentido. Den e siguiente artíkulo nos lo konsiderá algun bon konseho ku Hesus a duna su siguidónan tokante kon nan por hiba un bida ku ta bale la pena.