Mi a nase den e stat chikitu di Texcoco. Tempu mi tabata mucha, mayoria di e kayanan tabata di tera. Tabata masha normal pa mira hende di e pueblonan den serkania trese nan burikunan kargá ku kos pa bende. Mi a lanta den un famia masha pober, i ami tabata e di shete yu den nuebe ruman. Mi tata tabata drecha guarache (sandalia) pa kria e famia. Ma tempu mi tabatin shete aña, el a muri. For di e tempu ei padilanti, ta mi mama tabatin ku lucha pa pone pan riba mesa.

Mi tawela tabata toka violin i tabata dirigí un orkesta spesialisá den muzik klásiko religioso. Kasi henter mi famia tabata toka un instrumènt. Mi mama tabata kanta den kor di misa, i mi tio tabata kantante di ópera i pianista. Nos tabata katólikonan deboto, i ami tabata un sirbidó di misa. Mi soño tabata pa bira un misionero. Pero na mesun tempu mi tabata gusta wak pelíkula di karate. Mas mi tabata wak nan, mas violento mi tabata bira.

Mi a bai un skol religioso na e stat Puebla ku tabata fungi komo un seminario. Mi meta tabata pa bira un pastor katóliko. Pero den mi último aña di estudio, mi a keda desapuntá ku Iglesia Katóliko. Un sùr yòn tabata tira riba mi. Mi a resistí e tentashon wèl, pero el a lanta den mi e deseo di kasa. Ademas, mi tabata mira kon vários pastor tabata hiba un bida dòbel. Ku tempu, mi a legumai mi meta di bira pastor.

Mi a disidí di studia muzik na e Konservatorio Nashonal di Muzik na Suidat di México. Ora mi a gradua, mi a kasa,  i den poko tempu nos a haña kuater yu. Mi tabata kria mi famia ku kantamentu durante misa.

For di den salida nos tabatin problema den nos matrimonio. Ami ku mi kasá tabata trata otro hopi malu, prinsipalmente pasobra nos tabata yalurs riba otro. Na prinsipio nos tabata papia malu ku otro, ma despues nos a kuminsá maltratá otro. Despues di 13 aña, nos a disidí di separá for di otro, anto poko despues nos a divorsiá.

Mi promé kontakto ku Testigunan di Yehova tabata promé ku mi a separá for di mi kasá. Dos di nan a yama na nos kas i a ofresé pa papia tokante Beibel ku mi. Segun mi, mi tabata sa hopi tokante religion, pues mi a aseptá pa mi proba nan ku nan tabata kiboká. Mi tabata hasi pregunta difísil ku segun mi nan no por a kontestá. Pero pa mi sorpresa, semper nan tabata kontestá mi a base di Beibel. Mi a kuminsá mira kon tiki mi tabata sa realmente. Sinembargo, mi esposa tabata trata e Testigunan masha malu, i ami tabata hopi drùk. P’esei e bishitanan a kaba na nada.

Sinku aña despues, mi a bolbe haña kontakto ku Testigunan di Yehova. E tempu ei mi tabata biba ku un señora ku yama Elvira. E sí no tabata kontra e Testigunan. Pues tabata mas fásil pa mi studia Beibel riba un base regular. Asina mes, a tuma mi hopi aña pa mi libra mi mes di mi pasado.

Mi a realisá ku si mi kier a sirbi Yehova ku henter mi kurason, mi tabatin ku hasi algun kambio grandi den mi bida. Di promé, mi tabatin ku kita for di mi trabou di kanta den misa. Esei a nifiká ku lo mi tabatin ku haña un otro manera pa gana mi pan di kada dia. (Revelashon 18:4) Ademas, mi tabatin ku kasa ku Elvira pa legalisá mi union kuné.

Pero un di e kambionan di mas difísil ku mi tabatin ku hasi tabata di siña kontrolá mi temperamento violento. Dos versíkulo di Beibel tabata un gran yudansa pa mi: Salmo 11:5, ku ta mustra ku Yehova ta odia violensia, anto 1 Pedro 3:7, ku a siña mi ku si mi ke pa Yehova skucha mi orashonnan, mi mester trata mi kasá ku dignidat. Segun ku mi tabata meditá riba e versíkulonan akí i pidi Yehova su yudansa den orashon, pokopoko pero sigur mi a logra dominá mi temperamento.

Awor mi tin un bida di famia felis. Mi ta hasiendo mi esfuersonan pa drecha mi relashon ku mi yu hòmbernan di mi promé matrimonio i yuda mi famia aktual keda ku un fe firme.

Komo mucha, mi soño tabata pa bira pastor pa yuda hende. Awor mi ta sinti ku mi bida tin un berdadero propósito. Mi ta duna lès di muzik pa kria mi famia. Mi ta masha gradisidu ku Yehova tabatin pasenshi ku mi, ku el a duna mi oportunidat di kambia i bira un mihó hende!