“MI TIN un soño.” Sinkuenta aña pasá, riba 28 di ougùstùs 1963, Martin Luther King, Jr., un merikano ku a lucha pa derecho sivil, a ekspresá e palabranan ei den su spich di mas famoso. El a ripití e frase fasinante ei vários biaha pa ekspresá su deseo ku un dia tur hende lo ta liber di prehuisio rasial. Aunke el a dirigí su mes na un públiko na Merka, hende di hopi nashon a aseptá e esensia di su soño.

Tres luna despues di Martin Luther su diskurso, riba 20 di novèmber 1963, mas ku 100 pais a adoptá e Deklarashon di Nashonnan Uní tokante Eliminashon di Tur Forma di Diskriminashon Rasial. Den e dékadanan ku a sigui, tabatin otro deklarashonnan similar ku nashonnan rònt mundu a adoptá. Despues di tantu esfuerso, kisas hende ta puntra: Kiko tabata e resultado?

Riba 21 di mart 2012, e Sekretario General di ONU, Ban Ki-moon a bisa: “Tin hopi tratado i otro medionan balioso—i tambe un agènda ekstenso—pa evitá i eliminá rasismo, diskriminashon rasial, odio pa estranhero, i otro formanan di intoleransia. No opstante, rasismo ta sigui kousa sufrimentu pa miónes di hende rònt mundu.”

Asta den paisnan kaminda nan a logra hasi progreso den kombatí prehuisio rasial i otro formanan di prehuisio, e pregunta ta keda: Realmente a logra eliminá sintimentunan profundamente ankrá den hende òf a djis siña hende pa no ekspresá nan sintimentunan? Tin hende ta pensa ku e progreso ei ta djis yuda prevení diskriminashon, pero no por eliminá prehuisio sí. Dikon? Pasobra diskriminashon ta algu ku otro hende por mira i ta kastigabel pa lei, miéntras ku prehuisio tin di haber ku hende su pensamentu- i emoshonnan, loke no ta fásil pa kontrolá.

P’esei, pa logra kaba ku prehuisio mester eliminá diskriminashon, i tambe kambia hende su manera di pensa i su sintimentunan pa ku hende di otro grupo. Esaki ta posibel? Si ta asina, kon? Laga nos wak algun ehèmpel di bida real ku lo yuda nos mira ku hende por kambia i tambe ku tin algu ku por yuda nan hasi esei.

Linda: Mi a nase na Suráfrika. Mi tabata konsiderá tur hende di mi pais ku no ta blanku komo inferior, sin edukashon, inkonfiabel i komo sirbiente di hende blanku. Mi tabata esklabo di prehuisio i mi no a realisá esei mes. Sinembargo, mi aktitut a kambia ora mi a kuminsá studia Beibel. Mi a siña ku “Dios no ta hasi distinshon di persona” i ku loke tin den nos kurason ta mas importante ku nos koló di kueru òf e idioma ku nos ta papia. (Echonan 10:34, 35; Proverbionan 17:3) E teksto di Filipensenan 2:3 a yuda mi mira ku si mi konsiderá ku otro hende ta mas ku mi, esei lo yuda mi vense prehuisio. Ora mi a kuminsá biba na armonia ku prinsipio di Beibel, esei a yuda mi mustra interes den otro hende sin importá nan rasa. Awor mi no ta sinti mi esklabo di prehuisio mas.

 Michael: Mi ta di Australia i a lanta den un área kaminda mayoria di hende ta blanku. I mi tabatin prehuisio fuerte kontra asiátiko, spesialmente chines. Ora mi tabata kore den mi outo, i a mira un di nan, mi tabata baha mi bentana i grita kosnan ofensivo manera: “Bai bo lugá bèk, chino!” Mas despues, ora mi a kuminsá studia Beibel, mi a haña sa kon Dios ta mira hende. E ta stima nan sin importá di unda nan ta òf ki aparensia nan tin. Esei a konmové mi kurason, i mi a stòp di odia e hendenan ei i a kuminsá stima nan. Mi mes a keda sorprendí di e kambio drástiko ku mi a hasi. Awor mi ta disfrutá di kompania di hende di tur rasa i nashon. Mi punto di bista a kambia kompletamente i esei a hasi mi masha felis.

Sandra: Mi mama ta di e pueblo Umunede den e Estado di Delta, Nigeria. Pero, mi tata su famia ta di e Estado di Edo i nan ta papia e idioma esan. Debí na e diferensianan akí, mi mama tabata víktima di prehuisio severo di parti di mi tata su famia te dia el a muri. P’esei, mi a hura ku mi no ke tin nada di hasi ku niun hende ku ta papia e idioma esan i ku hamas lo mi kasa ku un hende di e Estado di Edo. Pero, ora mi a kuminsá studia Beibel, mi punto di bista a kambia. Beibel ta bisa ku Dios no ta hasi distinshon di persona i ku e ta aseptá tur hende ku ta tem’é. Pues, ken ami ta pa odia hende di otro tribu òf ku ta papia otro idioma? Mi a kambia mi manera di pensa i mi a drecha mi relashon ku famia di mi tata. Ora mi a kuminsá apliká prinsipio di Beibel, mi a sinti mi masha felis i mi a haña pas mental. Ademas, Beibel a siña mi trata otro hende bon sin importá nan background, idioma, rasa òf nashonalidat. Anto rei ku ken mi a kasa? Un hòmber di e Estado di Edo ku ta papia e idioma esan!

Dikon ta Beibel so por a yuda e personanan akí i hopi otro hende vense prehuisio i odio ku ta profundamente ankrá? Pasobra Beibel ta e Palabra di Dios i e tin poder pa kambia e manera ku un hende ta pensa di un otro persona i su sintimentu  pa kuné. Ademas, Beibel ta mustra kiko mas ta nesesario pa por kaba ku tur prehuisio.

Ta bèrdat ku konosementu di Beibel por yuda un hende kontrolá su sintimentunan robes i saka nan for di su kurason, pero tin dos problema mas ku mester eliminá promé ku por kaba kompletamente ku prehuisio. E promé ta piká i imperfekshon. Beibel ta bisa masha kla: “No tin ningun hende ku no ta peka.” (1 Reinan 8:46) Pues, ni maske kuantu esfuerso nos hasi, nos tur tin e mesun lucha ku apòstel Pablo tabatin. El a skirbi: “Ora mi ta deseá di hasi loke ta korekto, loke ta malu ta den mi.” (Romanonan 7:21) P’esei, de bes en kuando, “mal pensamentu” por sali for di nos kurason imperfekto, esaki, na su turno, por pone nos trata hende ku prehuisio.—Marko 7:21.

E di dos problema ta e influensia di Satanas e Diabel. Beibel ta bisa ku e ta “un matadó” i ku e “ta gaña henter e tera habitá.” (Huan 8:44; Revelashon 12:9) Esei ta yuda nos komprondé pakiko tin prehuisio rònt mundu i dikon ta imposibel pa hende eliminá prehuisio, diskriminashon, genosidio, i otro formanan di intoleransia rasial, sosial i religioso.

P’esei, promé ku por logra kaba ku prehuisio kompletamente, mester eliminá piká, imperfekshon i e influensia di Satanas e Diabel. Beibel ta bisa ku e Reino di Dios lo hasi nèt esei.

Hesukristu a siña su siguidónan pa pidi Dios den orashon: “Laga bo Reino bini. Laga bo boluntat sosodé, meskos ku den shelu, tambe riba tera.” (Mateo 6:10) Sí, Dios ta bai usa su Reino pa eliminá intoleransia, prehuisio i tur otro forma di inhustisia.

Ora e Reino di Dios bini i kuminsá goberná e tera, Satanas lo ser ‘mará,’ es desir, lo e no tin ningun klase di influensia mas. Pues, lo ‘e no por gaña e nashonnan mas.’ (Revelashon 20:2, 3) Despues lo bai tin un “tera nobo,” òf sosiedat humano nobo, i den esaki “hustisia lo biba.” *—2 Pedro 3:13.

Tur hende ku lo biba den e sosiedat humano hustu ei lo bira perfekto i lo ta liber di piká. (Romanonan 8:21) Komo súpditonan di e Reino di Dios, ‘nan lo no hasi daño ni kousa destrukshon.’ Dikon nò? “Pasobra tera lo ta yen di e konosementu di SEÑOR.” (Isaías 11:9) Na e tempu ei, henter humanidat lo siña konosé Yehova Dios su kamindanan i lo imitá su kualidatnan amoroso. Sí, prehuisio lo ser eliminá kompletamente, “pasobra Dios no ta hasi distinshon di persona.”—Romanonan 2:11.