Beibel ta bisa: “Ora ku un malbado ta goberná, pueblo ta suspirá.”​—Proverbionan 29:2.

Historia ta yen di ehèmpel di diktador ku a goberná ku man duru i kousa hopi sufrimentu pa nan pueblo. Klaru ku no ta tur dirigente polítiko ta goberná di tal forma. Algun tin bon intenshon. Pero unabes nan yega na poder, hopi biaha nan ta ripará ku konflikto interno i lucha pa poder ta frustra nan esfuersonan. Otronan ta hasi mal uso di nan poder pa saka probecho riba kustia di pueblo. Henry Kissinger, eks-sekretario di estado di Merka, a yega di bisa: “Historia ta un suseshon di esfuersonan ku a frakasá, di aspirashonnan ku no a materialisá.”

Beibel ta indiká tambe ku “no ta keda na hende pa dirigí su pasonan.” (Yeremías 10:23) Hende imperfekto no tin e sabiduria ni e vishon nesesario pa dirigí nan mes asuntunan ku éksito. Si un hende no por dirigí ni su propio pasonan, kon e ta hasi dirigí esnan di henter un nashon? Bo ta komprondé awor dikon gobernantenan no por kaba ku sufrimentu? De echo, den mayoria di kaso, ta mal gobernashon ta e kousa di sufrimentu!

Hesus a bisa: “Na esaki tur hende lo sa ku boso ta mi disipelnan, esta, si boso ta stima otro.”​—Huan 13:35.

Lidernan religioso di tur denominashon ta prediká tokante amor i union. Ma echo ta ku nan no a yuda nan miembronan kultivá un amor sufisiente grandi pa vense prehuisio. En bes di yuda nan kultivá amor, hopi bes religion mes ta fomentá divishon, odio i pleitu entre hende i nashon. E teólogo Hans Küng a bisa den e parti final di su buki Christianity and the World Religions: “E luchanan polítiko mas ferviente i kruel ta esnan ku religion a okashoná, inspirá i legalisá.”

 Ademas, lidernan di hopi religion a aprobá relashon seksual pafó di matrimonio i tambe homoseksualidat. Esei a hiba na un eksploshon di enfermedat, aborto, embaraso no deseá i matrimonio i famia kibrá, loke a resultá den hopi doló i angustia.

“Kada hende ta ser poné na prueba ora e ser atraí i sedusí pa su mes deseo. Anto ora nutri e deseo, e ta duna lus na piká.”​—Santiago 1:14, 15.

Debí na e imperfekshon ku nos a heredá, nos tur tin e tendensia di faya, i tambe nos tin ku lucha kontra e impulso di ‘hasi loke nos karni ta deseá.’ (Efesionan 2:3) Ma ora nos haña un mal deseo i un oportunidat presentá pa kumpli kuné, e lucha ta bira mas duru ainda. Si nos entregá na deseonan robes, e konsekuensianan por ta fatal.

E outor P. D. Mehta a skirbi: “Gran parti di nos sufrimentu ta debí na nos mes mal deseonan, nos korementu tras di plaser desenfrená i egoista, nos kudishi i nos ambishon.” Mal deseo i tur tipo di adikshon—na alkohòl, droga, wega di plaka, sèks i otro kosnan—a hiba hopi “hende respetá den komunidat” na ruina i a kousa hopi sufrimentu na nan famia, amigu i otro hende. En bista di imperfekshon humano, nos ta di akuerdo ku loke Beibel ta bisa: “Henter kreashon huntu ta sigui keña i ta keda den doló.”​—Romanonan 8:22.

Beibel ta mustra ku ta Satanas ta “e dios di e mundu akí” i ku otro spiritunan malbado i poderoso, esta, e demoñonan, a uni kuné.​—2 Korintionan 4:4; Revelashon 12:9.

Meskos ku Satanas, e demoñonan akí tambe ta kontrolá i gaña hende. Apòstel Pablo a atmití esaki ora el a bisa: “Nos lucha no ta kontra karni i sanger, sino kontra gobièrnu, kontra outoridat, kontra gobernante di mundu di e skuridat akí, kontra forsanan spiritual di maldat den lugánan selestial.”​—Efesionan 6:12.

Aunke e demoñonan gusta tormentá hende, esei tòg no ta nan meta prinsipal. Loke ta interesá nan mas ta pa alehá hende for di Yehova, e Dios Haltísimo. (Salmo 83:18; Revelashon 4:11) Astrologia, magia, hasimentu di bruha i miramentu di destino ta djis algun di e práktikanan ku e demoñonan ta usa pa gaña i kontrolá hende. Ta p’esei Yehova ta spièrta nos di e peligernan ei i ta protehá tur esnan ku ke oponé Satanas i e demoñonan.​—Santiago 4:7.

Un dos mil aña pasá, Beibel a bisa: “Sa esaki: den e último dianan lo bini tempunan krítiko, difísil pa trata kuné.”

Pa mustra dikon tempu ta krítiko, Beibel ta sigui bisa: “Pasobra hende lo stima nan mes, stima plaka; nan lo ta bromadó, arogante, . . . sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo, ku ta stima plaser en bes di stima Dios.” Pues, un di e motibunan prinsipal pakiko tin tantu sufrimentu aworakí ta pasobra nos ta bibando “den e último dianan.”​—2 Timoteo 3:1-4.

En bista di loke nos a kaba di konsiderá, no ta bisto awor dikon hende, apesar di tur nan bon intenshonnan, no por kaba ku sufrimentu? Pero unda nos por haña yudansa? Nos tin ku akudí na nos Kreador, kende a primintí di “destruí e obranan di Diabel” i su siguidónan. (1 Huan 3:8) E siguiente artíkulo lo bai mustra kiko Dios lo hasi pa kaba ku tur kousa di sufrimentu.