Tempu mi tabatin tres aña di edat, outoridatnan a deportá mi tata, mi tio i mi tawela pa motibu di nan posishon neutral komo kristian pa bai traha den kampamentu di trabou fòrsá. Mi tata ta e úniko ku a sobrebibí. Na 1947, despues di Segundo Guera Mundial, el a bolbe kas ku un fraktura na su lomba. Aunke e tabata físikamente na wèrki, su fe sí tabata fuerte.

Tempu mi tabatin nuebe aña, outoridatnan a deportá mi famia i sientos di otro Testigu di Yehova di Moldova pa Siberia. Dia 6 di yüli 1949, nan a pròp nos den wagòn pa transportá bestia. Despues di un biahe di 12 dia i mas ku 6.400 km nos a yega na e stashon di trein na Lebyazhe. Ei outoridatnan lokal tabata warda riba nos. Nan a parti nos den diferente grupo chikitu i a manda nos mesora na diferente lugá den e área ei. Nos grupo a haña alohamentu den un skol chikitu ku tabata bashí. Nos tabata kansá i desanimá. Un señora di edat ku tabata huntu ku nos a kuminsá neuri un kantika ku Testigunan di Yehova a komponé durante Segundo Guera Mundial. Djis despues nos tur a kuminsá kanta huntu kuné e palabranan di e kantika:

“Hopi ruman a ser deportá pa lugánan leu.

Nan a manda nan nort i ost.

Pa motibu ku nan a sirbi Dios, nan a sufri hopi i tabatin ku wanta pruebanan mortífero.”

Ku tempu nos por a kuminsá asistí na reunionnan kristian tur djadumingu na un kas ku tabata keda 13 km leu for di kaminda nos tabata biba. Hopi biaha nos mester a sali mainta trempan den dianan skur di wenter ora temperatura tabata 40 grado Celsius bou di sero i kana den sneu ku tabata yega te na nos sintura. Nos tabata reuní ku mas òf ménos 50 òf mas hende den un kamber chikitu. Nos tabata kuminsá e reunion kantando un, dos òf tres kantika. Despues di hasi un orashon di kurason, nos tabata konsiderá preguntanan basá riba Beibel pa mas o ménos un ora. Despues nos tabata kanta otro kantikanan i konsiderá mas pregunta basá riba Beibel. Esei a fortalesé nos fe mashá.

Na 1960, e Testigunan den eksilio a haña mas libertat. Maske nos tabata pober, mi por a bishitá Moldova kaminda mi a konosé Nina, kende su mayornan i su welanan tambe tabata Testigu. Pronto nos a kasa i a muda bai Siberia bèk, kaminda nos yu muhé  Dina a nase na 1964 i nos yu hòmber Viktor na 1966. Dos aña despues nos a muda bai Ukrania i a bai biba den un kas chikitu na Dzhankoy, un stat ku ta keda mas o ménos 160 km for di Yalta, riba e península di Crimea.

E obra di Testigunan di Yehova na Crimea tabata prohibí, meskos ku na henter Union Soviétiko. Pero nos trabou no tabata kompletamente restringí, ni nos no tabata ser persiguí abiertamente. P’esei algun Testigu a kuminsá baha man den aktividat kristian. Nan tabata rasoná ku despues ku nan a sufri asina tantu na Siberia, awor tabata tempu pa nan traha duru pa logra algun kos material.

Dia 27 di mart 1991, nos trabou na loke e tempu ei tabata Union Soviétiko a haña rekonosementu legal. Mesora e rumannan a traha plan pa selebrá shete kongreso spesial di dos dia den henter e pais. Nos mester a asistí na esun ku lo a ser ten’é na Odessa, Ukrania, kuminsando dia 24 di ougùstùs. Mi a bai un luna promé pa yuda prepará e stadion grandi di futbòl pa e kongreso.

Nos tabata traha henter dia i hopi biaha nos tabata drumi anochi riba e bankinan di stadion. Grupo di rumannan muhé a limpia e parke rònt di e stadion. Nos a saka mas òf ménos 70 tòn di sushi. Esnan enkargá ku e departamento di alohamentu a buska den henter e stat pa asina haña lugá di keda pa e 15.000 delegadonan ku nan tabata spera. Pero diripiente nos a haña un mal notisia.

Dia 19 di ougùstùs, nèt sinku dia promé ku e kongreso mester a kuminsá, nan a arestá Mikhail Gorbachev, kende e tempu ei tabata presidente di Union Soviétiko, durante su fakansi serka di Yalta, no muchu leu for di kaminda nos tabata. Outoridatnan a kanselá nos pèrmit pa tene e kongreso. E delegadonan a kuminsá yama na e ofisina di kongreso i puntra kiko nan tabatin ku hasi ku nan reservashon di bùs i trein. Despues di hasi orashon ferviente, e rumannan enkargá ku e organisashon di e kongreso a bisa nan: “Bini numa!”

A sigui ku e preparashonnan i orashonnan. E departamento di transpòrt a kuminsá risibí delegadonan ku tabata yega for di hopi parti di Union Soviétiko i tabata hiba nan na nan lugánan di keda. Tur mainta e miembronan di e Komité di Kongreso tabata bai serka e outoridatnan di e stat. I tur anochi nan tabata bolbe bèk sin bon notisia.

Djaweps dia 22 di ougùstùs, dos dia promé ku e kongreso mester a kuminsá, e miembronan di e Komité di Kongreso a bini bèk ku bon notisia: Nos a haña lus bèrdè pa e kongreso sigui! Ora nos a kanta e kantika di apertura i habri ku orashon, nos a sinti un gran alegria. Despues di e seshon final di djasabra, nos a keda te lat ta kòmbersá ku nos amigunan di ántes ku nos a topa. Tabata trata akí di kristiannan fiel ku a demostrá un fe inkebrantabel.

Durante e mas di 22 añanan despues di e kongreso ei, e obra a krese na un manera fenomenal. A konstruí Salònnan di Reino den henter Ukrania i e kantidat di ruman ku ta prediká e bon notisia di Reino a oumentá di 25.000 na 1991 te na mas ku 150.000 awor.

Nos famia ta biba ketu bai den e mesun kas na Dzhankoy, ku awor ta un stat di mas òf ménos 40.000 habitante. Tabatin masha poko Testigu aki na Dzhankoy ora nos a yega for di Siberia na aña 1968, pero awor tin seis kongregashon.

Mi famia tambe a krese. Awor tin kuater generashon ku ta sirbi Yehova; ami ku mi kasá, nos yunan, nos nietunan i nos bisanietunan.