Yehova ta balorá e esfuersonan di hende ku ta trata di agrad’é? Algun hende ta bisa ku nò, pasobra segun nan Dios no ta interesá den nos. Pero e punto di bista ei ta demostrá ku nan no konosé Dios bon. Su Palabra, Beibel, ta sigurá nos ku Yehova ta interesá den e esfuersonan sinsero di kada un di su sirbidónan. Analisá e palabranan di apòstel Pablo ku nos ta haña na Hebreonan 11:6.

Kiko nos tin ku hasi pa agradá Yehova? Pablo a skirbi: “Sin fe ta imposibel pa agradá Dios.” Tuma nota ku Pablo no ta bisa ku sin fe ta difísil pa agradá Dios, sino ku ta imposibel pa agradá Dios. Ku otro palabra, pa hende por agradá Dios, nan mester tin fe.

Pero kiko fe den Dios ta enserá? E ta enserá básikamente dos kos. Na promé lugá, nos “mester kere ku e ta eksistí.” Pasobra kon nos por agradá Dios si nos ta duda ku e ta eksistí? Pero kere so no ta sufisiente, pasobra asta e demoñonan ta kere ku Dios ta eksistí. (Santiago 2:19) Nos fe ku Dios ta eksistí mester motivá nos pa hiba un bida ku ta agrad’é.—Santiago 2:20, 26.

Na di dos lugá, nos “mester kere ku” Dios ta “rekompensá” hende. Un hende ku tin berdadero fe ta plenamente konvensí ku su esfuersonan pa agradá Dios lo no ta enbano. (1 Korintionan 15:58) Kon nos por agradá Yehova si nos ta duda den su kapasidat òf deseo pa rekompensá nos? (Santiago 1:17; 1 Pedro 5:7) Pues si nos ta pensa ku Dios no ta interesá den nos, ku e no ta balorá nos i ku e no ta generoso, nos no konosé e Dios ku Beibel ta papia di dje.

Ken Yehova ta rekompensá? Pablo a bisa: “Esnan ku ta hasi esfuerso pa busk’é.” Un buki di konsulta pa traduktornan di Beibel ta bisa ku e palabra griego tradusí komo “hasi esfuerso pa busk’é” no ta nifiká djis “bai buska” Dios. Mas bien, e ta nifiká aserká Dios “pa ador’é.” Un otro buki di referensia ta splika ku e verbo griego akí ta enserá intensidat i esfuerso vigoroso. Sí, Yehova ta rekompensá tur hende ku ta laga nan fe motivá nan pa sirbié ku zelo i un amor intenso.—Mateo 22:37.

Ki rekompensa Yehova ta ofresé hende ku ta sirbié fielmente? El a primintí nan un futuro briante: bida eterno den un paradeis aki riba tera. Esei lo ta un muestra di su gran amor i generosidat. (Revelashon 21:3, 4) Pero for di awor, tur hende ku ta hasi esfuerso pa buska Yehova ta risibí hopi bendishon. Ku yudansa di su spiritu santu i e sabiduria ku tin den su Palabra, nan ta disfrutá di un bida felis i yen di satisfakshon.—Salmo 144:15; Mateo 5:3.

En bèrdat, Yehova ta un Dios ku ta balorá e sirbishi fiel di hende ku ta deboto na dje. Awor ku bo sa esaki, bo no ta sinti un deseo di hala serka Dios? Nos ta animá bo anto pa siña mas tokante kon bo por desaroyá e fe ku Yehova ta rekompensá rikamente.