Migarda: Sonia, kon ta? Mi ta kontentu ku nos por a bolbe topa.

Sonia: Mi tambe.

Migarda: Último biaha ku mi a pasa, nos a papia tokante kon Dios ta sinti ora e mira nos sufri. * Bo a menshoná ku esei ta un pregunta ku bo tabata kana kuné pa hopi tempu, foral despues ku bo mama a hañ’é enbolbí den un aksidente di tráfiko. Den tur esei, kon a sigui kuné?

Sonia: E ta bai bo sa. Tin dia ta mas mihó ku otro. Awe e ta basta bon sí.

Migarda: Mi ta kontentu di tende esei. Mi por imaginá ku no ta fásil pa trata ku un situashon asina.

Sonia: E no ta. Tin biaha mi ta puntra mi mes kuantu mas e por wanta.

Migarda: Esei ta algu normal. Biaha pasá promé ku m’a bai, m’a puntra bo dikon Dios ta permití sufrimentu si e tin poder pa kaba kuné.

Sonia: Sí, mi ta kòrda.

Migarda: Pero promé ku nos wak kiko Beibel ta bisa, laga nos repasá un par di punto di loke nos a papia biaha pasá.

Sonia: Ta bon.

Migarda: Nos a lesa den Beibel di un hòmber fiel ku a puntra dikon Dios ta permití sufrimentu. Dios no a skual e pa loke el a puntra ni e no a bis’é ku e mester tin mas fe.

Sonia: Esei tabata algu nobo pa mi.

Migarda: Tambe nos a siña ku Yehova no gusta mira nos sufri. Por ehèmpel, Beibel ta bisa ku ora e pueblo di Dios tabata pasa den difikultat, “e tabata afligí.” * No ta un konsuelo pa sa ku Dios ta sinti duele ora e mira nos sufri?

Sonia: Klaru ku sí.

Migarda: Na final nos a komprobá kuantu poder nos Kreador tin, i ku e por kaba ku sufrimentu na kualke momento ku e ta deseá.

Sonia: Ta e parti ei mi no por kaba di komprondé. Dikon Dios ta laga tur e kosnan malu akí pasa miéntras e tin poder pa kaba ku nan?

Migarda: Nos por haña e kontesta pa e pregunta ei den Beibel na e buki di Génesis. Bo ta kòrda e relato di Adam ku Eva i e fruta prohibí?

Sonia: Sí, mi konosé e relato ei. Dios a bisa nan pa no kome di un sierto palu, pero nan a kome di dje tòg.

 Migarda: Esei ta bèrdat. Pero laga nos para ketu un ratu i wak kiko ta e kosnan ku a pone Adam ku Eva peka. Esakinan tin hopi di haber ku e motibu dikon nos ta sufri. Bo por lesa Génesis kapítulo 3, versíkulo 1 te 5?

Sonia: OK. “Awor e kolebra tabata mas astuto ku tur otro bestia di sabana ku SEÑOR Dios a traha. El a bisa e muhé: ‘Di bèrdat Dios a bisa: “Bo no mag kome di ningun palu di e hòfi”?’ I e muhé a bisa e kolebra: ‘Di fruta di e palunan di e hòfi nos por kome, ma di fruta di e palu ku ta keda meimei di e hòfi, Dios a bisa: “Boso no mester kome di dje ni mishi kuné, pa boso no muri.”’ I e kolebra a bisa e muhé: ‘Siguramente boso lo no muri! Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu.’”

Migarda: Danki. Laga nos analisá e versíkulonan akí un ratu. Promé, ripará ku ta un kolebra a papia ku Eva. Un otro buki den Beibel ta mustra ku realmente ta Satanas e Diabel a usa e kolebra pa papia ku Eva. * Satanas a puntra Eva enkuanto e mandamentu ku Dios a duna pa no kome di un sierto palu. Bo a paga tinu kiko Dios a bisa lo a pasa si Adam ku Eva a kome di e palu?

Sonia: Nan lo a muri.

Migarda: Eksaktamente. Anto, despues di esei Satanas a akusá Dios di un kos masha serio mes. Wak kiko el a bisa: “Siguramente boso lo no muri!” Ku otro palabra, Satanas a yama Dios un gañadó.

Sonia: Mi no tabata sa esei.

Migarda: Ora Satanas a yama Dios un gañadó, el a lanta un kuestion ku a tuma tempu pa resolvé. Bo sa ta dikon?

Sonia: Mmm. Pa bisa bo frankamente, nò.

Migarda: Wèl, kisas mi por splika bo asin’akí. Laga nos bisa ku un dia mi ta yega serka bo anto bisa bo ku mi tin mas forsa ku bo. Kon bo por proba ku no ta asina?

Sonia: Wèl, nos lo tin ku midi forsa kontra otro, mi ta suponé.

Migarda: Korekto. Tal bes nos lo skohe un opheto pisá anto wak kua di nos por his’é. Pues ta fásil pa proba ken tin mas forsa.

Sonia: M’a komprondé kiko bo ke men.

Migarda: Pero kiko si na lugá di esei, mi bisa ku bo ta desonesto? Esei sí ta difísil pa proba mesora, no ta bèrdat?

Sonia: Mi ta kere ku sí.

Migarda: De echo, bo no por midi onestidat ku un kompetensia.

Sonia: Bèrdat. Bo tin rason.

Migarda: Si bo wak bon, e úniko manera pa proba e asuntu akí ta di laga tempu pasa pa hende wak si bo ta onesto òf no.

Sonia: Esei ta lógiko.

Migarda: Awor, wak e relato ku nos a lesa den Génesis atrobe. Satanas a bisa ku e tin mas forsa ku Dios?

Sonia: Nò.

Migarda: Pasobra si ta asina, lo tabata fásil pa Dios proba ku Satanas ta robes, no ta bèrdat? Pero en bes di esei, Satanas a insinuá ku Dios ta desonesto. De echo, el a bisa Eva: ‘Ta gaña Dios ta gaña bo. Pero ami ta bisa bo e bèrdat.’

Sonia: Interesante.

Migarda: Pero Yehova ta un Dios sabí, i el a mira ku e mihó manera pa resolvé e akusashon akí ta di laga tempu pasa. Ku tempu lo a bira bisto kua di nan dos tabata papia e bèrdat.

Sonia: Pero ora Eva a muri, esei no a proba ku Dios tabata papia e bèrdat?

Migarda: Bo por bisa ku sí. Pero, Satanas a kuestioná mas kos. Wak versíkulo 5 atrobe. Kiko mas el a bisa Eva?

 Sonia: Ku si e kome di e palu su wowo lo habri.

Migarda: Sí, i ku Eva lo bira “manera Dios, konosiendo bon i malu.” Pues na un manera fini Satanas a bisa ku Dios tabata skonde algu bon pa hende.

Sonia: M’a komprondé.

Migarda: Anto esei tambe tabata un akusashon serio.

Sonia: Kon asina?

Migarda: Satanas a duna di komprondé ku sin e guia di Dios kos lo bai hopi mas mihó pa Eva i den un sentido pa tur hende. Yehova tabata sa ku den e kaso akí tambe e mihó kos tabata pa laga Satanas proba su punto. Pues el a permití Satanas goberná nos planeta pa un tempu. Esei ta e motibu dikon nos ta mira asina tantu sufrimentu rònt di nos. Esun ku ta goberná mundu ta Satanas, no Dios. * Pero mi tin un bon notisia pa bo.

Sonia: An, sí?

Migarda: Beibel ta siña nos dos kos masha bunita tokante Dios. Promé, Yehova ta preokupá pa nos ora nos ta sufri. Por ehèmpel, wak e palabranan di Rei David, skirbí na Salmo 31:7. Den su bida David a pasa den hopi sufrimentu, pero wak kiko el a bisa den su orashon na Dios. Bo por a lesa e versíkulo ei?

Sonia: Ta bon. E ta bisa: “Lo mi regosihá i keda kontentu den bo miserikòrdia, pasobra bo a mira mi aflikshon; bo tabata sa di e angustianan di mi alma.”

Migarda: Pues aunke David a sufri, tabata un konsuelo p’e sa ku Yehova a mira tur loke el a pasa aden. Sonia, bo no ta haña ku ta un konsuelo pa sa ku Yehova ta konsiente di tur loke nos ta pasa aden, asta di nos dolónan emoshonal di mas profundo ku kisas otro hende no ta komprondé?

Sonia: Konpolaga.

Migarda: Di dos, Beibel ta bisa nos ku Dios lo no permití pa nos keda sufri pa semper. E ta mustra ku pronto Dios lo kaba ku Satanas su mal gobernashon. Anto lo e eliminá tur e mal kosnan ku a pasa, asta e kosnan ku abo i bo mama a sufri. Mi por pasa otro siman i mustra bo dikon nos por tin sigur ku pronto Dios lo kaba ku tur sufrimentu? *

Sonia: Esei ta un bon idea.