Nan tabata usa e álue ku Beibel ta papia di dje pa perfumá paña i kama. (Salmo 45:8; Proverbionan 7:17; Kantika di Sálomon 4:14) E tabata bini di un palu ku nan sa yama palu di águila (di e sorto Aquilaria). Segun ku e palu ta seka kaba na nada, e ta saka un zeta i un leim ku ta hole dushi. Nan tabata mula e palu hasié puiru, i esaki nan tabata bende komo “álue.” *

Beibel ta kompará e tèntnan di Israel ku “álue ku SEÑOR a planta.” (Numbernan 24:5, 6) Esaki kisas ta referí na e forma di e palu di águila, ku ta haña taki hanchu i ku por yega na un haltura di 30 meter. E palu akí no ta krese den Israel djawe, pero segun A Dictionary of the Bible, “no ta nada straño ku e tempu ei nan tabata kultivá e palunan akí i otronan, ku awor no ta eksistí mas [den e region ei], den e vaye próspero i poblá di Hordan.”

Segun e Lei di Dios, tur e sakrifisionan ku e hudiunan tabata ofresé den e tèmpel mester tabata di e mihó kalidat posibel. Dios lo no a keda kontentu ku sakrifisionan ku tabatin defekto. (Éksodo 23:19; Levítiko 22:21-24) Segun Filo, un eskritor hudiu di promé siglo, e saserdotenan tabata inspekshoná e bestianan “di kabes te pia” pa hasi sigur ku nan tabata kompletamente sano i “sin ningun mancha òf defekto.”

Segun e akadémiko E. P. Sanders, kisas e ofisialnan di tèmpel “tabata outorisá bendedónan konfiabel di bestia i para pa bende solamente esnan ku e saserdotenan a inspekshoná anteriormente. Si esei tabata e kaso, e bendedó lo mester a duna esun ku a kumpra e bestia un komprobante di ku e bestia tabata sin defekto.”

Esei ta presis loke arkeólogonan a deskubrí na 2011 den bisindario di e tèmpel: un komprobante den forma di un seyo di klei. E ta mes grandi ku un moneda i ta data di entre siglo ún promé ku Kristu i aña 70 despues di Kristu. E tin dos palabra arameo grabá riba dje ku algun arkeólogo a tradusí komo “Puru pa Dios.” Probablemente e ofisialnan di tèmpel tabata pega un komprobante asina na produkto òf bestia ku nan tabata usa pa sakrifisio.