E TURISTANAN tabatin hamber. Despues ku nan a bishitá sitionan históriko den e stat antiguo Bètlehèm, nan a haña masha gana di purba algu típiko di e lugá. Un di nan a mira un restorant ku ta bende falafel. Falafel ta pan di pita yená ku krema di garbanso, tomati, siboyo i otro bèrdura. E sèntwich delisioso akí a duna nan energia pa sigui ku nan tour.

Loke e turistanan akí lo no tabata sa ta ku komementu di e simpel pan di pita akí tabata e eksperensia di mas históriko ku nan tabatin riba e dia ei. E nòmber Bètlehèm ta nifiká “Kas di Pan,” i pa míles di aña kaba nan ta traha pan den e área ei. (Ruth 1:22; 2:14) Te awe, pan di pita ta un di e pannan típiko di Bètlehèm.

Kasi 4.000 aña pasá, no muchu leu di zùit di Bètlehèm, Sara, kasá di Abraham, a traha “pan” fresku pa tres bishitante inesperá. (Génesis 18:6) E “hariña fini” ku Sara a usa por tabata sea di un tipo di trigu òf di puspas. Sara mester a traha e pan akí den purá, i probablemente el a hòrn’é riba piedra kayente.—1 Reinan 19:6.

Manera e relato akí ta indiká, e famia di Abraham tabata hòrna nan mes pan. Nan tabata biba manera nomada, p’esei probablemente Sara i su kriánan no por a traha pan den e tipo di fòrnu ku tabata komun na Ur, su stat natal. Sara tabata traha hariña fini for di grano ku e por a haña den nan region. Esaki a enserá hopi trabou ya ku nan mester a usa un mulina di man fásil pa transportá i posiblemente un pilon (kònchi i stòki di palu òf piedra pa bati grano).

Kuater siglo despues e Lei di Moises a stipulá ku niun hende no por a tuma un mulina di man komo garantia pa fiansa pasobra esaki tabata e doño di e mulina su medio di biba. (Deuteronomio 24:6) Un famia no por a traha nan pan di kada dia sin un mulina di man, p’esei Dios a konsider’é algu sumamente importante.—Wak e kuadro “ Kon Hende Tabata Traha Pan den Tempu Bíbliko?”

E Skritura ta menshoná pan sentenáres di biaha i hopi bes eskritornan di Beibel a us’é komo sinónimo di kuminda. Hesus a mustra ku sirbidónan di Dios por resa pidi ku tur konfiansa: “Duna nos awe nos pan di kada dia.” (Mateo 6:11) Den e kaso akí, “pan” ta representá kuminda den un sentido general. Ku esaki Hesus a mustra ku nos por konfia ku Dios por proveé pa nos tur dia.—Salmo 37:25.

Pero tin algu muchu mas importante ku pan òf kuminda. Hesus a bisa: “Hende no mester biba di pan so, sino tambe di tur palabra ku ta sali for di boka di Yehova.” (Mateo 4:4) Su palabranan a referí na e tempu ku e israelitanan tabata dependé kompletamente di loke Dios a perkurá pa nan. Esaki a kuminsá djis despues ku nan a sali for di Egipto. Mas o ménos un luna despues ku nan a bai den e Desierto di Sinaí nan reservanan di kuminda tabata kabando. Komo ku nan tabatin miedu di muri di hamber den desierto, nan a keha amargamente: “[Na Egipto] nos tabata kome pan yena nos barika.”—Éksodo 16:1-3.

Sin duda, e pan di Egipto tabata dushi. Den tempu di Moises, panaderonan profeshonal por a ofresé e egipsionan un gran variedat di pan i buskuchi. Ma Yehova no tabatin intenshon di laga su pueblo keda sin pan. El a primintí nan:  “Mira, lo mi laga pan yobe for di shelu pa boso.” E pan akí, ku a kai for di shelu mainta trempan, tabata parse serena òf fròst, “un kos fini manera skama.” Ora e israelitanan a mir’é pa promé biaha, nan a puntra otro: “Kiko esaki ta?” Moises a bisa nan: “Ta e pan ku SEÑOR a duna boso pa kome.” Nan a yam’é “mana,” * i e pan akí a alimentá nan pa 40 aña largu.—Éksodo 16:4, 13-15, 31.

Na prinsipio, e israelitanan mester a keda masha impreshoná ku e mana milagroso akí. E tabata smak manera kuki ku miel i tabatin mas ku sufisiente pa tur hende. (Éksodo 16:18) Pero segun tempu tabata pasa, nan a kuminsá sinti falta di e variedat di kuminda ku nan tabata haña na Egipto. Nan a murmurá: “Nos wowo no ta mira nada otro ku e mana akí so.” (Numbernan 11:6) Despues nan a reklamá rabiá: “Nos tin asko di e kuminda miserabel akí.” (Numbernan 21:5) Finalmente, nan a pèrdè gana di kome e “pan di shelu” i nan a kuminsá haña asko di dje.—Salmo 105:40.

Hende por mira pan, meskos ku hopi otro kos den bida, komo algu gewon. Pero Beibel ta papia di un tipo di pan masha spesial, un ku nos mester balorá. E pan akí, ku Hesus a kompará ku e mana ku e israelitanan malagradesí a rechasá, por duna nos benefisio eterno.

Hesus a bisa su oyentenan: “Ami ta e pan ku ta duna bida. Boso antepasadonan a kome mana den desierto, i tòg nan a muri. Ma ken ku kome di e pan ku ta baha for di shelu lo no muri. Ami ta e pan bibu ku a baha for di shelu; si un hende kome di e pan akí, lo e biba pa semper; i echo ta ku e pan ku lo mi duna pa mundu por biba ta mi karni.”—Huan 6:48-51.

 Hopi di Hesus su oyentenan no a komprondé ku el a usa e palabranan “pan” i “karni” den sentido simbóliko. Pero e komparashon akí tabata na su lugá ya ku e hudiunan tabata kome pan komo alimento tur dia, meskos ku e mana a alimentá e israelitanan den desierto pa 40 aña largu. Aunke e mana tabata un regalo di Dios, e no a duna bida eterno. Di otro banda, Hesus su sakrifisio sí ta duna bida eterno pa tur ku pone fe den dje. Di bèrdat e ta e “pan ku ta duna bida.”

Kisas, ora bo tin hamber, bo ta kome pida pan i yama Dios danki pa bo “pan di kada dia.” (Mateo 6:11) Pero segun ku e ta sisti nos stoma, laga nos no lubidá nunka kuantu balor “e pan ku ta duna bida,” Hesukristu, tin pa nos.

Kon nos por demostrá ku, kontrali na e israelitanan malagradesí di e tempu di Moises, nos no ta mira e pan presioso akí komo algu gewon? Hesus a bisa: “Si boso ta stima mi, boso lo kumpli ku mi mandamentunan.” (Huan 14:15) Pues, si nos ta kumpli ku su mandamentunan, nos lo por disfrutá pa semper di pan.—Deuteronomio 12:7.