“DIOS ta un Spiritu,” invisibel pa wowo di hende. (Huan 4:24) Tòg Beibel ta bisa ku tin hende ku, den un sentido, a yega di mira Dios. (Hebreonan 11:27) Kon esei ta posibel? Di bèrdat nos por mira “e Dios invisibel”?—Kolosensenan 1:15.

Laga nos kompará nos situashon ku esun di un hende ku a nase siegu. E echo ku e ta siegu ta strob’é di komprondé e mundu rònt di dje? No kompletamente. Un persona siegu ta haña informashon den vários manera ku ta permitié kapta presensia di hende i opheto, i loke ta sosodé rònt di dje. Un hòmber siegu a bisa: “Bo no ta mira ku bo wowo, sino ku bo mente.”

Meskos tambe, aunke bo no por usa bo wowonan físiko pa mira Dios, bo por usa “e wowonan di [bo] kurason” pa mir’é. (Efesionan 1:18) Laga nos konsiderá den ki tres manera bo por hasi esaki.

Hopi biaha, un hende siegu su sentido di oido i di fula ta mas skèrpi, i e ta usa esakinan pa kapta e kosnan ku e no por mira. Asina tambe, bo por usa bo sentidonan físiko pa analisá e mundu rònt di bo i komprondé e Dios invisibel ku a kre’é. “Su kualidatnan invisibel . . . ta ser mirá bon kla for di kreashon di mundu padilanti, ya ku nan ta bisto den e kosnan trahá.”—Romanonan 1:20.

Pensa por ehèmpel riba nos planeta. E ta diseñá na un manera úniko, no simplemente pa nos biba riba dje, sino tambe pa nos disfrutá di bida. Ora nos sinti un brisa suave, kontemplá e promé rayonan di solo di un dia nobo, smak un fruta sukulento òf tende e kanto relahante di para, nos ta keda enkantá. E regalonan akí no ta un muestra di e konsiderashon, kariño i generosidat ku nos Kreador tin?

I kiko nos por siña di Dios ora nos wak e universo? Wèl, shelu ta revelá kon poderoso Dios ta. E último evidensianan sientífiko ta indiká ku e universo no solamente ta kresiendo, sino ku esaki ta tumando lugá mas i mas lihé! Ora bo hisa kara wak e shelu di anochi, puntra bo mes: Kiko ta e fuente di e energia ku ta pone e universo krese mas rápidamente? Beibel ta bisa nos ku e Kreador tin ‘grandesa di forsa.’ (Isaías 40:26) Su kreashon ta mustra nos ku e ta “e Todopoderoso,” Esun ku ta “ekselente den poder.”—Yòb 37:23.

Un mama ku tin dos yu siegu ta bisa: “Komunikashon ta hunga un ròl masha importante den nan edukashon. Bo mester ta prepará pa splika nan tur loke bo ta mira i tende. Abo ta nan wowonan.” Meskos tambe, aunke “ningun hende no a mira Dios nunka,” su Yu, Hesus, “ku ta sintá banda di e Tata ta esun ku a splika ta ken e ta.” (Huan 1:18) Komo Dios su promé kreashon i Yu unigénito, Hesus a bira nos “wowonan.” E ta den e mihó posishon pa duna nos informashon tokante e Dios invisibel.

Tuma nota di algun kos ku Hesus, kende a pasa míles di miónes di aña huntu ku su Tata, a splika di Dios:

• Dios ta traha sin kansa. “Mi Tata ta traha te ainda.”—Huan 5:17.

• Dios sa kiko ta nos nesesidatnan. ‘Boso Tata sa kiko boso tin mester asta promé ku boso pidié.’—Mateo 6:8.

•  Dios ta duna nos bondadosamente tur loke nos tin mester. “Boso Tata ku ta den shelu . . . ta laga su solo sali riba mal hende i bon hende i ta laga awa kai riba hende hustu i inhustu.”—Mateo 5:45.

• Dios ta balorá kada un di nos. “No ta pa un sèn pretu nan ta bende dos mòfi? Sinembargo, ni ún di nan lo no kai na suela sin ku boso Tata sa. Pa loke ta boso, el a konta asta e drachinan di kabei riba boso kabes. Pues, no tene miedu: boso ta bal mas ku hopi mòfi.”—Mateo 10:29-31.

Hende ku ta siegu ta kapta kosnan den maneranan distinto for di hende ku por mira. Pa un hende siegu, kisas un sombra no ta un área skur sin lus di solo, sino un área fresku protehá for di kayente di solo. Meskos ku un persona ku ta kompletamente siegu no por mira sombra ni lus di solo, nos no por kompronde Yehova riba nos mes. P’esei, Yehova a manda un hòmber na tera ku por a reflehá su kualidatnan i personalidat perfektamente.

E hòmber ei tabata Hesus. (Filipensenan 2:7) Hesus no solamente a papia tokante su Tata sino tambe a mustra nos kon Dios ta. Felipe, un di Hesus su disipelnan, a puntr’é: “Señor, mustra nos e Tata.” Hesus a kontest’é: “Esun ku a mira mi, a mira e Tata tambe.” (Huan 14:8, 9) Kiko bo por “mira” di e Tata ora bo analisá e bida di Hesus?

Hesus tabata un hòmber kariñoso, humilde i aserkabel. (Mateo 11:28-30) Su personalidat agradabel a atraé otro hende. Hesus a sinti e doló ku otronan a sinti, i el a kompartí nan goso. (Lukas 10:17, 21; Huan 11:32-35) Ora bo ta lesa òf skucha relatonan bíbliko tokante Hesus, usa bo sentidonan i laga e susesonan haña bida den bo imaginashon. Si bo meditá riba e manera ku Hesus a trata hende, lo bo por mira Dios su personalidat maravioso mas kla i lo bo sinti bo atraí na dje.

Un outor ta bisa lo siguiente relashoná ku e manera kon un persona siegu ta eksperensiá mundu: “E ta haña pida pida informashon for di varios fuente (sentido di oido, di fula, olfato i otronan), i di un manera òf otro e mester pone tur e informashonnan ei huntu pa forma un kuadro.” Di mes manera, ora bo opservá Dios su obranan di kreashon, lesa kiko Hesus a bisa di su Tata i analisá e manera kon Hesus a reflehá e kualidatnan di Dios, bo ta haña un bunita kuadro mental di Yehova. E lo bira mas real pa bo.

Esei ta loke a pasa ku Yòb, un hòmber ku a biba hopi leu den pasado. Na promé instante el a papia “sin konosementu.” (Yòb 42:3) Ma despues ku el a analisá Dios su maravianan di kreashon, el a rekonosé: “Ta tende mi a tende di bo, ma awor mi wowo ta mira bo.”—Yòb 42:5.

Esei por ta e kaso ku bo tambe. “Si bo buska [Yehova], e lo laga bo hañ’é.” (1 Krónikanan 28:9) Gustosamente, Testigunan di Yehova lo yuda bo buska i haña e Dios invisibel.