Mi famia a biba e promé añanan di mi bida serka di Leipzig, e parti ost di Alemania, no muchu leu for di e fronteranan di Polonia i Repúblika Cheko. Tempu mi tabatin seis aña, nos famia a muda bai biba na Brazil i despues na Ecuador pa motibu di mi tata su trabou.

Ku mi 14 aña di edat, mi famia a manda mi un internat na Alemania. Komo ku mi mayornan tabata basta leu, te na Sur Amérika, ta mi mes mester a sòru pa mi mes. Mi a bira hopi independiente i mi no tabatin kunes kiko otro hende tabata pensa di mi.

Tempu mi tabatin 17 aña, mi mayornan a bai biba bèk na Alemania. Na kuminsamentu mi tabata biba serka nan pero pa motibu di mi aktitut independiente mi no por a aseptá nan reglanan di kas. Ku mi 18 aña mi a bai for di kas.

Mi no por a sinta ketu i konstantemente mi tabata purba di haña un propósito den bida. Mi a eksperimentá ku diferente estilo di bida i movementu. Despues di tur esei, mi a yega na e konklushon ku e mihó kos ku mi por a hasi ku mi bida tabata di eksplorá nos bunita planeta promé ku hende kaba kuné.

Mi a kumpra un bròmer i a sali Alemania rumbo pa Afrika. Ma hopi lihé mi a haña mi ta bai Europa bèk pa drecha mi bròmer. Djis despues mi tabata na un playa na Portugal. Mi a disidí di laga mi bròmer atras i kuminsá biaha ku barku.

Mi a djòin un grupo di hóben ku tabata preparando pa krusa Oséano Atlántiko. Entre e hóbennan ei mi a konosé mi futuro kasá, Laurie. Nos a nabegá bai e islanan di Karibe. Despues ku nos a keda un tempu kòrtiku na Puerto Rico, nos a bolbe Europa. Nos tabata buska un boto di bela pa nos kombertié den un boto den kua nos por a biba. Pero despues ku nos tabatin apénas tres luna ta buska, nos tabatin ku interumpí nos plannan pasobra nan a manda yama mi pa mi drenta servisio militar di Alemania.

Na tur mi a pasa 15 luna den marina aleman. Durante e tempu ei mi a kasa ku Laurie i nos a hasi preparashonnan  pa nos sigui biaha despues ku lo mi a sali. Nèt promé ku mi a kuminsá mi servisio militar, nos a kumpra un lancha di salba bida. Poko poko durante e tempu ei mes, nos a kombertié den un boto di bela chikitu. Nos tabatin planiá pa biba den dje i sigui eksplorá nos bunita planeta. Pero promé ku nos a kaba e boto, i djis despues ku mi a sali for di servisio militar, nos a konosé Testigunan di Yehova i a kuminsá studia Beibel ku nan.

Na kuminsamentu mi no tabata mira e nesesidat di kambia mi bida mashá. Mi tabata kasá ku e señora ku mi tabata biba kuné i mi a stòp di huma kaba. (Efesionan 5:5) Ademas, mi tabata pensa ku un bon kos ku nos por a dediká nos bida na dje tabata di biaha rònt mundu i atmirá Dios su kreashon.

Pero, en realidat, mi tabatin kos di kambia si, spesialmente na mi personalidat. Mi tabata sumamente orguyoso i mi tabata konfia demasiado den mi mes. Segun mi, mi tabata masha kos i mi tabata kere ku mi tabatin ‘hopi aden.’ Mi tabata pensa solamente riba mi mes.

Un dia, mi tabata lesa Hesus su famoso Sermon Riba Seru. (Mateo kapítulo 5-7) Na promé instante mi no tabata komprondé loke Hesus a bisa tokante felisidat. Por ehèmpel, el a bisa ku felis ta esnan ku tin hamber i set. (Mateo 5:6) Mi tabata puntra mi mes kon un hende ku ta den nesesidat por ta felis. Segun mi tabata siña mas di Beibel, mi a bin realisá ku nos tur tin un nesesidat spiritual, pero ku nos mester ta humilde pa atmití ku nos tin e nesesidat ei pa asina nos por yen’é. Ta manera Hesus a bisa: “Felis ta esnan ku ta konsiente di nan nesesidat spiritual.”—Mateo 5:3.

Despues ku ami ku Laurie a kuminsá studia Beibel na Alemania, nos a muda bai Fransia i despues Italia. Unda ku nos a bai, nos a topa Testigunan di Yehova. Mi a keda sumamente impreshoná ku nan amor sinsero pa otro i nan unidat. Mi a mira ku nan di bèrdat ta un hermandat mundial. (Huan 13:34, 35) Ku tempu, ami ku Laurie a batisá komo Testigu di Yehova.

Despues ku mi a batisá, mi a sigui hasi kambio na mi personalidat. Ami ku Laurie a disidí di nabegá a lo largu di e kosta di Afrika bai abou i krusa Oséano Atlántiko pa yega Merka. Ta ora nos tabata den e boto chikitu ei riba laman ganchu, mi a realisá kon chikitu i insignifikante mi ta kompará ku nos magnífiko Kreador. Komo ku mi tabatin asina tantu tempu liber (pasobra no tin mashá kos di hasi meimei di oséano), mi a dediká mi mes na lesa Beibel. Mi a keda hopi impreshoná ku e relatonan di Hesus su bida aki riba tera. E tabata un hòmber perfekto ku muchu mas abilidat di loke mi por a imaginá, i tòg nunka e no a hala atenshon na su mes. E no tabata pensa solamente riba su mes, sino riba su Tata selestial.

Segun ku mi tabata meditá riba Hesus su ehèmpel, mi a mira e nesesidat di pone e Reino di Dios na promé lugá den mi bida en bes di dediká solamente e tempu ku mi a sobra na dje. (Mateo 6:33) Ora ku por fin ami ku Laurie a yega Merka, nos a disidí di stòp di nabegá, keda biba einan i dediká nos mes na nos sirbishi na Dios.

Ántes, tempu mi tabata pensa solamente riba mi mes, mi tabata masha insigur di mi mes. Sinembargo, awor mi a haña un fuente di sabiduria infalibel pa guia mi. (Isaías 48:17, 18) Tambe mi a haña un propósito den bida ku nunka ántes mi tabatin; sirbi Dios i yuda otronan siña di dje.

Nos matrimonio a bira hopi mas stabil pasobra nos ta apliká e prinsipionan di Beibel. Ademas, nos a ser bendishoná ku un bunita yu muhé, kende tambe stima Yehova.

Nos bida no tabata semper fásil. Pero, ku Yehova su yudansa, nos ta determiná pa hamas nos stòp di konfia den dje.—Proverbionan 3:5, 6.