For di un prinsipio, hende a soña kon dushi lo ta pa hiba un bida salú i yen di vigor pa semper. Pero lamentablemente, nos ta muri. Pues, e palabranan ku Yòb a bisa mas ku tres mil aña pasá, sitá ariba, te ainda ta bálido den nos tempu.

Tur hende ke biba pa semper. I Beibel ta bisa ku Dios a pone tantu e deseo pa biba pa semper komo e deseo di komprondé kiko esaki ta nifiká den nos kurason. (Eklesiástes 3:11) Awor, pensa un ratu; lo ta lógiko pa un Dios di amor pone den hende un deseo ku no por bira realidat? Si bo bisa ‘nò,’ bo tin rason. E Palabra di Dios ta yama morto nos enemigu i ta primintí ‘ku Dios lo kaba kuné.’—1 Korintionan 15:26.

Sin duda, tur hende ta di akuerdo ku morto ta un enemigu. Niun hende na tinu ta deseá di muri. Ora nos mira peliger nos ta hala kita, skonde òf hui p’e. I ora nos bira malu, nos ta buska tur manera pa bira bon. Nos ta hasi tur loke ta na nos alkanse pa evitá kualke kos ku por kousa nos morto.

Di bèrdat nos tin motibu pa kere ku Dios lo kaba ku e enemigu akí? Klaru ku sí. E Kreador, Yehova Dios, no a krea hende pa biba djis algun aña i despues muri. Morto no tabata parti di Dios su propósito original. Su intenshon tabata pa hende biba pa semper riba tera, i lo e kumpli ku tur loke e primintí.—Isaías 55:11.

Kon Dios lo kaba ku morto? Atraves di historia hende a dediká hopi tempu i energia pa evit’é, pero sin resultado. Te awe hende ta sigui buska un solushon. Sientífikonan a traha bakuna i remedi pa kontrolá algun malesa. Nan a asta investigá e genétika di sernan bibu. Na hopi lugá, kompará ku un 100 aña pasá, awendia hende ta biba mas largu. Pero apesar di tur nan esfuersonan, nan no a logra kaba ku morto. Ta manera Beibel ta bisa: “Tur ta bolbe na stòf.”—Eklesiástes 3:20.

E bon notisia ta ku nos no tin nodi di warda riba inteligensia humano pa haña solushon. Yehova ya kaba a perkurá un medio pa libra nos di morto. E persona ku el a skohe pa hasi esei ta Hesukristu.