Jairo a nase ku un tipo di parálisis selebral ku yama spastische quadriplegie. * E malesa akí ta pone ku e no tin kontrol riba gran parti di su kurpa. Komo resultado, su selebro no por manda señal na su múskulonan, i p’esei e ta sapatiá i su man- i pianan ta trose sin ku e por yuda. Tin biaha, Jairo ta kuminsá sagudí asina tantu ku e ta lastimá su mes, i tambe e por dal otro hende ku ta banda di dje si nan no paga tinu. Pa evitá aksidente, lamentablemente, hopi biaha nos tin ku mara su man- i pianan na e ròlstul.

Jairo a sufri hopi segun ku e tabata krese. Tempu e tabatin apénas tres luna, el a kuminsá haña atake di djimpi, i tin biaha esaki tabata asta pon’é kai flou. Hopi biaha mi mama tabata kore bai hospital kuné den su brasa, pensando ku el a fayesé.

Debí ku kada biaha Jairo su múskulonan tabata trèk sera, ku tempu, su wesunan a deformá. Tempu ku e tabatin 16 aña, el a saka su pèlvis for di lugá i dòkter mester a hasi un operashon grandi na su bèl di pia, hep i pèlvis. Ainda mi ta kòrda kon tur anochi Jairo tabata grita yora di doló ora ku e tabata rekuperando.

Jairo su desabilidat grave ta pone ku e mester dependé kompletamente di otro hende pa yud’é ku aktividatnan di tur dia, manera kome, bisti paña i bai drumi. Mayoria di biaha ta mi mama ku mi tata ta hasi esei. Aunke Jairo mester di yudansa konstante, semper nan ta kòrd’é ku su bida no ta dependé solamente di e yudansa di hende sino tambe di e yudansa di Dios.

Nos mayornan ta Testigu di Yehova i for di tempu ku Jairo tabata bebi nan tabata lesa relatonan bíbliko p’e. Semper nan tabata sa ku bida tin mas sentido ora un persona tin un bon relashon ku Dios. Jairo tin un kurpa frágil ku ta sagudí kada bes, pero apesar di esei e por tin un speransa briante i sólido pa futuro. Sinembargo, semper nan tabata puntra nan mes si Jairo por a kapta e siñansanan di Beibel.

Un dia, tempu Jairo tabata chikitu, mi tata a bis’é: “Jairo, por fabor bisa mi algu. Si di bèrdat bo stima mi, lo bo papia ku mi!” N’e momento ei Jairo su wowonan a yena ku awa. Maske el a trata di ekspresá su sintimentunan ku palabra, e úniko kos ku tabata sali for di su boka ta algun zonido. Papi a  sinti su mes malu pasobra el a pone Jairo yora. Pero e manera ku Jairo a reakshoná a mustra ku el a komprondé loke mi tata a bisa; ta gewon papia e no por a papia.

Poko tempu despues, mi mayornan a nota ku tin biaha Jairo tabata move su wowonan lihé lihé komo si fuera e tabata ke bisa nos loke e tabata sinti i pensa. Jairo tabata sinti su mes frustrá ora hende no komprond’é. Ma ora mi mayornan a kuminsá komprondé loke e tabata bisa ku su wowonan i dun’é loke e tabatin mester, e tabata haña un sonrisa grandi riba su kara. Tabata su manera di yama danki.

Un logopedista a duna nos un sugerensia pa yuda nos komuniká kuné: hisa tur dos man ora ku ta trata di un pregunta ku por ser kontestá ku un simpel ‘sí’ òf ‘nò’. Man drechi ke men ‘sí’ i man robes ke men ‘nò.’ Di e manera akí, Jairo por a wak e man korekto i laga nos sa kiko e tabata ke.

Tres biaha pa aña, Testigunan di Yehova ta tene kongreso- i asambleanan kaminda nan ta duna diskursonan basá riba Beibel na un públiko grandi. Semper Jairo tabata bira masha entusiasmá durante e diskurso pa e kandidatonan di boutismo. Un dia, tempu ku Jairo tabatin 16 aña, mi tata a puntr’é: “Jairo, bo tambe ke batisá?” Mesora el a wak Papi su man drechi, mustrando asina ku e tabata ke batisá. E ora ei mi tata a puntr’é: “Bo a primintí Dios den orashon ku lo bo ke sirbié pa semper?” Atrobe Jairo a bira wak Papi su man drechi, mustrando bon kla asina ku el a dediká su bida na Yehova kaba.

Despues di a trata ku Jairo varios tema bibliko relashoná ku boustismo, tabata bisto ku el a komprondé kiko boutismo kristian ta. Pues na aña 2004, el a kontestá e pregunta di mas importante di su bida: “Bo a dediká bo mes na Dios pa hasi su boluntat?” Jairo a wak ariba i asina el a mustra ku su kontesta tabata ‘sí.’ Na e manera ei nos a plania di antemano pa e duna un kontesta afirmativo. Pues, ku 17 aña di edat Jairo a batisá komo un Testigu di Yehova.

Na 2011, Jairo a haña un manera nobo pa komuniká: un kòmpiuter ku e por kontrolá ku movementu di su wowonan. E kòmpiuter akí ta sigui e moveshon di Jairo su iris. Ora Jairo keda wak un icon òf kinipí wowo, ta komo si fuera e ta klek riba e pantaya meskos ku ora bo klek algu ku un mouse. E kòmpiuter ta diseñá ku un programa ku tin vários icon ku ta representá palabra òf frase pa yuda Jairo  komuniká. Ora ku e kinipí wowo riba un icon, e programa di kòmpiuter ta konbertí e mensahe ku tin skirbí den un stèm elektróniko.

Segun ku Jairo su konosementu di Beibel tabata krese, su deseo pa yuda otro hende komprondé siñansanan di Beibel tambe a oumentá. Hopi biaha e ta wak ami i e kòmpiuter durante nos Adorashon Komo Famia. Di e manera ei e ta kòrda mi ku mi mester skirbi komentarionan ku e por duna durante e seshonnan di pregunta i kontesta ku tin na nos reunionnan di kongregashon kristian.

Durante reunion, ku hopi pasenshi Jairo ta buska riba e pantaya pa wak riba kua icon e mester klek, i despues di esei e stèm elektróniko ta bisa su kontesta di manera ku tur hende por tende. E ta smail yen di goso ora ku e por animá e miembronan di e kongregashon na e manera akí. Alex, un di Jairo su amigunan hóben, a bisa: “Jairo su komentarionan tokante temanan bíbliko semper ta impreshoná mi.”

Jairo ta usa su wowonan tambe pa komuniká ku otro hende tokante su kreensianan. Un manera ku e ta hasi esaki ta ora e klek riba e icon ku ta mustra un hardin ku bestia i hende di tur nashon ku ta biba na pas ku otro. Ora ku e hasi esaki, e stèm ta bisa: “E speransa ku Beibel ta ofresé ta ku tera lo bira un paradeis kaminda lo no tin malesa ni morto mas, Revelashon 21:4.” Si e persona mustra interes, Jairo ta klek riba un otro icon i e stèm di e kòmpiuter ta bisa: “Lo bo ke studia Beibel ku mi?” Pa nos sorpresa, nos tawela a aseptá e invitashon akí. Jairo a haña yudansa di un kompañero kristian pa studia Beibel ku nos tawela. Ta hopi emoshonante pa mira kon tiki tiki nos tawela tabata haña konosementu di Beibel! I nos tabata kontentu pa mira nos tawela batisá na e kongreso regional na Madrid na ougùstùs 2014.

E dosentenan di Jairo tambe a mira kuantu fe e tin den Dios. Rosario, un logopedista di Jairo, a yega di bisa: “Si un dia mi disidí di drenta un religion, ta Testigu di Yehova lo mi bira. Mi a mira kon Jairo su fe a duna su bida un berdadero propósito apesar di e situashon difísil ku e ta aden.”

Jairo su wowonan ta bria di alegria kada biaha ku mi lesa e promesa di Beibel akí p’e: “E kohonan lo bula manera biná, i lenga di e muda lo grita di alegria.” (Isaías 35:6) Maske tin bes e ta sinti su mes desanimá, tòg por lo general e ta kontentu. Esaki ta posibel solamente pasobra e personanan di mas importante den su bida ta Dios i su kompañeronan kristian. Jairo su aktitut positivo i fe fuerte ta duna prueba ku si nos sirbi Yehova bida lo ta bale la pena asta bou di e situashonnan di mas difísil.