Paul, un esposo i tata di dos yu a bisa: “Kuminda a bira skars i masha karu mes ora ku e preisnan den nos pais a subi drástikamente. Nos tabata para den rei oranan largu pa kumpra kuminda, pero hopi biaha kuminda tabata kaba promé ku nos yega na bùrt. Hopi hende a bira masha flaku mes, i tin tabata kai flou riba kaya. E produktonan di nesesidat básiko tabata kosta miónes i despues asta míles di miónes te ku finalmente e moneda nashonal a pèrdè tur su balor. Mi a pèrdè tur loke mi tabatin riba mi kuenta di banko i mi fondo di seguro i penshon.”

Paul tabata konsiente ku e mester a tuma medidanan práktiko pa su famia keda na bida. (Proverbionan 3:21) El a bisa: “Mi tabata un kontratista ku ta instalá sistema di koriente, pero mi a aseptá kualke trabou ku mi por a haña na un pago muchu mas abou ku mi a kustumbrá kuné.” El a sigui bisa: “Tin hende tabata paga mi ku kuminda òf artíkulo pa kas. Si nan a duna mi kuater habon, mi tabata keda ku dos i bende e otro dosnan. Ku tempu mi a logra haña 40 puitu. Ora nan a bira grandi, mi a bende nan i a kumpra 300 puitu mas. Mas despues, mi a troka 50 galiña pa dos saku di hariña di maishi di 50 kilo. Ku e hariña ei mi por a alimentá mi famia i otro famianan pa hopi tempu.”

Paul tabata sa tambe ku e mihó kos ku un hende por hasi ta di konfia den Dios, i ku si nos obedes’é, lo e yuda nos. Relashoná ku e nesesidatnan básiko di bida, Hesus a bisa: “Stòp di ta demasiado preokupá, pasobra . . . boso Tata sa ku boso tin mester di e kosnan akí.”—Lukas 12:29-31.

Lamentablemente, Dios su gran enemigu, Satanas, a logra pone mayoria di hende kore tras di kos material. Hende ta demasiado preokupá ku nan nesesidatnan,  sea ku esakinan ta real òf imaginario, i nan ta hasi tur nan esfuerso pa haña kos ku en realidat nan no tin mester di dje. Hopi hende ta hinka nan kurpa den debe i mester dal nan dede pa nan siña ku “e fiadó ta bira esklabo di esun ku ta fi’é.”—Proverbionan 22:7.

Algun hende ta tuma sierto desishon ku despues ta sali nan karu. Paul a bisa: “Hopi di mi bisiñanan a bai laga nan famia i amigunan pa buska un mihó porvenir den un otro pais. Tin di nan a bai sin ku nan papelnan di imigrashon tabata na òrdu i p’esei nan no por a haña trabou. Hopi biaha nan a haña nan ta drumi riba kaya i ta skonde pa polis. Nan no a duna Dios chèns pa yuda nan. Pero komo famia nos sí tabata desididu pa enfrentá problema finansiero ku Dios su yudansa.”

Paul a sigui bisa: “Hesus di: ‘No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.’ Pues, e úniko kos ku mi tabata pidi Dios ta pa ‘duna nos awe nos pan di kada dia’ pa nos por a keda na bida. I Dios a yuda nos nèt manera Hesus a primintí. No ta semper nos a haña loke nos tabata ke. Un biaha mi a bai para den rei pa kumpra kuminda sin sa kiko nan tabata bende e dia ei. Ora mi a yega na bùrt, mi a mira ku tabata yògùrt; anto mi no gusta yògùrt. Pero e tabata kuminda, i ta esei nos a kome e anochi ei. Mi ta masha gradisidu na Dios ku durante tur e tempu ei nunka mi famia a bai drumi stoma bashí.” *

Mas aleu Paul a bisa: “Aworakí nos ta mihó pará finansieramente. Pero for di nos eksperensia nos a siña ku e mihó remedi pa ansiedat ta konfiansa den Dios. Semper Yehova * lo yuda nos, basta nos sigui hasi su boluntat. Nos a mira ku e palabranan di Salmo 34:8 ta bèrdat: ‘Purba i mira ku SEÑOR ta bon; bendishoná ta e hende ku ta tuma refugio den dje!’ Komo resultado, nos no tin miedu di bolbe enfrentá situashonnan ekonómiko difísil.”

“Awor nos ta komprondé ku loke hende tin mester pa keda na bida no ta trabou òf plaka, sino kuminda. Ku hopi anhelo nos ta spera pa e promesa akí di Dios kumpli: ‘Lo tin abundansia di maishi den e tera.’ Turesten, ‘nos lo ta kontentu si nos tin kuminda, paña i un dak riba nos kabes.’ P’esei, e siguiente palabranan di Beibel ta fortalesé nos: ‘Laga boso manera di biba ta liber di amor pa plaka, i keda kontentu ku loke boso tin. Pasobra Dios a bisa: “Hamas lo mi bandoná bo, i hamas lo mi laga bo desampará.” P’esei nos por ta yen di ánimo i bisa: “Yehova ta mi ayudante; lo mi no tin miedu.”’” *

Si nos ke ‘kana ku Dios’ meskos ku Paul i su famia, nos mester tin fe. (Génesis 6:9) Nos por siña lèsnan importante for di Paul su ehèmpel di fe i e medidanan práktiko ku el a tuma, sea ku nos ta pasando den un krísis finansiero aworakí òf den futuro.

Pero kiko si problema di famia ta preokupá nos?