TÓPIKO PRINSIPAL | ORASHON TA YUDA KU ALGU?
Dikon Hende Ta Resa?
“Mi tabata gusta gèmbel. M’a resa pidi Dios p’e yuda mi gana hopi plaka. Pero nunka esei no a sosodé.”—Samuel, * Kenia.
“Na skol, ora di resa, nos mester a resitá for di kabes e orashonnan ku nos a siña na skol.”—Teresa, Filipinas.
“Mi ta hasi orashon ora mi tin problema, pa pordon di mi pikánan i pa mi ta un mihó kristian.”—Magdalene, Gana.
E komentarionan di Samuel, Teresa i Magdalene ta mustra ku hende ta resa na Dios pa diferente motibu, un mas noble ku otro. Algun hende ta hasi orashon di kurason i otronan no ta hasi orashon ku masha sintimentu. Sinembargo, sientos di miónes di hende ta haña ku nan tin ku resa pa diferente motibu: pa pasa eksamen, pa nan tim di deporte faborito gana, pa Dios guia nan famia òf pa kualke otro motibu. De echo, un enkuesta a mustra ku asta hende ku no ta pertenesé na un religion ta hasi orashon regularmente.
Abo sa resa? Si ta asina, kiko bo sa pidi p’e? Sea bo tin e kustumber di hasi orashon òf nò, kisas bo ta puntra bo mes: ‘Orashon ta yuda mi ku algu? Tin un persona ta skucha?’ Un eskritor a yega di bisa ku orashon “ta djis un terapia, . . . manera ta papia bo ta papia ku bo bestia di kas.” Algun eksperto riba tereno médiko tin e mesun punto di bista i ta bisa ku orashon ta un forma di “medisina alternativo.” Pero awor, hende ku ta resa ta resa djis pa haña yudansa tera péutiko òf djis pasobra ta un kustumber?
Na kontraste, Beibel ta bisa ku orashon ta mas ku djis un forma di terapia. E ta bisa ku tin un persona ku realmente ta skucha i kontestá orashon ku nos hasi na e manera korekto i pa e kosnan korekto. Esei ta bèrdat? Ban wak prueba di esei.
^ par. 3 A kambia algun nòmber den e artíkulo akí.
