Sin duda, Beibel ta un buki hopi bieu. Kon bieu e ta? E promé eskritor a kuminsá skirbi parti di Beibel mas o ménos 3.500 aña pasá den Medio Oriente. Esei tabata den e tempu di e poderoso dinastia di Shang di China (durante siglo 16 pa 11 promé ku Kristu) i alrededor di dies siglo promé ku budismo a kuminsá eksistí na India.—Wak e kuadro “ Detayenan di Beibel.”

Pa un buki ta útil i práktiko pa hende, e mester ta komprendibel i relevante pa nan. Wèl, Beibel ta nèt un buki asina! E ta duna kontesta satisfaktorio riba e preguntanan mas importante di bida.

Por ehèmpel, bo a yega di puntra bo mes: ‘Pakiko nos ta na mundu?’ Pa hopi tempu kaba hende ta hasi nan mes e pregunta akí sin por sali afó. Ma nos por haña e kontesta den e promé dos kapítulonan di e promé buki di Beibel, esta, Génesis. E relato di Beibel ta bai bèk “na prinsipio,” míles di miónes di aña pasá, tempu ku nos universo, inkluso e galaksia-, streanan i nos planeta tera, a kuminsá eksistí. (Génesis 1:1) Despues, e ta konta tokante e etapanan progresivo di kreashon, kon mundu a ser kreá pa por sostené bida, kon diferente forma di bida a kuminsá eksistí i kon hende a bini na mundu. Ademas, e ta konta kiko ta e propósito di bida.

Beibel ta duna konseho práktiko ku ta yuda nos resolvé nos problemanan di tur dia. E konsehonan akí ta fásil pa komprondé pa dos motibu importante.

Pa di promé, e mensahe di Beibel ta kla i atraktivo. Beibel no ta usa ekspreshonnan vago òf misterioso. Mas bien, e ta usa palabranan fásil pa komprondé i ku ta yuda nos usa nos sentidonan pa visualisá loke nos ta lesa. Anto, e ta usa palabranan di bida di tur dia pa aklará konseptonan difísil.

Por ehèmpel, pa Hesus por a siña su oyentenan lèsnan ku ta yega na nan kurason, el a usa ilustrashonnan simpel basá riba kosnan ku hende tabata eksperensiá den nan bida diario. Nos por haña hopi di e lèsnan akí den su spich konosí komo e Sermon Riba Seru, skirbí den Mateo kapítulo 5-7. Un komentarista a yam’é “un diskurso ku  konsehonan práktiko, no ku e meta pa hinka yen di idea den nos kabes, sino pa guia nos den nos bida.” Bo por lesa e kapítulonan ei den 15 pa 20 minüt, i lo bo keda impreshoná kon simpel i tòg penetrante e palabranan di Hesus ta.

Pa di dos, loke ta hasi Beibel fásil pa komprondé ta su kontenido. E no ta un buki di mitologia òf fábula, ma pa gran parti, manera The World Book Encyclopedia ta bisa, e ta papia “tantu di hende importante komo di hende komun i koriente” i di nan “speransa, lucha-, frakaso- i viktorianan.” Ta fásil pa nos komprondé e relatonan akí tokante hende i suseso di bida real, anto saka lèsnan importante for di nan.—Romanonan 15:4.

Pa bo por komprondé un buki, e mester ta den un idioma ku bo sa. Awe, kasi sigur tin Beibel den un idioma ku bo por komprondé, sin importá unda bo ta biba òf di unda bo ta. At’akí dos faktor ku ta hasi esaki posibel.

Tradukshon. Originalmente Beibel a ser skirbí na hebreo, arameo i griego, i klaru ku ta masha poko hende por lesa e idiomanan ei. P’esei, traduktornan ta traha duru pa hasi Beibel disponibel na otro idioma. Danki na nan esfuerso, awor Beibel ta tradusí kompleto òf en parte na mas ku 2.700 idioma. Esaki ta nifiká ku mas ku 90% di poblashon di mundu por lesa por lo ménos parti di Beibel den nan idioma materno.

Publikashon. Eskritornan a skirbi e teksto original di Beibel riba material ku no ta dura mashá, manera kueru i papiro. Pa por a konserbá e teksto akí, mester a kopi’é ku hopi dedikashon bes tras bes na man. E kopianan ei tabata karu i masha poko hende por a afòrt nan. Pero, e mashin di imprenta ku Gutenberg a inventá mas ku 550 aña pasá a yuda aselerá e sirkulashon di Beibel. Segun kálkulo, mas ku sinku mil mion Beibel a ser distribuí, sea kompleto òf en parte.

Pues, ta klaru anto ku Beibel no ta di kompará ku niun otro buki religioso; e ta un buki ku tur hende por komprondé. Naturalmente, esei ta eksigí esfuerso sí, pero tin yudansa. Unda bo por haña e yudansa ei, i kon esei por benefisiá bo? Ban wak esei den e siguiente artíkulo.