Pa hopi tempu kaba, hende a mira Pasku komo un fiesta kristian tradishonal pa selebrá e nasementu di Hesus. Pero, kisas nos ta puntra nos mes ta kon hende a bin konektá hopi di e kustumbernan di e fiesta ei ku e nasementu di Hesus.

Pa kuminsá, tin e mito di Papa Pasku. Un kompania di refresko di Nort Amérika tabatin masha éksito ora el a usa e hòmber ku paña kòrá, barba blanku i kara kontentu akí den un propaganda na aña 1931. Durante añanan 1950, algun hende na Brazil a purba di remplasá Papa Pasku ku un figura nativo legendario ku yama Opa Indjan. Ku ki resultado? Papa Pasku a haña hopi mas fama ku Opa Indjan, i segun Profèser Carlos E. Fantinati, asta “hopi mas ku niño Hesus i a bira e representante ofisial di e fiesta di 25 di desèmber.” Pero, ta e mitonan manera esun di Papa Pasku akí ta e úniko kosnan malu ku tin na Pasku? Pa nos haña kontesta riba e pregunta ei, ban bèk na e kristianismo di e promé siglonan.

E Encyclopedia Britannica ta bisa ku “durante e promé dos siglonan di kristianismo, hende tabata kontra e idea di rekonosé e fecha di nasementu di mártirnan, asta di Hesus.” Dikon? Pasobra e kristiannan a mira selebrashon di hasimentu di aña komo un kustumber pagano, algu ku nan mester a evitá kompletamente. De echo, Beibel no ta menshoná e fecha di nasementu di Hesus.

Den siglo 4 despues di Kristu, Iglesia Katóliko a instituí e selebrashon di Pasku apesar ku e kristiannan di promé siglo tabata kontra dje. E iglesia kier a haña mas influensia, i p’esei el a kita un di e opstákulonan di mas grandi, esta, e popularidat di e religionnan pagano romano i nan festival di e solstisio di wenter. Penne L. Restad a bisa den Christmas in America ku kada aña, di 17 di desèmber pa 1 di yanüari, “mayoria di e romanonan tabata fiesta, hunga wega, gosa, marcha i djòin den otro fiestanan pa duna homenage na nan diosnan.” I riba 25 di desèmber e romanonan tabata selebrá e nasementu di e Solo Invensibel. Ora e iglesia a manda pa selebrá Pasku riba e dia ei, el a persuadí hopi romano pa selebrá e nasementu di Hesus en bes di esun di solo. Gerry Bowler a bisa den su obra Santa Claus, a Biography ku e romanonan “por a sigui disfrutá di e kustumbernan religioso ku tin di haber ku e fiestanan meimei di wenter akí.” Pues en realidat, nan “a selebrá e fiesta nobo ku e mesun kustumbernan di ántes.”

Ta klaru anto ku e kustumbernan di Pasku tin un orígen pagano. Den Stephen Nissenbaum su buki The Battle for Christmas, e ta referí na Pasku komo “nada mas ni nada ménos ku un fiesta pagano ku tin un kapa kristian.” P’esei mes, Pasku ta un selebrashon ku ta desonrá Dios i su Yu, Hesukristu. Akaso esaki ta un detaye menor? Beibel ta puntra: “Ki relashon hustisia tin ku maldat? Òf kiko lus tin en komun ku skuridat?” (2 Korintionan 6:14) Pues, Pasku i su kustumbernan ta mes malu ku un palu ku a krese skùin, sin ku e “por wòrdu hasí stret” mas.—Eklesiástes 1:15.