PA MIÓNES di katóliko rònt mundu, e dekreto di 1870 di e promé Konsilio di Vatikano ta un dògma di iglesia, esta, un doktrina ku no por kambia i ku hende mester obedesé. Ma ta bon pa nos hasi nos mes e preguntanan akí: ‘E ta un siñansa basá riba Beibel? Ademas, Papa Francisco realmente ta susesor di apòstel Pedro? I Pedro tabata e promé papa?’

E dekreto di 1870 di e Konsilio di Vatikano tabata basá riba su interpretashon di Mateo 16:16-19 i Huan 21:15-17. Manera e kòmbersashonnan entre Hesus i Pedro den e tekstonan akí i tambe den otro pasashinan di Beibel ta laga nos komprondé, apòstel Pedro a hunga un papel importante den historia di kristianismo di promé. De echo, e promé biaha ku nan a topa, Hesus a profetisá ku Pedro lo tabata fuerte i firme manera baranka. (Huan 1:42) Pero Kristu a duna Pedro máksimo outoridat?

Na Mateo 16:17 i 18 nos ta haña e palabranan ku Hesus a bisa Pedro: “Mi ta bisa bo ku abo ta Pedro, i riba e baranka akí lo mi traha mi iglesia.” * Akaso Hesus tabata ke men ku lo el a lanta su “iglesia,” òf kongregashon, riba Pedro, un solo hòmber? Pedro lo mester tabata na kabes di tur siguidó di Hesus? Kiko e otro apòstelnan presente a komprondé for di e palabranan di Hesus? Den e Evangelionan nos por lesa ku despues diferente biaha e apòstelnan tabata diskutí tokante ken tabata esun di mas grandi. (Mateo 20:20-27; Marko 9:33-35; Lukas 22:24-26) Si Hesus a duna Pedro máksimo outoridat òf si e tabata superior na e otro apòstelnan, lo tabatin motibu pa nan diskutí ken tabata esun di mas grandi?

Kon Pedro mes a komprondé e palabranan di Hesus? Siendo ku Pedro a lanta komo israelita, lo e mester tabata konosé diferente profesia hebreo  ku ta papia di un “piedra” òf un “piedra-di-skina.” (Isaías 8:13, 14; 28:16; Zakarías 3:9) Ora Pedro a sita un di nan den un karta na su kompañeronan kristian, el a splika ku e “piedra-di-skina” profetisá den e Skritura tabata Señor Hesukristu, e Mesías. Pedro a usa e término griego petra (mesun palabra ku Hesus a usa na Mateo 16:18) en konekshon ku Kristu so.—1 Pedro 2:4-8.

Apòstel Pablo tabata un otro fiel siguidó di Hesus. Akaso Pablo a kere ku Hesus a duna Pedro máksimo outoridat? Pablo a rekonosé e papel ku Pedro a hunga den e kongregashon kristian di promé siglo i a skirbi ku Pedro tabata entre esnan ku a “wòrdu konsiderá di ta pilarnan.” Pa Pablo tabatin mas ku un ‘pilá.’ (Galationan 2:9) Mas ainda, si Hesus a nombra Pedro komo kabes di e kongregashon, kon por ta ku su rumannan kristian a djis konsider’é un pilá?

Ora Pablo a skirbi tokante e manera robes ku Pedro a trata sierto hende, ku tur rèspèt Pablo a bisa frankamente: “Mi a opon’é abiertamente, pasobra e tabata robes.” (Galationan 2:11-14) Pues, Pablo no tabatin na mente ku Kristu a lanta su iglesia, òf kongregashon, riba Pedro ni niun otro hòmber imperfekto. Al kontrario, pa Pablo, e kongregashon tabata fundá riba Hesukristu, i “e baranka tabata Kristu.”—1 Korintionan 3:9-11; 10:4.

Pues, kon nos mester komprondé e palabranan: “Abo ta Pedro, i riba e baranka akí lo mi traha mi iglesia”? Pa nos por komprondé un teksto bon, nos tin ku lesa su konteksto. Di kiko Hesus i Pedro tabata papia? Hesus a kaba di puntra su disipelnan: “Ken boso ta bisa ku mi ta?” Sin pensa dos biaha, Pedro a kontest’é: “Abo ta e Kristu, Yu di e Dios bibu!” Hesus a elogiá Pedro pa esei i a bisa ku lo el a traha su “iglesia,” òf kongregashon, riba un “baranka” muchu mas sólido, esta, riba esun den ken Pedro a demostrá fe, esta Hesus mes.—Mateo 16:15-18.

 Hopi di e asina yama “Tatanan di Iglesia” a yega na e mesun konklushon. Nan tambe a skirbi ku e baranka di Mateo 16:18 ta Kristu. Por ehèmpel, den siglo 5, Agustin a skirbi: “Señor a bisa: ‘Riba e baranka akí lo mi traha mi Iglesia,’ pasobra Pedro a bis’é: ‘Abo ta e Kristu, Yu di e Dios bibu.’ Ta p’esei, ta riba e baranka akí, ku bo a rekonosé, lo mi traha mi Iglesia.” Agustin a bisa vários biaha ku “e Baranka (Petra) tabata Kristu.”

Si mester a husga Agustin i otro hende ku tabata pensa meskos a base di e doktrina katóliko, nan lo tabata un sèt di rebelde. De echo, segun e teólogo suiso Ulrich Luz, ekspertonan riba tereno di Beibel awe tin mesun opinion ku Agustin. Pero, segun e dekreto di 1870 di e Konsilio di Vatikano nan por ser konsiderá apóstata.

Apòstel Pedro no tabata konosí ku e título “papa.” Echo ta ku te ku siglo 9, hopi obispu ku no tabata romano a duna nan mes e título ei. Apesar di esei, ta te na fin di siglo 11 a bin usa e título ei komo un título ofisial. Ademas, ningun kristian di promé siglo no a pensa ku un susesor a haña e máksimo outoridat ku supuestamente Pedro a haña. P’esei e eksperto aleman Martin Hengel a yega na e konklushon ku “ni historia ni teologia no ta duna prueba di kon papa a logra haña ‘máksimo outoridat.’”

Komo resúmen: Pedro tabata e promé papa? E tabatin susesor? E dògma katóliko ku papa tin máksimo outoridat ta basá riba Beibel? E úniko kontesta korekto pa tur e preguntanan akí ta ‘nò.’ Echo ta ku sin duda Hesus a traha su iglesia, su kongregashon berdadero, riba su mes. (Efesionan 2:20) P’esei, kada un di nos mester hasi nos mes e pregunta importante akí: ‘Mi a haña e kongregashon berdadero ei?’