Agostinho, un hòmber ku ta biba na Brazil, a konta: “M’a krese den kunuku den un bario na Brazil. Nos tabata masha pober. Mi mester a kita for di skol i bai traha pa yuda perkurá pa nos famia.” Ta te na edat di 33 aña Agostinho a siña lesa i skirbi. El a bisa: “M’a siña lesa i skirbi, i esei a duna mi dignidat i balor propio.”

 Agostinho ta un di e mas ku 250 mil hende ku Testigunan di Yehova a yuda siña lesa i skirbi durante e último 70 añanan. Dikon Testigunan di Yehova ta duna e lèsnan ei? Kon hende ta benefisiá di e edukashon ei?

 Pa meimei di dékada di 1930, Testigunan di Yehova tabata prediká den 115 pais. Pa alkansá hende ku ta papia otro idioma, e misioneronan tabata laga hende skucha grabashon di diskurso tradusí ku ta basá riba Beibel. Tambe nan a laga literatura na e idiomanan ei. Aunke hopi hende a mustra interes den e siñansanan di Beibel, e echo ku hopi di nan no por a lesa ni skirbi, a stroba nan di siña.

 Nan no tabata por a lesa Beibel riba nan mes, i esei a stroba nan di apliká e prinsipionan den nan bida. (Hosue 1:8; Salmo 1:2, 3) Ademas, mas despues tabata difísil pa nan kumpli ku nan responsabilidat kristian. Por ehèmpel, si e mayornan no por lesa lo ta mas difísil pa nan siña nan yunan loke Beibel ta bisa. (Deuteronomio 6:6, 7) Un Testigu nobo ku no por a lesa, lo tabatin problema pa usa Beibel i siña otro hende.

 Durante e añanan 1940 pa 1950, Nathan H Knorr i Milton G Henschel, dos persona di esnan ku tabata dirigí e Testigunan di Yehova, a biaha bai diferente pais pa yuda organisá e trabou di prediká. Den pais kaminda hopi hende no tabata por a lesa ni skirbi, nan a animá e sukursalnan lokal pa kuminsá organisá lès di lesa i skirbi den e kongregashonnan.

 E sukursalnan a manda instrukshon pa e kongregashonnan organisá e lèsnan ei. Na algun pais, gobièrnu tabatin programa pa duna lès kaba ku a resultá masha útil. Por ehèmpel, na Brazil e sukursal a risibí material i buki for di gobièrnu i a manda eseinan pa e kongregashonnan. Na otro pais, e Testigunan mes mester a hinka nan programa den otro pa duna lès di lesa i skirbi.

 E lèsnan di siña lesa i skirbi tabata tantu pa hende hòmber komo hende muhé, pa grandi i chikí. E intenshon tabata pa siña e hendenan lesa nan idioma materno, asta si esei a nifiká duna lès na mas ku un idioma den e mesun kongregashon.

 Kon hende a benefisiá di e programa di siña lesa i skirbi ei? Un Testigu di México ta konta: “Awor mi por komprondé e mensahe di Beibel i e por yega na mi kurason. E echo ku mi por lesa ta yuda mi papia libremente ku mi bisiñanan i mi por alkansá mas hende ku e mensahe di Beibel.”

 E programa pa siña hende lesa i skirbi a bai mas leu ku simplemente yuda hende komprondé Beibel. Isaac ku ta biba na Burundi ta konta: “Siña lesa i skirbi a yuda mi desaroyá vários abilidat pa traha den konstrukshon. Mi a hasi trabou di konstrukshon mi karera i awor mi ta na enkargo di vários proyekto grandi di konstrukshon.”

 Jesusa di Perú tabatin 49 aña ora el a kuminsá asistí na e lèsnan di siña lesa i skirbi. Jesusa a bisa: “Komo ama di kas, mi tin ku wak bon kiko e preis i nòmber di e produktonan den supermerkado ta. Den pasado esei tabata difísil. Pero awor, danki na e lès di siña lesa i skirbi mi tin mas konfiansa ora di kumpra kos pa mi famia.”

 Durante transkurso di hopi aña, outoridat den diferente pais a elogiá Testigunan di Yehova pa nan trabou di siña hende lesa i skirbi. Awe, ainda Testigunan di Yehova ta yuda den e trabou akí, usando algun programa i método di siña ku a ser mehorá. Nan a prepará i imprimí 224 mion foyeto na 720 idioma pa yuda hende siña lesa i skirbi òf pa yuda esnan ku tin poko edukashon. a