Hesus a bisa su disipelnan: ‘Boso lo ta mi testigunan . . . te e parti mas leu di tera.’ (Echonan 1:8) Awe, e Testigunan di Yehova ta kumpli ku e tarea ei ku hopi entusiasmo. Pero na sierto parti di mundu, inkluso na algun region grandi kaminda hopi hende ta biba, ainda mester alkansá mas hende ku e trabou di prediká. Na algun pais, tin masha poko Testigu di Yehova. (Mateo 9:37, 38) Kiko nos ta hasiendo pa prediká na mas tantu hende posibel?

 Pa nos por kumpli ku e tarea ku Hesus a duna nos, Komité di Sirbishi di Kuerpo Gobernante di Testigunan di Yehova ta manda misionero kaminda tin mester di mas Testigu di Yehova den e trabou di prediká. Aktualmente, tin 3.090 misionero rònt mundu. a Mayoria di nan a bai un skol bíbliko, manera Skol pa Predikadó di Reino. E misioneronan ta dispuesto pa bai laga nan kas i bai biba na un otro pais. Nan ta hende madurá, i nan tin e entrenamentu i eksperensia nesesario. Nan ta yuda e Testigunan lokal prediká tokante e bon notisia, i nan ta un bon ehèmpel pa e disipelnan nobo di Hesus.

 E Departamento Ku Ta Asistí Pionero Spesial i Misionero den Vèlt na kada sukursal i ku ta kai bou di e Departamento di Sirbishi di un sukursal ta traha huntu ku Komité di Sukursal pa por pèrkurá pa e nesesidatnan di e misioneronan. Por ehèmpel, pa nan haña un kaminda simpel pa nan biba, pa kuido di nan salú i pa nan haña un tiki sèn pa kubri nan gastunan personal. Durante aña di sirbishi 2020, e Testigunan di Yehova a gasta kasi 27 mion dòler pa pèrkurá pa e misioneronan. Danki na e provishonnan akí, e misioneronan por usa nan tempu i energia pa prediká i fortalesé nan kongregashon.

 Kon e misioneronan ta yuda ku e trabou di prediká? Frank Madsen, un ruman den Komité di Sukursal di Malawi, a bisa: “Komo ku e misioneronan akí tin kurashi i eksperensia den sirbishi, nan ta yuda e kongregashonnan kuminsá prediká den teritorio ku no ta fásil pa prediká den dje, manera den zona residensial rondoná pa muraya i bewaker i den área kaminda hende ta papia otro idioma. Ademas, komo ku e misioneronan ta hasi nan esfuerso pa siña e idioma lokal i e kultura di e pais, nan ta pone un bon ehèmpel pa otro ruman. Ademas, nan ta animá e hóbennan pa drenta sirbishi di tempu kompleto. Nos ta gradisí Yehova ku e ta manda misionero.”

 Un miembro di un Komité di Sukursal di un otro pais a bisa: “E misioneronan ta duna prueba ku, na tur parti di mundu, e pueblo di Yehova ta un pueblo uní. Asta hende ku no ta Testigu por mira kla ku kultura no ta dividí nos. Nan ta mira ku e siñansanan di Beibel ta yuda nos bira un hermandat uní.”

 Kon e misioneronan ta yuda e publikadónan lokal? Paulo, un ruman di Timor-Leste, ta masha gradisidu pa loke e misioneronan den nan kongregashon ta hasi. Paulo a bisa: “Kaminda nos ta biba ta hasi hopi kalor. Aunke e misioneronan a bini di un pais friu, nan no ta laga e klima kayente akí stòp nan di prediká. Nan t’ei na tur e reunionnan di sirbishi parti mainta. Hopi biaha nan ta sigui hasi rebishita te mèrdia, ora ta hasi masha kalor mes. Atardi tambe nan ta traha den sirbishi. Nan a yuda ami i hopi hende mas haña e bèrdat. Nan a dediká nan bida na sirbi Yehova, i nan ta hasi esei ku hopi entusiasmo. Esei ta motivá henter e kongregashon pa sirbi Yehova mihó.”

 Ketti, un ruman muhé na Malawi ku ta pionero regular, ta konta kon un pareha misionero a yuda su famia: “Tempu ku un pareha misionero a ser asigná na nos kongregashon, mi tabata e úniko Testigu di Yehova den mi famia. E pareha ei a yuda mi masha bon mes, i nan a bira bon amigu di mi famia. Nan bon ehèmpel a yuda mi yunan mira ku ora nan sirbi Yehova, nan lo tin un bida realmente felis. Danki na e pareha akí su bon ehèmpel, mi tres yu muhénan ta pionero regular, i mi kasá a kuminsá bai reunion.”

 Kon ta kubri e gastunan di e misioneronan? Ta hasi esei ku e donashonnan ku nos rumannan ta duna pa e obra mundial. Hopi di e donashonnan ei ta ser hasí via un di e métodonan ku tin na donate.pr418.com. Masha danki pa boso donashonnan generoso.